Berlin (Komunikado di Prensa) – E organisashon Transparency International (TI) lo hiba un estudio na Kòrsou usando su sistema di evaluashon di Integridat Nashonal, ku den pasado a wòrdu usa den mas òf ménos 100 pais rònt mundu.
Un evaluashon di Integridat Nashonal ta konsistí di un evaluashon di e instituto nan prinsipal i aktor nan ku ta forma un estado, inkluyendo tur sektor di gobièrnu, media, e sektor públiko i priva i e sosiedat sivil. E propósito di e estudio ta pa identifiká e faktor nan di riesgo den un pais ku ta promové korupshon i alabes trese solushon nan den tèrmino mediano i largu pa yuda baha e riesgo nan aki.
Transparency International lo kondusí e estudio nan Kòrsou den diálogo ku e aktor nan prinsipal den gobièrnu, sosiedat sivil i e sektor priva. “E evaluashon di e sistema di Integridat Nashonal ta un bon oportunidat pa habri diálogo polítiko i tékniko rondó di “good governance” i reforma nan den un pais. E meta di e evaluashon nan aki ta pa krea un fundeshi pa reforma nan institushonal i asina hiba na mihó polítika i akshon nan mas efektivo”, segun Alejandro Salas, direktor regional di Transparency International pa e área di Amérika.
E reporte ku lo keda publiká independientemente pa Transparency International lo kontené konstatashon nan basa for di evidensia i lo ta basa riba kontribushon di sektor polítiko, sosial i ekonómiko. Rekomendashon nan anti korupshon lo wòrdu generá pa e instituto i aktor nan prinsipal di Kòrsou.