Stichting Tegen Kindermishandeling, e fundashon ku ta lucha kontra abuzu di mucha, a tuma nota di e desaroyonan e siman aki pa loke ta trata e asesino James Murray. T’asina ku segun informashon ofisial, dia 10 di mei próksimo, Korte lo mester tuma un desishon ku si despues di 33 aña enkarselashon, ta laga James Murray liber òf ta mantené enkarselá.
Stichting Tegen Kindermishandeling teniendo kuenta ku e emoshonnan ku ta biba den komunidat pero mas ahinda teniendo kuenta ku e seriedat di e delito ku James Murray a kometé, ta deseá Korte forsa i voral sabiduria den su desishonnan pa liberá James Murray i pa tene kuenta ku diferente aspektonan di importansha den kaso di James Murray.
Stichting Tegen Kindermishandeling no tin duda ‘at all’ ku e desishon ku Korte lo tuma ta esun korekto, konforme lei i na bienestar di e komunidat en general.
James Murray a wòrdu enkarselá despues ku dia 23 di mei 1979, 33 aña pasá, na un forma kruel el a violá seksualmente e hobensita Darly Lai di 6 aña pa despues asesiná e kriatura hinkando e ku kuchú diferente biaha inkluso na su parti privá. E forma kon James a kometé e delito aki ta unu ku hamas un hende lo lubidá òf imaginá. E suseso aki, apesar ku el a sosodé 33 aña pasá, a kousa un tristesa enorme den henter e komunidat. Serka mayoria hende ahinda e memorianan tin efektonan sikológiko. Esnan ku sigur ta afektá pa e suseso aki ta e famia di e kriatura, ku si e tabata na bida, awe lo tabata un dama di 40 aña.
Pa motibu di rabia i vengansa pa asuntunan familiar, James Murray a disidí pa venga riba loke tabata mas balioso i kerí pa e famia, esta Darly Lai. James a buska Darly for di skol riba e mèrdia di 23 di mei 1979, pretendiendo ku el a bin buska Darly pa su mama, i a bai kuné na un sitio alehá pa aya violá Darly i hink’é ku kuchú algun biaha ku e konsekuensha ku e mucha a bin fayesé.
Den prizòn tabata e propio James ku a mustra ku e no tin niun klase di remordimentu pa loke el a hasi i asta tabata forma un peliger pa otro prezunan despues di a intentá pa violá dos prezu. Loke mas a resaltá tabata ora ku algun aña pasá tabata James mes kende a deklará públikamente lo siguiente: ‘si mi sali, lo mi hasi e mesun kos’.
Konsekuentemente e aktitut i duda den komportashon di James a pone ku mester a enkarsel’é separá for di lo demas.
– Stichting Tegen Kindermishandeling ta komprondé ku ta un derechi di kualkier asesino pa na momentu ku e mester rekobrá su libertat, esaki tuma lugá tambe. Pero, teniendo kuenta ku e peliger ku James Murray por forma pa komunidat,
– teniendo kuenta ku e chèns pa e mesun akto bolbe ripití,
– teniendo kuenta ku no tin garantia ku James Murray lo bai ta un persona diferente,
– teniendo kuenta ku e rabia i emoshonnan ku ta biba den komunidat
– i finalmente teniendo kuenta ku mester evitá abuzu i asesinato di mas mucha inosente,
Stichting Tegen Kindermishandeling ta hasi un apelashon desente na Korte di Hustisia pa tene èkstra konsiderashon ku un ke otro na momentu di tuma desishonnan.
Ta komprendibel ku pa e persona di James Murray mes ku e lo no tin e trankilidat mas den komunidat, maske ku e rekobrá su libertat, ku un oportunidat mas den bida p’e pro lo pronto lo pinta hopi skur, ku su presensia den kualkier bario lo ta un menasa pa habitantenan i muchanan di e bario i chèns ta grandi ku Murray lo bin top’é ku okashonnan kaminda lo konfront’é ku su akto ku tur e konsekuensha ku esaki lo tin p’e mes i pa otro.
Den kaso ku Korte disidí mes pa duna James Murray su libertat konforme loke lei ta stipulá, Stichting Tegen Kindermishandeling ta supliká pa buska formanan pa protehá e komunidat – en espesial e mucha – i pa hasi tur loke ta na alkanse di Korte pa evitá mas viktima di James.
E suseso di 23 di mei 1979 mester por sirbi pa habri bista di hopi kon doloroso abuzu i violashon di un mucha ta i e konsekuenshanan ku esaki tin pa henter un komunidat. Nos muchanan ta indefenso den hopi kos ku ta pasa ku nan, p’esei segun e fundashon mester sigui traha pa protehá nan.
Darly Lai ta un ehèmpel di esaki. Ku konfiansa el a drenta outo di James sin nunka pensa o imaginá ku awe e no tei mas i esaki ta loke James a hasi kuné. Komo tal Stichting Tegen Kindermishandeling ta supliká e sosten di henter e komunidat tambe pa HUNTU kuné ban lucha pa un komunidat ku menos violensha bou di nos muchanan.
BAN PREVENI PA NO LAMENTA.