WILLEMSTAD – Riba petishon di Ministerio Públiko i bou di guia di un wes komisario, awe den ora nan di mainta a tuma lugá un entrada hudisial na un kas den e área di Mahuma. E entrada aki ta relashoná ku e investigashon Magnus. Durante di e entrada aki a pone beslag riba entre otro telefòn nan móbil i kòmpiuter pa mas investigashon. No tabatin detenshon.
Despues di e asesinato riba señor H.M. Wiels, polis i Ministerio Públiko tabatin indikashon nan ku e yu di Kòrsou E.R.K. di 36 aña lo tabata envolví den e asesinato aki, pero no tabatin sufisiente prueba pa por a pasa over pa su detenshon. Durante di e investigashon Magnus a bin sali na kla ku si tabatin sufisiente prueba pa E.R.K. por a keda sospechá di e asesinato riba R.J.N Conception, kual asesinato a tuma lugá na yanüari 2013 na Caracasbaai. Dia 13 di sèptèmber 2013, E.R.K. a keda detené pa e kaso ei. Awe wes komisario a ordená e enkarselamentu (‘bewaring’) di E.R.K. pa e kaso di asesinato na Caracasbaai.
Riba petishon di Ministerio Públiko, wes komisario awe a ordená e enkarselamentu di E.R.K. pa su envolvimentu den e asesinato di señor Wiels tambe. E investigashon den e kaso di asesinato riba señor Wiels entretantu a progresá di tal forma, ku banda di e tres detenshon nan di djabièrnè, awe E.R.K. tambe por a keda pone bou di aresto preventivo pa e asesinato di señor Wiels.
Pues na e momento aki tin 4 persona detené en konekshon ku e asesinato di parlamentario H.M. Wiels, ya ku e tres persona nan ku a keda detené djabièrnè último en konekshon ku e asesinato di señor Wiels, a presentá awe dilanti di un wes komisario, ku a konkluí ku tantu nan detenshon, komo e prolongashon di nan detenshon (ku ocho dia mas), a bai konforme regla i prosedura nan.