WILLEMSTAD – Futbòl Liga MCB a kontinuá den wikènt tras di lomba ku tres partido. Djabièrnè e ekipo di Centro Dominguito a topa ku e ekipo di Jong Holland. Den e partido aki Centro Dominguito a sa di bai ku e viktoria ku un skor di 4-1 riba Jong Holland. Pa Dominguito e golnan a keda anotá pa, Kemoy Reid na dos okashon, Mirco Colina JR. i Ashar Bernardus. Pa Jong Holland tabata Vurgell Bekeer ku ta anotá.
Riba djasabra no tabata tin partido i djadumingu e kampionato a sigui ku dos partido. Den e promé partido SUBT a enfrentá e ekipo di Centro Barber. Akinan ku kuater gol e ekipo di Centro Barber ta kibra e invikto di SUBT, ganando ku skor di 4-0. Pa Barber e golnan a keda anotá pa, Norman Hoyer, Reunsley Leuteria, Jurensley Martina i Kenneth Kunst.
Den e di dos partido Hubentud Fortuna ta sali di e porta grandi, ganando di Sithoc ku skor di 1-0. E gol a keda anotá pa Mauricio Moreno.
Awe e kampionato Liga MCB ta kontinuá ku un partido, na momentu ku Jong Colombia enfrentá e ekipo di Undeba.