WILLEMSTAD – Komishon Deportista di Luna riba djasabra 03 di mei 2014, a reuní den sala di reunion di FFK, kaminda a evaluá i diskutí riba e kandidatonan ku a keda presentá pa miembronan dje komishon i federashonnan pa e premiashon di “Deportista di Luna” korespondiente na luna di Aprel 2014. Manera semper ta keda spliká, na momentu ku a inisiá ku e proyekto aki, e premio aki mester sirbi komo un estímulo, a base di prestashon i komportashon, pa nos deportistanan lokal, ku ta biba na Kòrsou i ku ta kompetí den kompetensianan lokal komo tambe internashonal den representashon di pais Kòrsou.
E komishon a yega na e siguiente nominadonan:
1. Stakamahakchi Femenino (Vòlibòl), E ekipo femenino di Vòlibòl Stakamahakchi Guardian Group a sobresalí enormemente durante di e aktual temporada di Vòlibòl. Tabata den luna di aprel ku e ekipo di Stakamahakchi ta enfrentá e fuerte ekipo di Shuatanari den e final di vòlibòl kategoria femenino superior. E ekipo di Stakamahakchi ta bataya fuertemente i ta logra titulá kampion di Kòrsou ora ku nan ta gana e seri final 3-1 den un seri mihó di 5. Pa e motibu ariba menshoná e ekipo femenino di Vòlibòl Stakamahakchi Guardian Group a keda skohe komo nominado pa deportista di luna aprel 2014.
2. Kevin Philbert (Atletismo), Kevin Philbert ta un hóben ku ta studia na Kolegio Alejandro Poula i ta práktika atletismo. Tabata durante fin di siman di 21 pa 23 di mart, ku Kevin Philbert a partisipá na e kompetensha Carifta Games na Martinique. Kevin Philbert Pa loke ta trata nos selekshon di atletismo ku a bai kompetí den e weganan di Carifta ku a tuma lugá na Martinique, Kevin Philbert tabata esun ku a logra bin kas bèk ku un medaya di Plata den ‘e disiplina di long jump’ kategoria U20. Pa e motibunan ya menshoná, Kevin Phibert a keda skohe komo nominado pa deportista di luna aprel 2014.
3. Chade Nersicio (Natashon), Chade ta un hóben di 13 aña ku ta studia na Radulphus College i ta miembro di e ekipo Curacao Sharks Aquatics. Tabata durante di e Carfita Swimming Championship, ku a tuma lugá den luna di aprel na Aruba, ku Chade Nercisio, aparte di a logra kibra 4 rèkòrt di Carifta, a kibra alabes 6 rèkòrt nashonal. Chade a logra di bin kas ku 5 medaya di oro. Chade a logra tambe di bin kas ku e trofeo di Fina Highest Points. Pa e motibunan ya menshoná, Chade Nersicio a keda skohe komo nominado pa deportista di luna aprel 2014.
Komishon ta gradisí e siguiente spònsernan ku ta yuda pa e premiashon aki por bira posibel: CHANGES PRO SPORT – RIO LOUNGE & SPORTS BAR- MCB – PETRO INDUSTRIAL NV – CSOF – SALAS SPORT SHOP – LILO SULVARAN – ALLSTAR EMBROIDERY – DIORCA NV – PELOTA – DE JONGH’S SPORTHUIS – FOTO STUDIO KORT – STRAK STRAK BARBERSHOP – FFK – SELIKOR – FUNDASHON NOBO – COCA COLA.
E anunsio i premiashon di e ganadó lo tuma lugá:
Fecha: Djasabra 10 Mei 2014.
Ora: 18.00 – 19.00’or.
Sitio: Rio Lounge & Sports Bar, Chuchubiweg 10?Damacor.
Den un ambiente liber di humamentu i liber di alkohòl