WILLEMSTAD – Fin di yüli i kuminsamentu di ougùstùs lo bai tuma lugá aki na Kòrsou den stadion Ergilio Hato (SDK) un torneo internashonal di futbòl U-20, ku ta e hungadónan bou di 20 aña.
E torneo aki ta e promé rònt di e weganan di klasifikatorio pa mundial di U-20 di FIFA. E torneo lo konta ku partisipashon di Cayman Islands, Anguilla, St Kitts & Nevis i nos selekshon nashonal di U-20.
Despues ku aña pasa pa promé biaha den historia nos selekshon di U-20 a yega final na Mexico i tabata entre e último 8 di e 42 paisnan di CONCACAF ku a partisipá, e biaha aki nos lo bai pa klasifiká pa Mundial di FIFA U-20.
Nos selekshon di U-20 ta konta ku un total di 20 hungadó di for di kua sinku ta bini for di Hulanda pa asina reforsá nos selekshon.
Skema di e weganan:
30 yüli 2014
19:00: Cayman Islands vs St Kitts & Nevis
21:00: Kòrsou vs Anguilla
1 ougùstùs 2014
19:00: St Kitts & Nevis vs Anguilla
21:00: Kòrsou vs Cayman Islands
3 ougùstùs 2014
17:00: Anguilla vs Cayman Islands
19:00: Kòrsou vs St Kitts & Nevis
E kosto pa asistí na e weganan ta lo siguiente;
Entrada general pa hende grandi ta kosta Fl.10,- pa dia (tin 2 wega pa dia) i fl.25,- pa tur 3 dia.
Mucha te ku 12 aña i 60+ ta kosta fl. 5,- pa dia (tin 2 wega pa dia) i fl.10,- pa tur 3 dia.
VIP ta kosta fl. 75,- pa un dia (tin 2 wega pa dia), fl. 140,- pa 2 dia i fl. 200,- pa tur 3 dia.
Karchinan ta optenibel na e lokètnan di SDK promé ku e weganan òf na ofisina di FFK bou di ora di ofisina.
FFK i MCB e amigu di deporte ta invitá hinter e pueblo di Kòrsou pa bin ku bo famia i bin sera bo fakansi i disfrutá di tremendo partidonan di kualifikashon pa e mundial di U-20. Bin sostené i apoyá nos hungadónan lokal i yuda engrandese e deporte rei, futbòl.