WILLEMSTAD – Federashon Futbòl Kòrsou lo kuminsá ku e kampaña di FIFA ‘Live Your Goals’ ku ta destiná pa desaroyo di futbòl di dama.
FFK ta hopi orguyoso ku Kòrsou a wòrdu skohe pa FIFA, komo un di e poko paisnan ku ta kai bou di CONCACAF (banda di paisnan manera Costa Rica i Canada), pa implementá e proyekto Live Your Goals.
FIFA a introdusí e konsepto di Live Your Goals durante e Mundial pa dama i otro aktividatnan internashonal di futbòl pa dama. E meta di e proyekto aki ta pa konsientisá e pueblo riba futbòl pa dama, tambe pa e promoshon di futbòl pa dama i pa atraé mas futbolista femenino pa kuminsá práktika e deporte aki. Durante e kampañanan ku a keda organisá den paisnan eksterior, algun futbolista femenino profeshonal a asistí na e festival di futbòl aki pa konta tokante nan eksperensia ku futbòl pa dama, kiko ta e nifikashon di futbòl den nan bida i kiko ta nan metanan pa ku futbòl. Tur esaki por haña riba; www.FIFA.com/liveyourgoals.
E proyekto Live Your Goals no ta solamente un soño. Futbòl ta pa tur hende i riba tur nivel, esei ta konta pa hende muhé tambe. Futbòl ta un manera agradabel pa keda den bon kondishon i e ta yudabu desaroyá diferente aspekto sosial. Ta fásil pa un nobato siña kiko ta futbòl i forma parti di un ekipo di kual bo por siña i desaroyá bo abilidatnan pa ku e deporte aki. Tambe bo ta siña konosé diferente persona i ta traha riba desaroyo di diferente abilidat sosial manera: disiplina, ‘team spirit’, liderazgo i perseveransia.
Den e di dos fase di e proyekto Live Your Goals, FIFA lo sostené tur e federashonnan di futbòl internashonal pa medio di material i finansieramente pa asina sigui ku un plan struktural ku lo tin komo meta pa popularisá futbòl pa dama. E proyekto lo keda sostené dor di kampaña promoshonal kaminda diferente futbolista femenino lokal lo hunga un ròl importante aden.
Live Your Goals Kòrsou
Diante Scheepers, Lauryn Richardson i Lindsey Hart ta e 3 damitanan ku a keda skohe pa fungi komo embahador di e proyekto aki na Kòrsou. E hobensitanan aki tin vários aña ta práktika e deporte di futbòl i nan tur 3 ta forma parti di un klup lokal di futbòl pa dama. Tambe nan a wòrdu selektá pa forma parti di nos selekshon nashonal di dama i a bai den eksterior pa representá nos pais. Ya por tuma nota di nan karanan ku a keda usá riba diferente di e materialnan di promoshon i tambe riba e paginá web di FFK (www.ffk.cw) i riba e página di Facebook ku a keda traha espesialmente pa e proyekto aki (https://www.facebook.com/liveyourgoalscuracao). Den transkurso di e siman aki nos lo tende hopi mas di e 3 damitanan aki na diferente medio di komunikashon.
E kampaña di Live Your Goals ta kuminsá djasabra 30 di ougùstùs benidero ku un tremendo festival pa damanan futbolista, di 9or di mainta pa 12or di mèrdia na tereno di FFK. Damitanan di diferente skol a wòrdu invitá pa di un manera deportivo nan sera konosí i sa mas di futbòl pa dama. Entrada pa e evento aki ta kompletamente grátis i e públiko presente lo por disfrutá di bon músika di un DJ i tambe di un seshon di Zumba pa kalentá.
Awe, djamars 26 di ougùstùs un total di 30 kursista lo kuminsá ku e kurso pa bira entrenadó di futbòl pa dama. E kurso aki lo ta na enkargo di e dosente di FIFA; Sra. Andrea Rodenbaugh. E kurso aki ta konta ku e parti teorétiko pero tambe práktiko. E kursistanan lo mester bai pone den práktika tur e konosementu ku nan optené durante e lèsnan, dia 30 di ougùstùs durante e festival di futbòl pa dama i durante hinter e periodo di proyekto Live Your Goals.
Desaroyo duradero
Pa un periodo largu futbòl di dama ta un prioridat serka e dirigentenan di FFK. Tin un komishon spesial asigná pa futbòl di dama i nos selekshon nashonal di dama ta partisipá ku regularidat na diferente interkambionan interinsular i kampionatonan internashonal. Awor aki tur aktividat di futbòl di dama lo kai bou di e proyekto di Live Your Goals ku ta konta ku un plan di desaroyo di futbòl di dama riba un trayekto largu i duradero, un plan pa 2014 te 2018.
Kontinuashon di e trayekto i aktividat nan pa 2014
Aktividat nan di futbòl pa despues di skol a keda brinda nan 6 diferente skol básiko. E aktividat nan aki ta ser brinda nan damitanan di grupo 7 i 8. FFK lo sòru pa tur material nesesario i tambe un entrenadó di dama pa e diferente aktividatnan aki. Tambe lo organisá un torneo di U-11 pa e partisipantenan aki. E skolnan kua keda skohe pa partisipá na e proyekto ki ta lo siguiente; Maduro School, Oranje School, Magriet School, Johan van Walbeeck School, Johan Maurits School i Kolegio Dodo Palm.
Mas lat den transkurso di aña FFK lo organisá un kompetensia di futsal, e fecha eksakto lo wòrdu anunsiá despues.
Den òktober lo kuminsá ku e torneo di élite 5 kontra 5 pa kategoria U-13 i U-15 ku ta destiná pa tur skol na Kòrsou i den e periodo di 14 di novèmber pa 14 di desèmber lo tin un festival di futbòl di playa riba tur djabièrnè.
E di dos festival di Live Your Goals lo wòrdu organisá dia 14 di novèmber próksimo kaminda diferente skol lo partisipá. FFK ta spera di por konta ku tur e skolnan aki na tur e diferente kampionatonan di kategoria U-11, U-13 i U-15 ku lo tuma lugá den 2014 i 2015. E intenshon ta pa organisá e festival di Live Your Goals pa dama aki 4 bia pa aña.