WILLEMSTAD – E selekshon di Korsou a logra klasifikashon pa e buelta final di Caribbean Cup. Esaki despues ku e selekshon nashonal di Korsou a logra un viktoria di 1-0 kontra Guadeloupe. Despues di a empata e prome partido i perde e di dos partido e viktoria kontra Guadeloupe tabata un mester pa Korsou. E partido tabata empata te den 90+ minut i akinan tabata Vidarell Merencia ku a manda Korsou ariba. Ku e viktoria Korsou a elemina Guadaloupe for di e komptensia den nan kas. Huntu ku Korsou den Grupo 9 tambe a klasifika e selekshon di Martinique.
E buelta final di Caribbean Cup ta kuminsa dia 10 di november proksimo na Jamaica. Segun e planifikashon aktual di Caribbean Football Union, Korsou lo ta den Grupo A huntu ku Cuba, Trinidad i Tobago i French Guiana. Den Grupo B tin Jamaica, Martinique, Haiti i Antigua i Barbuda. E top dosnan di kada grupo lo pasa pa CONCACAF Gold Cup na 2015.
Tabla di posishon final:
| Selekshon | PH | G | E | P | GF | GK | GD | Pt. |
| Martinique | 3 | 2 | 1 | 0 | 7 | 5 | 2 | 7 |
| Korsou | 3 | 1 | 1 | 1 | 2 | 2 | 0 | 4 |
| Guadeloupe | 3 | 1 | 0 | 2 | 4 | 4 | 0 | 3 |
| St. Vincent & the Grenadines | 3 | 1 | 0 | 2 | 5 | 7 | -2 | 3 |