MERKA – Pa di dos aña konsekutivo Andrelton Simmons ta gana e Wante di Oro den Liga Nashonal. Simmons di e manera aki ta bira e promé pelotero di Atlanta Braves ku ta gana Wante di Oro konsekutivamente despues ku Andruw Jones a gana su di 10 konsekutivo na aña 2007. Simmons di 25 aña di edat ta wòrdu konsiderá un di mihó shortstopnan defensivo aktualmente.
Ku e premio di Wante di Oro, Andrelton ta keda nominá tambe pa e premio di Wante di Platina. E premio aki tambe e pelotero a gana temporada pasa. Kontrali na e premio di Wante di Oro ku a keda selekshoná pa koach i managernan den Liga Grandi, fanátikonan por vota pa e premio di Wante di Platina na www.platinumglove.rawlings.com. E votashon pa e Wante di Platina ta sera awe nochi, 9’or ora lokal di Kòrsou. Riba djabièrnè, 7 di novèmber lo partisipá e ganadónan di e Wante di Platina.
E Wante di Oro ta e di dos premio ku Andrelton ta gana pa su prestashon defensivo e temporada aki. Siman pasa Simmons a keda honra ku e ‘Fielding Bible Award’.