MERKA — E sifranan ofisial di e pelea entre Floyd Mayweather i Manny Pacquiao a keda publiká. Loke a keda konsiderá komo e pelea di siglo a kibra tur rèkert pa loke ta trata benta di pay-per-view, ingreso di pay-per-view i entrada na porta. E ingreso total pa e pelea a surpasá 500 mion dòler. Ku esaki Floyd Mayweather ta risibí mas di 300 mion dòler pa 36 minüt den rin riba djasabra 2 di mei ultimo. Miéntras ku Manny Pacquiao ta risibí mas di 200 mion dòler.
Segun distribuidornan di pay-per-view na Merka, e reportenan inisial ta indiká ku na Merka mas di 4,4 mion hende a paga pa wak e evento riba pay-per-view. Esaki a genera un ingreso di mas di 400 mion dòler. E rèkert anterior di benta di pay-per-view tabata di 2,48 mion den e pelea di Oscar De La Hoya kontra Floyd Mayweather na aña 2007. Miéntras ku e rèkert anterior di ingreso di pay-per-view tabata 150 mion dòler den e pelea di Floyd Mayweather kontra Canelo Alvarez na 2013.
Entrada na porta di MGM Grand Garden Arena a genera mas di 71 mion dòler. Segun informashonnan inisial, ta indiká ku solamente nuebe karchi no a keda bendí pa presensia e pelea den MGM Grand Arena. E rèkert anterior di entrada na porta tabata 20 mion doler den e pelea di Mayweather kontra Canelo.
Tambe e pelea di Mayweather kontra Pacquiao a kibra rèkert di transmishon sirkuito sera tantu na kantidat di atmishon komo ingreso na Las Vegas i na establesimentunan komersial na Merka. E evento a bende kasi 46.000 karchi pa wak e pelea atrabes sirkuito sera na hotelnan di MGM na Las Vegas. Miéntras ku 5000 bar, restaurant i establesimentu komersial a kumpra e pelea.
E pelea a keda distribuí pa 175 pais ront mundu ku ta mas of ménos 75 porshento di e teritorionan mundial. Ku esaki tambe e pelea a kibra un rèkert di ingreso pa distribushon internashonal.