WILLEMSTAD — Dia 25 di yüli klup di atletismo Trupial – Auto City ta biaha pa Trinidad & Tobago pa kompetí kontra e atletanan di Trinidad den e kampionato nashonal di Trinidad & Tobago.
E kompetensia aki ta forma parti di e programa di interkambio ku klup Trupial ta realisá tur aña pa engrandese e eksperensia internashonal di su miembronan. Despues di vários resultado hopi bon den e kampionato di Kòrsou dia 19 i 20 di yüli último e dirigentenan di Trupial a selektá 7 atleta pa bai representá nan klup i Kòrsou na e kompetensia aki. E atleta nan hubenil aki ta pre- selektá pa prepará nan mis pa Carifta Games 2016 i 2017. Di e forma aki klup Trupial – Auto City ta traha su planifikashon di mas aña, pa logra un mihó resultado di su miembronan riba nivel internashonal. E delegashon di dirigí pa Sra. Arlene Bitorina i coach Nabi Walace. Direktiva, miembronan i nan mayornan ta deseá e atletanan aki tur klase di éksito. E delegashon ta regresá djaluna 29 di yüli.
Klup di atletismo Trupial – Auto City ta rekordá tur amante di atletismo riba nan kompetensia internashonal di dia 10 i 11 di yüli den SDK i dia 12 di yüli e kaminata/kareda di 1, 2 i 5 km habri ku ta start i kaba na Pietermaaiweg.