WILLEMSTAD — Djasabra 25 di yüli último, aya na Rusia den e palasio históriko Konstantin, mundu kompletu por a presensia e sorteo pa e terser buèlta di e weganan pa eliminatorio mundial Rusia 2018. Durante e sorteo aki a bira konosí ku nos kontrinkante lo ta El Salvador.
E fecha nan pa e partidonan di e terser buèlta aki lo ta 4 i 8 di sèptèmber binidero. E promé partido lo tuma lugá aki na Kòrsou miéntras e segundo partido lo tuma lugá aya na El Salvador. Direktiva di FFK den konsulta ku Patrick Kluivert i FIFA a yega na e desishon ku e wega di djabièrnè 4 di sèptèmber lo tuma lugá den SDK pa 6or di atardi. E orario aki no ta unu usual pero mirando e interes pa e magno evento di Curacao North Sea Jazz Festival a opta pa mantené na un orario trempan pa tur hende por sali futbòl i esnan ku ta deseá por bai disfrutá di Curacao North Sea Jazz Festival.
Pronto karchinan lo ta na benta pa e partido ku lo tuma lugá djabièrnè 4 di sèptèmber próksimo aki na Kòrsou.
E preisnan ta lo siguiente;
- VIP ta kosta Nafl. 500,- (inkluí konsumo);
- Bou di tribuna kubri ta Naf.100,-
- Bou di tribuna kubri parti Festival Center ta Nafl.75,-
- Tribuna no kubri ta Nafl.30,- te ku 31 di ougùstùs, promé di sèptèmber e karchinan lo bira Nafl.35,-. Den e sekshon aki mucha te ku 12 aña i 60+ ta paga Naf.20.-
E hungadónan di nos selekshon residensia aya na Hulanda lo yega Kòrsou dia 31 di ougùstùs próksimo pa djòin nos hungadónan lokal pa asina trainingnan por kuminsá i dia 9 di sèptèmber despues di e kompromiso aya na El Salvador nan lo regresá Hulanda pa kontinuá ku nan kompromisonan internashonal.
Benta di suèter i shal ta kontinuá na FFK na balor di 35 i 25 florin. Un súplika ta bai na abo, komo e number 12 ku no tin bo suèter òf shal ainda pa kumpra esaki paso e ora sero ta yegando.