ST. MAARTEN — E selekshon nashonal di Kòrsou kategoria U-15 a klasifiká pa e weganan di kuart final den e CFU U-15 Boy’s championship ku ta tumando lugá na St. Maarten.
Den e promé enkuentro e selekshon di Kòrsou a sali viktorioso kontra di Antigua & Barbuda ku e skor di 4-1. E golnan a keda anotá pa Nathan Bernadina (2x) i Algerick Dorothea (2x).
Despues, Kòrsou a sa di golia St. Vincent & Grenadines ku e skor di 7-0 den e di 2 enkuentro. E 7 golnan a keda anotá pa Nathan Bernadina (2x), Shurendric Fransinet (3x), Angerick Dorothea i Luchently Vrutaal.
Ayera nos selekshon a gana e ekipo anfitrion, St. Maarten, ku e skor di 4-0 i asina klasifiká pa e wega di kuart final ku un total di 9 punto. E golnan di e partido aki a keda anotá pa Shurendric Fransinet, Nathan Barnadina (2x) i Sharrion Pietersz.
E resultado di e 3 partidonan ei a pone ku nos a klasifiká pa e wega di kuart final, invíkto i number 1 den nos pul.
E wega pa kuart final lo ta kontra di Anguilla i tuma lugá awe, 12 di ougùstùs pa 7or di anochi.
Tabla di posishon:
| WH | WG | WE | WP | GF | GK | Saldo | Punto | ||
| 1 | Curacao | 3 | 3 | 0 | 0 | 15 | 1 | 14 | 9 |
| 2 | Antigua & Barbuda | 3 | 2 | 0 | 1 | 11 | 4 | 7 | 6 |
| 3 | St. Vincent & Grenadines | 3 | 1 | 0 | 2 | 2 | 9 | -7 | 3 |
| 4 | St. Maarten | 3 | 0 | 0 | 3 | 0 | 14 | -14 | 0 |
E selekshon nashonal U-15 ta konsistí di un grupo di 16 hungadó ku ta wòrdu dirigí pa Sr. Johannes van Elden ku ta e direktor tékniko di e selekshon aki i Sr. Maikel Hooi ku ta e asistente di e direktor tékniko.
Tambe ta biaha huntu ku e selekshon Sr. Eulogio Leocadia ku ta esun enkargá ku e materialnan i tambe e ta masahista di e selekshon. E hefe di delegashon ku a biaha ku e selekshon ta Sr. Erickson Statie, miembro di direktiva di FFK.