Segun Rignald Hato: “E ta kla pa duna su aporte na desaroyo di Futbòl”

WILLEMSTAD — Komo un eks futbolista profeshonal i dirigente, Rignald Hato, semper tabata presente i kla pa brinda su sosten i duna un man kaminda e por i ta na su alkanse pa sostené tur bon proyekto deportivo. Komo un hòmber ku pa hopi aña ta brindando su sosten i aporte na nos futbòl lokal i komo eks miembro di diferente selekshon ku a representá Antias i Kòrsou i hungadó profeshonal, e ta pidi e sosten pa dia 28 próksimo e drenta den direktiva di FFK i asina pone kosnan kana di un forma positivo. Aparte di a militá den futbòl lokal i futbòl profeshonal, Rignald a dirigí diferente selekshon di Orfik, selekshon Hubenil i a fungi tambe komo ‘team manager’ di nos selekshon nashonal. Rignald ta un persona ku no sa gaba su mes, pero ta dediká na hasi pa logra éksito. Rignald su konosementu di futbòl ta hopi amplio i tin vasto konosementu di tantu e parti práktiko i alabes atministrativo di futbòl. Prueba di esaki ta ku Rignald den pasado tabata asistente di e konosido Ibi Jansen den e ekipo di Jong Holland i a dirigí e kolegialnan di Sithoc. Rignald tabata tambe den diferente direktiva di ekiponan di Futbòl i sigur lo por ta di gran sosten pa progreso di nos futbòl lokal. Su konosementu i abilidat pa pone kos kana sigur lo ta di gran aporte pa e deporte rei futbòl na Kòrsou. Su intenshon pa drenta direktiva di FFK ta netamente pa yuda den e totalidat ku su konosementu i pa pone kosnan kana di bèrdat den e bon kaminda. Pero pa e por logra esaki, Rignald Hato tin mester di e sosten di esnan ku di bèrdat ta kere den un adelanto di nos futbòl i desaroyo di nos futbolistanan i árbitronan. E sosten aki lo brinda Rignald e oportunidat di pone den práktika su konosementu i eksperensia pa loke ta adelanto di futbòl en general. Tur ekipo i tambe árbitronan, por konta ku nan lo haña un representante ku lo mira e desaroyo di futbòl na promé lugá den persona di Rignald Hato. P’esei nos mester sostené Rignald Hato i brind’é e oportunidat di implementá su plan pa un berdadero desaroyo di nos futbòl, árbitro i su futbolistanan en partikular.