WILLEMSTAD – Den un ambiente ameno na e spònser prinsipal i di nòmber ORCO Bank, djaweps e Fundashon Ride for the Roses Curaçao (RFTRC) a tene e tradishonal konferensia di prensa di inisio. Direktiva di e fundashon a divulgá e plannan pa e di diesdos edishon di e evento. E lucha kontra kanser awor ta para sentral atrobe den tur e aktividatnan.
Fundashon Ride for the Roses Curaçao
RFTRC a kuminsá na 2005 ku e meta prinsipal pa atraves di PWF (Prinses Wilhelmina Fonds) sostené pashèntnan di kanser ku mester di esaki urgentemente. Mientrastantu e evento Ride, Swim, Walk & Sail for the Roses a krese bira un di e eventonan mas grandi na Kòrsou. Direktiva di e fundashon ta preparando pa e di diesdos edishon. Rob Blaauw, e promé presidente di e fundashon i ku a para na kuna di e organisashon, na kuminsamentu di e aña aki a pasa batuta pa e presidente nobo Robbin Martina. For di awor señor Martina huntu ku e miembronan di direktiva Benno van Leeuwen, Jim van Luipen, Curd Evertsz, Geert Bijlstra, Raoul Hooftman, Helena Seferina, José Alves i Arthur Rosaria lo hala e garoshi.
E programa
E pelíkula The Walk
E programa pa e diesdos edishon di Ride for the Roses a start dia 1 di òktober ku estreno di e pelíkula The Walk. E parti úniko di e evento tabata ku Kòrsou por a wak e sine aki dia 1 di òktober kaba. Na sobrá di mundu a estrená e pelíkula aki dia 8 di òktober numa. The Walk ta un pelíkula interesante tratando un storia real di e ekilibrista Phillipe Petit, interpretá pa e aktor Joseph Gordon-Levitt ku ta trese un grupo di amigu huntu pa realisá su soño, esta di wanta ekilibrio riba un waya fini di span entre e Twin Towers di World Trade Center na New York. Phillipe Petit a logra su meta tambe na 1974. Pero loke mas ta kapta atenshon ta spesialmente e hopi reto, difikultat i kontratempunan ku e mester superá pa por realisá su soño. Su lucha ta komparabel ku e lucha di hende ku tin kanser i ku tambe mester surpasá tur sorto di barera pa finalmente por dominá e malesa. Ta e similaridat aki a inspirá e fundashon pa organisá esaki komo aktividat pa generá fondo. Esei nan a logra bon mirando ku e sala tabata yen ku tur karchi bendé.
The Uphill Challenge
Pa di dos be ta organisá e Uphill Challenge na Tafelberg i e lo tuma lugá dia 7 di novèmber di 4 or di atardi pa 8 or di anochi. Tradishonalmente e Uphill Challenge semper a tuma lugá un siman promé ku e evento mas grandi, esta e Ride, Swim, Walk i Sail for the Roses. Sinembargo, ya ku e temporada di karnaval otro aña ta kai hopi tempran i pasobra esei ta trese masha hopi aktividat na kuminsamentu di yanüari 2016, a skohe pa hala e Uphill Challenge mas dilanti. ‘The Uphill Challenge’ ta un evento tòp kaminda e koredónan di baiskel mester subi e seru ku subida feros mas tantu biaha posibel, loke ta mustra similaridat ku e lucha kontra kanser. Di pursi, e echo ku kada be dinobo mester kuminsá ku e lucha fuerte pa yega ariba, ta hopi paresido na e lucha difísil pa kura. E diferensia grandi ku e lucha kontra kanser ta ku pa kanser no tin posibilidat pa entrenamentu. Bo no por prepará p’e. Pues, bo no por train pa por lucha kontra kanser. Sinembargo, pa korementu di baiskel, apesar ku bo por train pa esei, ta keda hopi pisá i esei un hende ta disidí i determiná a base di karakter. E karakter ei, e perseveransia ei, esta purba kada be dinobo, esei ta loke ta pisa. Na e Uphill Challenge e idea ta pa e partisipantenan purba generá mas tantu plaka posibel pa nan prestashon deportivo. Nan por laga amigu, dunadó di trabou, famia i kompanianan patrosiná nan pa kada ke ku nan subi e seru. Presidente Robbin Martina a enfatisá ku tur e aktividatnan di RFTRC, ni maske kon bon e ambiente ta, na promé lugá tin komo meta pa rekoudá fondo pa e lucha kontra kanser. Por nota un tendensia, segun Martina, ku kada mes ta duna mas prioridat na e prestashon deportivo, esta kuantu be un hende a logra subi e seru, mas ku na e parti di generá fondo. Dimes e prestashon deportivo ta importante, pero si no konopá esei na rekoudashon di fondo, nos por pèrdè e propósito for di bista. Nos ta organisá e Uphill Challenge hustamente pa generá fondo, segun Martina. Direktiva di e fundashon ta kontentu di por anunsiá ku nan por konta ku Kooyman N.V. pa e edishon aki di Uphill Challenge komo spònser prinsipal. Miembronan di direktiva a aserká e empresa ku mesora a reakshoná entusiasmá, mustrando asina di tin bista pa e nesesidatnan di nos komunidat. Inskripshon pa Uphill Challenge ta posibel atraves di wèpsait di e fundashon RFTRC. For di fin di siman binidero por inskribí tambe na Dasia i Vista Bike. Dia 31 di òktober tin un ‘help desk’ na Kooyman N.V. na Zeelandia pa entrega di e flanèl i un bidòn. Dianan 24 i 31 di òktober tin e posibilidat pa train na Tafelberg.
The Ride, Swim, Walk & Sail for the Roses
E evento ku kua henter e asuntu aki a kuminsá, the Ride, Swim, Walk & Sail for the Roses lo tuma lugá dia 24 di yanüari 2016. Un biaha mas e espektativa ta ku desénas di mil hende lo partisipá na e diferente aktividatnan riba e dia ei. Tur e eventonan konosí kaminda ta kore baiskel, kore na pia, kana i landa puramente pa rekreashon. Den oranan di mardugá algun mil deportista lo ta riba pia for di Awasá i atraves di e brùg chikí Emma òf via e brùg haltu Juliana pa pasa den kayanan di Punda, Pietermaai, Mari Pompun pa Curaçao Seaquarium. Poko mas lat mainta lo kuminsá ku e diferente karedanan di baiskel for di Curaçao Seaquarium pa diferente distansia riba kaya i tambe riba un ruta pa mountainbike. Tur salida i final ta na Curaçao Seaquarium. Banda di tur esei lo tin na Curaçao Beach Boulevard atrobe e tan popular Spinergy. Esaki ta un aktividat deportivo intensivo riba e baiskelnan di spinning kaminda empresanan por kompetí ku otro i kombiná prestashonnan deportivo ku rekoudashon di fondo. E Spinergy ta un evento relativamente nobo, pero for di su introdukshon el a resultá un evento hopi eksitoso: komo evento deportivo i komo akshon pa rekoudá fondo. E organisashon ta mantené e diferente rutanan i lo hasi eksepshon solamente si esaki ta rekerí pa seguridat di tráfiko òf si mester desviá e kanadó i koredónan di baiskel pa motibu ku ta trahando na e kamindanan. E aña binidero lo tin atrobe un edishon di kompetensia pa landadónan den e sekshon Swim for the Roses i aki tambe e organisashon ta spera ku tur e partisipantenan lo laga otronan spònser nan na benefisio di e bon meta. E Sail for di Roses ku na kuminsamentu di e aña aki a tene pa promé biaha, tabata un éksito i awor ta un parti fiho di e aktividatnan ku ta organisá tur aña.
Bou di e kapítulo Sail for the Roses zèildónan lo efektuá un kompetensia benéfiko i lo tin atrobe un parada di barku di bela. Tin mas aktividat riba i na awa den tapara, pero e detayenan lo anunsiá na su debido tempu.
Prinses Wilhelmina Fonds
Aña pasá fundashon Prinses Wilhelmina Fonds (PWF) a selebrá su di 65 aniversario. Dia 16 di novèmber 1949 el a kuminsá. Den e dianan di kambio di trono Su Mahestat Reina Wilhelmina e tempu aya a laga sa ku tabata su deseo pa bini ku yudansa struktural pa kombatí kanser na Kòrsou. Hopi di e pashèntnan ku ta den e lucha kontra e malesa, alabes tin di hiba un lucha finansiero. Despues ku algun dama na Kòrsou a organisá i tene un kolekta, e promé fondonan finansiero a bini disponibel. PWF tabata un realidat i PWF por a kuminsá yuda! Awor, 66 aña despues, ta trata di un organisashon grandi ku un kurason ku ta bati di voluntarionan ku, konforme e pensamentu original i e maneho dia ku a lanta PFW, ta sirbi e komunidat sin interes propio. E voluntarionan ta haña refuerso di 6 kolaborador den servisio fiho i 5 kolaborador partaim ku pa gran parti ta haña nan pago danki na e rekoudashon di Ride for the Roses. E kontribushon finansiero a kontribuí tambe na mas profeshonalisashon di e servisio ku PWF ta brinda. “E pashènt ta para sentral” i “… por kura di kanser kontal ku bo ta na tempu ..” ta djis algun ehèmpel di kon ekstremadamente positivo PWF ta profilá i pa kua e ta para firme. Voluntarionan, direktiva i otro kolaboradornan den PWF ta traha inkansablemente. Na e Fondo Prinsesa Wilhelmina, pa hopi tempu presidí pa Yvonne Verbrugge, resientemente tabatin un kambio di liderato. Anterior Defensor di Pueblo señora Alba Martijn a tuma presidensia di PWF. E tremendo respaldo di e tim di Ride for the Roses, e anual kontribushon finansiero desinteresá di e numeroso patrosinadónan i e partisipashon entusiasmá na e evento aki pa un parti grandi di nos poblashon ta hasi posibel pa PWF por sigui asistí i guia e poblashon durante e periodo di malesa i keda informá pa prevení mas kasonan di malesa.
ORCO Bank
E koperashon for di inisio ku ORCO Bank komo spònser prinsipal a resultá un fórmula eksitoso. No únikamente ORCO Bank a pone fondonan di spònser disponibel, pero pokopoko den banko mes mas i mas empleado a kuminsá amplia e sosten na e eventonan di RFTRC. ORCO Bank ta un partner real den e lucha difísil kontra kanser. Un lucha ku ta ‘deshonesto’, pero ku ta keda bal la pena. Ku ORCO Bank ta kere den ‘..Survivorship..’ ta resaltá for di kampaña pa sirbi komo inspirashon pa otronan, ku a kuminsá kaminda a pone énfasis riba esnan ku a sobreviví e malesa kanser. Pa esaki a diseñá flanèl ku e teksto yamativo ‘… I Survived. I did….’. ORCO Bank a pone e flanèlnan spesial aki disponibel pa esnan ku a eksperensiá e malesa i a sobreviví, pa asina boluntariamente bini dilanti pa inspirá otronan ku ta metí ainda den e lucha. E kampaña ta kompletamente konforme e promoshon for di tantu PWF komo RFTRC, esta ku kanser no ta nifiká e fin. E hendenan a risibí e kampaña hopi bon i den e temporada 2015/2016 ta sigui kuné.
Rekoudashon di fondo i e akshon di ‘Standing Order’
Tur evento di fundashon Ride for the Roses Curaçao tin komo meta pa alkansá mas tantu hende posibel, alkansá mas tantu patrosinadó i donatùr pa por rekoudá mas tantu plaka posibel pa Fondo Prinsesa Wilhelmina por yuda i duna respaldo na esnan ku ta den e lucha kontra kanser. E fundashon RFTRC ta limitá na organisá evento grandi i kolektá plaka ku despues ta na disposishon di PWF. Nan tin planifikashon riba término i un bista kompleto unda e nesesidat ta mas urgente i kaminda esnan ta ku mester di e sosten amplio aki urgentemente. E eventonan ta generá plaka, e donashonnan ta generá plaka i e patrosinio tambe ta generá plaka. Tur aña e fundashon ta konta di por rekoudá sufisiente ku ta tantu nesesario pa yudansa i sosten na e pashèntnan di kanser na Kòrsou. E kampaña ku a lansa anteriormente pa alkansá e asina yamá ‘donatùrnan fiho’, ku atraves di un transferensia fiho tur luna/aña pa e meta bon aki, a resultá un éksito grandi. Bayendo 2015/2016 naturalmente ta kontinuá ku e akshon di Standing Order.
“Nos ta spera ku e liña di kresementu konstante pa loke ta rekoudashon pa Fundashon Ride for the Roses Curaçao lo sigui tambe den e edishon aki. E fondonan tur aña dinobo ta hasi posibel ku Fondo Prinsesa Wilhelmina prepará i implementá gran parti di su plannan. Si nos logra igualá e rekoudashon e aña aki atrobe, nos lo ta kontentu kaba, pasobra lo e nifiká ku kada mes mas hende ta haña un chèns pa gana e bataya deshonesto aki. Nos meta finalmente ta ku hende no tin nodi muri mas di e malesa kanser. Nos tin un kaminda largu di bai ainda, pero nos ta bai p’e”, asina Frans Heiligers a sera finalmente na nòmber di e fundashon.