WILLEMSTAD — Resientemente e selekshon nashonal di futbòl Damas U-20 a biaha pa Haiti pa forma parti di e di dos buèlta pa kualifiká pa e kampionato di region Karibense di CONCACAF. Na Haiti nos selekshon nashonal a kompetí kontra Saint Vincent & the Grenadines, Trinidad & Tobago i Hamaika.
E partidonan tabata amikal i e damanan di U-20 a krese kompará ku nan partisipashon durante e promé buelta. Kontra di Hamaika nan a pèrdè e partido pero e biaha aki ku skor di 2-0 kompará ku 8-0 den e promé buèlta. E prestashon di e tim aki ta mustra ku ta nesesario pa invertí den futbòl di damas na Kòrsou paso nan ánimo i profeshonalidat tabata tremendo. E promé partido kontra Trinidad & Tobago a kuminsá ku un bala fuerte ofer di e kiper di e partido kontrario. E promé mitar a finalisá ku skor di 1-1 miéntras den e di dos mitar e ánimo a baha di moda ku e partido kontrario a probechá di e situashon. E partido kontra di St. Vincent & Grenadines ku tabata tin komo meta pa determiná kua tim ta finalisá na di tres i na di kuater lugá, a tèrminá ku skor di 1-0. Un partido fantástiko ku tur fanátiko presente por a disfrutá di dje. Durante di e último partido aki, e selekshon di Kòrsou a demostrá di ta dominá téknika, tin dominio i posishon di e bala i tin bon komunikashon riba vèlt entre e hungadónan. Tur e kualidatnan aki a pone ku e ekipo a sali viktorioso di e último partido aki.
E resultadonan tabata lo siguiente:
Kòrsou – Trinidad & Tobago 1-4
Kòrsou – Jamaica 0-2
Kòrsou – St, Vincent & the Grenadines 1-0
Hungadónan:
- Diante Scheepers (KOR)
- Kadisha Martina (KOR)
- Kiara Snel (KOR)
- Yasmin Levens (KOR)
- Samantha Statia (KOR)
- Sullyvienne Noten (KOR)
- Shade Desir (KOR)
- Kiara Angelino (NED)
- Sterre Noordhoek (NED)
- Stephany Passial (KOR)
- Ketsiah Nahr (US)
- Jurdine Felix (BON)
- Juvainy Keller (NED)
- Lishanty Guillermo (US)
- Tihainy Nicolaas (BON)
- Tanisha Nicolaas (BON)
- Jerona Rifaela (BON)
- Danique Trenidad (BON)
Head coach: Rudsel Monte
Assistant Coach: Rovian Carolina