WILLEMSTAD — Despues di un éksitoso apertura di Liga MCB Promé Divishon, kaminda e ekipo di Centro Dominguto a gana Jong Colombia ku e skor di 5-0, awor ta toka turno na Liga MCB Segundo Divishon pa ranka sali.
E promé partido di Liga MCB Segundo Divishon ta tuma lugá na tereno di FFK 7or di anochi i e partido aki lo ta entre e ekipo di Fc.Sithoc ku Indekor miéntras e segundo partido lo ta entre U.D Tera Kòrá i Sta Cruz pa 9or di anochi.
E kampionato di Segundo Divishon ta wòrdu hunga manera esun di Promé Divishon i entrada pa e partidonan aki lo ta grátis.
E ekiponan ku ta partisipá na Liga MCB Segundo Divishon ta lo siguiente:
- FcSithoc
- Inter Willemstad
- U.D. Tera Kòrá
- Marquita
- C.H. Mahuma
- Indekor
- De Koning
- New Song
- Sta Cruz
- Atomic
Tur e partidonan aki ta tuma lugá na tereno di FFK. Nos kier a rekòrdá tur fanátiko ku lo bin presensia e weganan aki, ku e úniko entrada pa tereno di FFK ta di e área di parkeo di e skol Emmanuel. Pues tin ku bin di Gosieweg, pasa den banda di e barikada nan, pasa dilanto Hot Wings Café, Robbie’s Lottery etc, subi e área di parkeo di e skol Emmanuel i sigui bin patras na FFK.
Un yamada ta bai na hinter e pueblo di Kòrsou pa asistí na e gran apertura di Liga MCB Segundo Divishon ku ta ranka sali mañan 18 di aprel. Bin pasa un ratu ameno den kompania di bo famia i disfrutá di bo deporte preferí e deporte rei, futbòl!