WILLEMSTAD — Manera ya ta konosí nos selekshon nashonal a klasifiká pa e segundo buèlta di Scotiabank Scotiabank Caribbean Cup i preparashonnan a kuminsá pa loke ta trata e 2 kompromisonan di nos selekshon nashonal.
Nos promé partido lo ta kontra Guyana Ingles djárason, promé di yüni miéntras djamars 7 di yüni nos lo enfrentá U.S. Virgin Islands. Ámbos partido lo tuma lugá aki na Kòrsou den Stadion Ergilio Hato (SDK) pa 8or di anochi.
En konekshon ku e preparashonnan pa nos siguiente kompromisonan di Scotiabank Caribbean Cup, djabièrnè 20 di mei, nos selekshon nashonal lo tin un partido amistoso kontra e ekipo kampion di Terser Divishon aya na Hulanda, R.K.V.V. Westlandia. E partido aki lo tuma lugá na Hulanda, 8or di anochi (ora di Hulanda) riba e tereno di Excelsior Maasluis i lo wòrdu transmití pa Fox Sports. Awe a drenta e notisia ku e hungadó Jarchinio Antonia, kende a debutá ku nos selekshon durante e partidonan di e promé buèlta di Caribbean Cup, tambe lo forma parti di nos selekshon ku lo enfrentá R.K.V.V. Westlandia durante e partido amistoso aki.
E siguiente hungadónan a keda selekshoná pa partisipá na e partido amistoso aki:
- Eloy Room
- Joel Saro
- Shanon Carmelia
- Elson Hooi
- Leandro Bacuna
- Luidjino Hojer
- Gino van Kessel
- Michaël Maria
- Rhu-Endly ‘Cuco’ Martina
- Vidarell ‘Papito’ Merencia
- Rihairo Meulens
- Rangelo Janga
- Ayrton Statie
- Irvingly Eijma
- Rigino Cecilia
- Jason Wall
- Germaine ‘Kemy’ Agustien
- Felicitano Zschusschen
- Gillian Justiana
- Derwin Martina
- Jarchinio Antonia
Despues di e partido amistoso aki, nos hungadónan residensia aya na Hulanda lo yega Kòrsou den e wikènt di 27 di mei pa asina djòin nos hungadónan lokal i sigui ku e training nan pa nos 2 kompromisonan den e segundo buèlta di Scotiabank Caribbean Cup 2016.
Karchinan pa e 2 partidonan aki lo ta optenibel entrante djaluna 23 di mei na FFK bou di ora di ofisina, Botika Mampuritu, Beep Beep, 4th of July Snèk na Barber, pòmp di gasolin Santa Maria i na tur filial di C-Post N.V.
E preisnan pa e diferente paketenan pa sekshonnan ta lo siguiente:
- VIP ta kosta Fl.300,- (inkluso konsumo);
- Bou di tribuna kubrí ta Fl.75,-
- Bou di tribuna kubrí parti Festival Center ta Fl.50,-
- Tribuna no kubrí ta Fl.30,-
- Den e sekshon di tribuna no kubrí mucha te ku 12 aña i 60+ ta paga Fl.20,-
Tene na kuente ku e preisnan aki ta válido pa ámbos partido, pues bo ta kumpra un pakete di karchi pa tur e 2 partidonan aki!
Ainda tin mas suèter di nos selekshon nashonal ku shal optenibel na FFK bou di ora di ofisina na balor di 35 ku 25 florin. Pasa buska di bo pa asina bo bin sostené i apoyá nos hungadónan.
Reservá djárason dia promé di yüni i djamars 7 di yüni pa bo ta den stadion Ergilio Hato komo e number 12 sosteniendo nos selekshon nashonal.