WILLEMSTAD — Tur kos ta kla pa e proyekto “Pedagogia Deportivo” di FDDK ranka sali. Manera ya konosí, e proyekto aki ta enserá ku tres(3) dosente lokal ku tin nivel di HBO lo sigui un trayekto “ Train de Trainer”. E meta prinsipal di e promé parti ta ku den futuro e tres dosentenan lokal aki lo mester bai duna lès na lokalnan den metodologia i pedagogia deportivo. E di dos parti hopi importante ta konsistí di diesdos (12)ku instruktor nivel MBO(CIOS/Sport & Beweging Coordinator) lo sigui un kurso di pedagogia i metodologia deportivo. Esaki ta nifiká e siensia ku e sertifikado di pedagogia aki e instruktornan nivel MBO por asistí den lès di edukashon físiko den skolnan di enseñansa di fundeshi.
Dor di un formashon pedagógiko mas fuerte e futuro dosentenan por logra diferente efekto positivo i korekto riba diferente tereno, entre otro riba aktuashon sosial, salubridat públiko i tambe riba nos prestashon deportivo internashonal en general.
Edukashon físiko ta base di nos deporte, motibu pa kua FDDK ke yuda halsa e nivel di formashon físiko prinsipalmente pa e grupo di enseñansa di fundeshi. Esaki ta e invershon ku FDDK kier logra pa trese un kambio den nos sistema di edukashon físiko. Esaki ta e promé stap ku FDDK kier konsehá pa asina bini ku edukador físiko bèk den nos skolnan di fundeshi ku aktualmente no tin edukador físiko mas. Tur esaki ta yuda kombatí pobresa deportivo, empleo pa hobennan profeshonal den deporte. E proyekto aki ta wòrdu finansiá pa Fundashon Konstruí Awe i Mayan i tambe Uralco.
E kurso lo keda duná dor di dos (2) dosente kubano, kendenan ayera a sera konosí ofisialmente ku un parti di e grupo ku lo forma parti di e proyekto.