WILLEMSTAD — Despues di un tremendo Kampionato aña pasa, FFK i MCB ta anunsiá e gran apertura di Liga MCB Promé Divishon ku lo tuma lugá djadumingu, 5 di febrüari binidero den Stadion Antoine Maduro (SUBT) 6’or di atardi.
E dos ekiponan ku lo mira akshon den e gran apertura di Liga MCB Promé Divishon lo ta e ekipo kampion di Liga MCB Promé Divishon 2016, Centro Dominguito i e ekipo di Inter Willemstad ku a promové di Liga MCB Segundo Divishon pa Liga MCB Promé Divishon.
Entrada pa e partido aki ta kosta 10 florin pa adulto miéntras mucha te ku 12 aña i 60+ ta paga fl.5,-
Awe nochi na FFK a tuma lugá e sorteo kaminda ku e klupnan a skohe nan numerashon riba e skema.
E 10 ekiponan ku lo mira akshon durante Liga MCB Promé Divishon ta:
- Centro Dominguito
- Scherpenheuvel
- Centro Barber
- Jong Holland
- Undeba
- Vesta
- Hubentut Fortuna
- Victory Boys
- SUBT
- Inter Willemstad
Liga MCB Segundo Divishon ta inisiá 13 di febrüari binidero ku 2 tremendo partido na tereno di FFK. E promé enkuentro lo ta entre De Koning ku Sta Cruz 7’or di anochi i despues Indekor lo enfrentá Marquita 9’or di anochi. Tur partido di Liga MCB Segundo Divishon lo tuma lugá na tereno di FFK i e partidonan aki ta kosta solamente fl.2 pa tur hende.
E 10 ekiponan ku lo mira akshon durante Liga MCB Segundo Divishon ta:
- Jong Colombia
- Atomic
- Mahuma
- Sithoc
- U.D. Tera Kòrá
- Sta. Cruz
- Indekor
- New Song
- Marquita
- De Koning
Pues liga MCB Promé i Segundo Divishon ta ranka sali den gran forma!
Un yamada ta bai na hinter e pueblo di Kòrsou pa asistí na e gran apertura di Liga MCB Promé i Segundo Divishon ku ta inisiá 5 i 13 di febrüari próksimo.