WILLEMSTAD — Ayera, djárason 8 di febrüari a tuma lugá e final di basketbòl den ACU Deporte Eskolar den Sala Errol Rooi na SDK.
Den un sala yená ku simpatisante, Oranje School a sa di titular su mes kampion ku un skor di 28 pa 27 riba Fatima College.
Na di 3 lugá a keda Skol Immanuel, miéntras ku e sub-kampion a resultá Fatima College, kua skol tambe a resultá e skol mas disipliná di e torneo. E hóbennan Gabriel Texeira di Fatima College i Ivan Martijn di Oranje School a keda komo e MVPnan di wega.
Direktor di ACU, sr. Ramiro Griffith, e partner prinsipal pa ACU Deporte Eskolar, a hasi entrega di e premionan.
Oranje School titulando komo kampion, ta e skol ku lo representá Kòrsou na weganan interinsular na St. Maarten fin di mart próksimo.
Pabien na tur nos hóbennan ku a dediká simannan largu na e deporte di basket, i un danki na ACU pa e aporte duná na nos hóbennan.