HAPON — E selekshon di Reino a gana su último partido den e di dos buèlta di e Klásiko Mundial di Beisbòl derotando Cuba ku skor di 14-1. Tabata Wladimir Balentien ku tabata tin un dia grandi pa e selekshon di Reino. Balentien a bai di 4-3 ku dos honron i sinku kareda empuha.
Banda di tabata tin un tremendo partido kontra Cuba, Wladimir a keda skohe komo hungadó mas balioso di Grupo E. E pelotero Kurasoleño tabata tin un promedio di .615 ku tres honron i 10 kareda empuha.
Resúmen di e partido, kortesia di MLB.com
Den e partido kontra Cuba Yurendell de Caster i Kalian Sams tambe a konektá honron. de Caster den e partido a bai di 4-2 ku kuater kareda empuha. Miéntras ku Sams tambe a bai di 4-2 ku un kareda empuha.
Apesar di e viktoria e selekshon di Reino mester a warda riba resultado di e partido entre Israel i Hapon pa konfirmá nan pase pa semi-final di e Klásiko Mundial di Beisbòl. Ku e viktoria di Hapon riba Israel esaki a keda konfirmá i e selekshon di Reino lo hunga djaluna próksimo 9’or di anochi ora lokal di Kòrsou kontra e ganadó di Grupo F.
Den e partido di djaluna e ekipo di Reino lo konta ku adishon di un di e mihó closernan di Beisbol Liga Grandi. Durante e partido kontra Cuba, Hensley Meulens a risibí notisia ku Kenley Jansen por hunga ku e selekshon den e siguiente buèlta.
Pa e selekshon di Reino esaki ta e di dos biaha den e Klásiko Mundial ku nan ta yega semi-final. Na 2013 selekshon di Reino a kai kòrtiku kontra Repúblika Dominikana ku skor di 4-1 den semi-final.