WILLEMSTAD — Komo preparashon pa e dos eventonan grandi ku nos selekshon tin na kaminda (Kopa Oro i Kopa Karibe), di 7 pa 9 di yüni, nos hungadónan residensia na Hulanda i tambe nos hungadó lokal Ashar Bernardus ta huntu den un ‘trainings camp’ den e kompleho deportivo di KNVB na Zeist (Hulanda). Durante e ‘trainings camp’ aki nos selekshon ta praktikando bou di guia di nos ‘headcoach’ Sr.Remko Bicentini, riba e parti físiko i mental pa e 2 weganan di fogeo i nos kompromisonan durante e buèlta final di Scotiabank Caribbean Cup ku Gold Cup 2017.
Djadumingu, 11 di yüni próksimo nos hungadónan di Hulanda i esnan di Kòrsou lo sali rumbo pa Canada pa asina enfrentá e selekshon di Canada durante un partido di fogeo dia 13 di yüni. E siguiente dia, 14 di yüni, nos selekshon lo bin Kòrsou pa sigui ku e training nan pa e wega di fogeo kontra Nicaragua.
E partido aki lo tuma lugá djasabra 17 yüni 8’or di anochi den Stadion Antoine Maduro (SUBT).
Karchinan pa e partido aki lo ta optenibel entrante mañan na FFK bou di ora di ofisina, Botika Mampuritu, Beep Beep i pòmp di gasolin Santa Maria.
Dia di wega karchinan lo ta optenibel na e lokèt nan di Stadion Antoine Maduro.
E partido ta kuminsá 8’or di anochi pero portanan ta habri for di 5’or di atardi, yega trempan pa evitá e trafiko!
E preisnan pa e diferente sekshonnan ta lo siguiente:
- Sekshon A; Tribuna pariba di tribuna di honor ta Fl.50,-
- Sekshon B; Tribuna patras di golnan na lado di Maripampoen ta Fl.25,-
- Sekshon C; Tribuna patras di golnan na lado di Willemstad òf Tribuna pabou di tribuna di honor ta Fl.25,-
- Den e sekshon B i C (tribuna patras di golnan) mucha te ku 12 aña i 60+ ta paga Fl.15,-
Un yamada ta bai na henter e pueblo di Kòrsou pa bin na bòshi, bin disfrutá di un tremendo partido! Sali ku bo bandera di Kòrsou, bo t-shirt, bo shal, bin apoyá i sostené nos hungadónan komo e number 12!
Nos ta topa djasabra 17 di yüni, 8:00 PM den Stadion Antoine Maduro!
Banda di e kompromiso grandinan aki di nos selekshon nashonal, nos tin tambe e selekshon U-15 ku ta preparando pa bai saka kara di Kòrsou den temporada di ougùstùs na Merka.
Nos damanan tampoko no ta keda atras, mirando ku e selekshon U-17 i U-20 tambe lo mester bai representá nos na Bermuda ku Trinidad & Tobago den luna di yüli i ougùstùs benidero.
Aparte di tur e selekshon nan aki, FFK ta bezig ku diferente proyekto eskolar den e área di Banda Bou. Sr. Nico Labohm di KNVB huntu ku un grupo di entrenadó lokal a bishitá un total di 4 skol na Banda Bou i a organisá torneo nan chikí di futbòl pa tantu e mucha muhénan i e mucha hòmbernan ku ta bishitá e skolnan aki. E meta di e torneo aki ta pa laga e muchanan aki sera konosí ku e deporte di futbòl i pa lanta e interes den e muchanan aki pa asina esnan ku no ta pertenesé na un ekipo ainda, por forma parti di un ekipo di futbòl.
Pues FFK ta sigui traha duru riba e desaroyo di nos hobén nan den e ámbito di futbòl pa sigui engrandesé e deporte di futbòl aki na Kòrsou!