WILLEMSTAD — Manera ya ta konosí, nos promé kompromiso durante e di 2 buèlta di Nations League lo ta kontra Haiti dia 7 di sèptèmber próksimo pa 6’or di atardi den Stadion Ergilio Hato.
Nos selekshon tin un total di 4 partido ku nan mester hunga, di kua 2 ta na kas i 2 afo. Despues di di e partido kontra Haiti dia 7 di sèptèmber, nos lo biaha bai Haiti kaminda 10 di sèptèmber nos lo bolbe topa Haiti. Den luna di òktober nos ta enfrentá Costa Rica na Costa Rica i 14 di novèmber nos lo hunga na kas kontra Costa Rica pa di 2 biaha.
Despues di a públika e lista di 39 hungadó ku a forma parti di e pre-selekshon, nos entrenadó Sr. Remko Bicentini huntu ku su staf a yega na e lista definitivo di e 23 hungadónan ku lo partisipá na e partidonan aki.
E siguiente hungadónan ta forma parti di nos selekshon ku lo mira akshon durante e segundo buèlta di Nations League;
- Eloy Room (Columbus Crew)
- Zeus de la Paz (Oldham Athletic)
- Shanon ‘Cheese’ Carmelia (Fc Lienden)
- Elson ‘Sontje’ Hooi (Ado Denhaag)
- Leandro Bacuna (Cardiff)
- Reangelo Janga (Fc Astana)
- Jaron Vicario (Fc Dordrecht)
- Brandley Kuwas (Al-Nasr)
- Gevaro Nepomuceno (Oldham Athletic)
- Darryl Lachman (PEC Zwolle)
- Roshon van Eijma (JC Roda)
- Nigel Robertha (Levski Sofia)
- Shermaine Martina (MVV)
- Shermar Martina (MVV)
- Jeremy de Nooijer (Al Shamal)
- Jimbertson Vapor (Scherpenheuvel)
- Jarzinho Pieter (Vesta)
- Juninho Bacuna (Huddersfield Town)
- Jurich Carolina (NAC)
- Gervane Kastaneer (Coventry City)
- Jafar Arias (Fc Emmen)
- Roly Bonevacia (Al-Faisaly)
- Juriën Gaari (RKC)
Mirando ku tin 2 wega ku lo tuma lugá na Kòrsou, e biaha aki tambe nos lo bende karchi pa un wega òf e pakete pa ámbos partido. Karchinan ya ta optenibel na FFK bou di ora di ofisina, Beep Beep, Botika Mampuritu, pòmp di gasolin Sta Maria i na 4th of July snèk na Barber.
E preisnan pa e diferente paketenan pa sekshonnan ta lo siguiente:
- VIP ta kosta Fl.250,- pa ámbos partido i Fl.150,- pa un partido (inkluso konsumo);
- Bou di tribunanan kubrí ta Fl.50,- pa ámbos partido i Fl.30,- pa un partido
- Tribunanan no kubrí ta Fl.30,- pa ámbos partido i Fl.20,- pa un partido
- Mucha te ku 12 aña ku 60+ ta paga Fl. 15,- pa ámbos partido i Fl.10,- pa un partido den sekshon general
E kolekshon nobo di suèter di nos selekshon, ku ta Nike original, a yega FFK!
Aparte di e suèternan nos a risibí ‘jacket’ i karson di ‘traingspak’ largu tantu pa mucha komo pa adulto na diferente ‘size’ i koló.
E preisnan di nos kolekshon nobo di merkansia di nos selekshon nashonal ta lo siguiente;
- Jacket adulto (neon hel) fl.150,-
- Jacket mucha (neon hel) fl.125,-
- Suèter adulto (neon hel òf blou) fl.100,-
- Suèter mucha (neon hel òf blou) fl.85,-
- Karson di ‘trainingspak’ adulto (blou skur) fl.85,-
- Karson di ‘trainingspak’ mucha (blou skur) fl.75,-
- Shal di nos selekshon fl.25,-
E ‘size’ nan di mucha ta kore di XS te L miéntras di adulto ta kuminsá na S i ta yega te XXL.
Tur esaki optenibel na FFK bou di ora di ofisina.
Nos selekshon tin kompromisonan sumamente importante na kaminda i nos hungadónan ta konta ku bo, komo e di 12 hungadó, pa sigui apoyá i sostené nan!