WILLEMSTAD – Despues ku nos selekshon nashonal kategoria U-20 a biaha pa Trinidad & Tobago, 11 di sèptèmber último pa asina representá Kòrsou na e weganan di klasifikashon pa mundial di FIFA U-20 nan lo regresá bek awe 18 di sèptèmber. Lamentablemente nos selekshon no a logra sigui pa e parti final di e weganan aki.
Den nos promé kompromiso kontra Cuba, nos a pèrdè ku e skor mínimo di 1-0. Den e segundo kompromiso nos selekshon a kai vensí kontra Trinidad & Tobago ku e skor di 4-0 i den nos lastu partido, nos selekshon nashonal di U-20 a sa di gana Sürnam ku e skor di 3 pa 2. E golnan di Kòrsou den e partido aki a keda anotá pa Isai Merselia (2x) i Jersylee Riley. Apesar di e triunfo di ayera tòg nos selekshon no a klasifiká pa e siguiente buèlta di e weganan pa kualifikashon di mundial di FIFA di U-20 debí ku nos no ta tin sufisiente punto.
Tabla di posishon:
| WH | WG | WE | WP | GF | GK | Saldo | Punto | ||
| 1 | Trinidad & Tobago | 3 | 2 | 1 | 0 | 7 | 2 | 5 | 7 |
| 2 | Cuba | 3 | 1 | 1 | 1 | 2 | 2 | 0 | 4 |
| 3 | Sürnam | 3 | 1 | 0 | 2 | 4 | 5 | -1 | 3 |
| 4 | Kòrsou | 3 | 1 | 0 | 2 | 3 | 7 | -4 | 3 |
Nos selekshon nashonal di U-20 ta konsistí di un grupo di 20 hungadó ku a wòrdu dirigí pa Sr. Hendry Caldera ku ta e direktor tékniko di e selekshon aki i Sr. Raymond Schotborg ku ta e asistente di e direktor tékniko.
Tambe a biaha huntu ku e selekshon Sr. Sherwin Martina ku ta esun enkargá ku e materialnan di e selekshon, un masahista kual ta Sr. Norwin Allee i e hefe di delegashon ku ta Sr. Urvin Faneijte, miembro di direktiva di FFK.
FFK i MCB, e amigu di deporte kier a gradisí nos selekshon nashonal di U-20 pa e bon trabou ku nan a hasi i kier a enkurashá e hóbennan aki pa nan sigui ku e bon trabou pa asina otro bia nos bai pa e titulo máksimo.