JAMAICA – E selekshon di futbòl di Kòrsou ku ta partisipando na e CFU Men’s Caribbean Cup Tournament na Jamaica a pèrdè nan promé partido ayera. Ayera, Kòrsou a enfrentá Trinidad & Tobago den e promé partido di Kopa Karibe. E selekshon Kurasoleño a sali bai ariba 1-0 den di 18 minüt ku gol di Rihairio Meulens. Shete minüt despues Trinidat ta igualá e partido riba un pinalti i despues ta logra bai ariba 2-1 pa finalisá e promé mitar.
Den di dos mitar Kòrsou ta sali fuerte den atake i ta empatá e partido den di 48 minüt ku gol di Gianluca Maria. Un biaha mas Kòrsou no ta logra mantené e skor i na di 50 minüt Trinidat ta anotá e gol di bai ariba i ala bes e gol di viktoria pa gana Kòrsou ku skor di 3-2. Den e ultimo 15 minüt nan Kòrsou a pone bastante preshon riba e selekshon di Trinidat pero no a logra e gol di empate.
Den e otro partido ku tabata tin Grupo A, e ekipo di French Guiana ta empatá ku Cuba na 1 gol. Awe no tin partido den e Grupo A. E siguiente partido pa e selekshon di Kòrsou ta djaweps 13 di novèmber ora nan enfrentá Cuba.
Tabla di posishon despues di 1 partido:
| Ekipo | PH | G | E | P | GF | GK | GD | Pt |
| Trinidad & Tobago | 1 | 1 | 0 | 0 | 3 | 2 | 1 | 3 |
| Cuba | 1 | 0 | 1 | 0 | 1 | 1 | 0 | 1 |
| French Guiana | 1 | 0 | 1 | 0 | 1 | 1 | 0 | 1 |
| Korsou | 1 | 0 | 0 | 1 | 2 | 3 | -1 | 0 |