WILLEMSTAD — E kampionato di futbol prome divishon Liga MCB a kontinua den wikent tras di lomba ku partidonan na Stadion Antoine Maduro i na Stadion Ergilio Hato. Riba djabierne tabata e ekipo di SUBT ku a enfrenta Scherpenheuvel den Stadion Antione Maduro. Den e partido aki ambos ekipo a anota un gol i asina aki parti e puntonan. Pa SUBT e gol a keda anota pa Elverick Juliana, mientras ku e gol di Scherpenheuvel a keda anota pa Raylison Poulina.
Riba djasabra tabata tin dos partido den Stadion Ergilio Hato. Den e prome partido tabata Victory Boys ku a derota Jong Colombia ku skor di 4-0. Pa Victory Boys tabata Randall Winklaar ku a bai kue hat-trick mientras ku Jean-Louis Fortin a anota e di kuater gol.
Den e di dos partido di djasabra tabata e ekipo di UNDEBA ku a enfrenta Centro Dominguito. Akinan tabata Centro Dominguito ku a sali di e prota grandi derotando UNDEBA ku skor di 2-1. Pa Centro Dominguito ambos gol a keda anota pa Norvianel Naar. E uniko di UNDEBA e keda anota pa Ruensly Leuteria.
Riba djadumingu tabata Centro Barber ku a enfrenta Sithoc den e prome partido. Den e partido aki tabata Centro Barber ku a golia Sithoc ku skor di 8-0. Pa Barber, Greyon Alberto a logra e hat-trick, mientras ku Mirco Colina Jr i Jurensley Martina a anota na dos okashon i Jayven Willems a naota na un okashon.
Den e ultimo partido di wikent e ekipo di Jong Holland a topa ku Hubentut Fortuna. Akinana tabata Jong Holland ku a sali viktorioso ku skor di 1-0. E uniko gol di Jong Holland a keda anota pa Kemoy Reid.
Tabla di posishon despues di tres siman:
| Ekipo | H | G | E | P | GF | GK | GD | Pt. |
| C. Dominguito | 3 | 3 | 0 | 0 | 5 | 2 | 3 | 9 |
| Scherpenheuvel | 3 | 1 | 2 | 0 | 5 | 4 | 1 | 5 |
| Jong Holland | 3 | 1 | 2 | 0 | 2 | 1 | 1 | 5 |
| CSD Barber | 3 | 1 | 1 | 1 | 11 | 4 | 7 | 4 |
| Subt | 3 | 1 | 1 | 1 | 7 | 3 | 4 | 4 |
| Victory Boys | 3 | 1 | 1 | 1 | 5 | 2 | 3 | 4 |
| Undeba | 3 | 1 | 1 | 1 | 5 | 3 | 2 | 4 |
| Hub. Fortuna | 3 | 1 | 0 | 2 | 3 | 3 | 0 | 3 |
| Jong Colombia | 3 | 1 | 0 | 2 | 2 | 8 | -6 | 3 |
| FC Sithoc | 3 | 0 | 0 | 3 | 1 | 16 | -15 | 0 |