WILLEMSTAD — Despues ku nos selekshon di nashonal di dama kategoria U-17 a biaha pa Haiti, 13 di yüli último pa asina representá Kòrsou na e weganan di klasifikashon di e CFU Woman’s U-17 Cup Tournament, nan a regresá bek djasabra 18 di yüli último.
Lamentablemente nos selekshon no a logra sigui pa e di 2 buèlta, esaki despues di a sufri 2 derota i keda eliminá.
Den nos promé kompromiso kontra Bermuda, nos a pèrdè ku e skor di 6-1, e úniko gol di e partido aki a keda anotá pa Lindsey Hart. Den e segundo kompromiso nos selekshon a kai vensí di Haiti, e ekipo anfitrion, ku e skor di 7-1. E úniko gol di Kòrsou den e partido e a keda anotá pa Sjulienne Martina.
Nos pul tabata konsistí di e siguiente paisnan; Dominica, Bermuda, Haiti i Kòrsou pero na último momentu Dominica a retirá i no a partisipá mas na e torneo aki.
Skema di weganan:
| Fecha | Tim A | Tim B | Skor | Lugá | |
| 1 | 15 yüli 15 | Kòrsou | Bermuda | 1-6 | Stade Sylvio Cator
(Haiti) |
| 2 | Haiti | Dominica | Kanselá | ||
| 3 | 17 yüli 15 | Bermuda | Dominica | Kanselá | |
| 4 | Haiti | Kòrsou | 7-1 | ||
| 5 | 19 yüli 15 | Dominica | Kòrsou | Kanselá | |
| 6 | Haiti | Bermuda | 4-0 |
Tabla di posishon:
| WH | WG | WE | WP | GF | GK | Saldo | Punto | ||
| 1 | Haiti | 2 | 2 | 0 | 0 | 11 | 1 | 10 | 6 |
| 2 | Bermuda | 2 | 1 | 0 | 1 | 6 | 4 | 2 | 3 |
| 3 | Kòrsou | 2 | 0 | 0 | 2 | 2 | 13 | -11 | 0 |
Nos selekshon nashonal di dama U-17 tabata konsistí di un grupo di 18 hungadó ku ta wòrdu dirigí pa Sr. Rudsel Monte ku ta e direktor tékniko di e selekshon aki i Sr. Andreas Aitatus ku ta e asistente di e direktor tékniko.
Tambe ta biaha huntu ku e selekshon Sra. Nadine Carolina ku ta esun enkargá ku e materialnan di e selekshon, un masahista kual ta Sra. Laicam How, un lider ku ta Sra. Lorraine Louisa i e hefe di delegashon ku ta Sr. Harry Davelaar, miembro di direktiva di FFK.