WILLEMSTAD — Djadumingu, 25 di òktober próksimo Liga MCB Promé Divishon ta bai yega na su gran final! Tur kos ta kla pa Centro Barber e ekipo kampion di Liga MCB Promé Divishon 2014 enfrentá Centro Dominguito e sup kampionnan di Liga MCB Promé Divishon 2014!
E tremendo partido aki lo kuminsá 7or di anochi i lo tuma lugá den Stadion Ergilio Hato (SDK).
Porta nan lo habri for di 4or di atardi i pa 5or lo tin un partido amistoso hubenil kaminda nos selekshon U-15 kampion di Karibe lo enfrentá Jong Holland.
Animashon pa e gran apertura aki ta na enkargo di e banda musikal Dolce ku lo kuminsá animá for di 6or i durante pousa tambe nan lo entren’é públiko ku nan bon músika.
E árbitro prinsipal pa e enkuentro aki lo ta Juniel Adelina ku lo ser asistí na liña pa Sam Hye i Roebuneck Matilda i e di 4 ofisial lo ta Mike van de Sande.
Liga MCB Promé Divishon 2015 a wòrdu dediká na e siguiente baluartenan:
Romualdo ‘Shon Ma’ Gomez, Ronald ‘Pong’ Martel, Alouisio ‘Jopi’ Rojer, Engelbrecht Schotborgh i Ronaldo Da Sousa ku a hasi hopi pa e deporte rei futbòl. Durante e partido aki nan tambe lo haña un rekonosementu pa nan gran kolaborashon na futbòl.
Entrada adelantá pa e delaster partido di Liga MCB Promé divishon ta kosta Fl.10 pa adulto miéntras mucha te ku 12 aña i 60+ ta paga fl.5.
Karchinan adelantá ta optenibel na e siguiente puntonan di benta:
* FFK (bou di ora di ofisina)
* Beep Beep Rio Canario
* 4th of July snèk na Barber
* Pòmp di gasolin Sta Maria
* Radio Mas 99
* Dominguito Minimarket
* Braas San Lucas
* Kantor Prinsipal di Robbie’s Lottery
Djadumingu 25 di òktober karchinan lo ta optenibel na e lokèt nan di SDK for di mitar di 10 di mainta na balor di fl.12.50 pa adulto i mucha te ku 12 aña i 60+ ta paga fl.5.
FFK i MCB ta invitá hinter e pueblo di Kòrsou pa bin presensia e Gran Final di Liga MCB Promé Divishon. Bin apoyá i sostené bo ekipo preferí, disfrutá di un dushi ambiente i mas ku klaro presensia tremendo partidonan di futbòl.