Selekshon nashonal di futsal rumbo pa Cuba

WILLEMSTAD — Nos selekshon nashonal di futsal ta kla pa saka kara di Kòrsou den e promé buèlta di e CFU Futsal Tournament.

Despues di dianan di trainingnan intensivo i un temporada di preparashon ekstenso, djaluna 18 di yanüari 10:30 AM nos selekshon nashonal di futsal lo biaha pa Cuba pa asina kumpli ku nan kompromisonan den e promé buèlta di e CFU Futsal Tournament ku ta tuma lugá di 22 pa 26 di yanüari próksimo.

Nos grupo, kual ta grupo 1, ta konsistí di e siguiente paisnan; Trinidad & Tobago, Guyana, Antigua & Barbuda i Kòrsou.

Skema di weganan: 

Weganan Final:

E 2 ganadónan di e promé buèlta lo sigui outomátikamente pa e segundo buèlta ku lo tuma lugá di 8 pa 15 di mei na Costa Rica, miéntras e finalista ganadó ta bira e di 3 pais ku lo klasifiká pa e siguiente buèlta.

Nos selekshon nashonal di futsal ta konsistí di un grupo di 10 hungadó ku ta wòrdu dirigí pa Sr. Kenneth ‘Bob’ Bernabela ku ta e direktor tékniko di e selekshon aki i Sr. Jubinald Martis ku ta e asistente di e direktor tékniko.

Tambe ta biaha huntu ku e selekshon Sr. Luthson Reenis ku ta esun enkargá ku e materialnan di e selekshon, un fisioterapista kual ta Sr. Sander Schelling i e hefe di delegashon ku ta Sr. Alexander Molina, miembro di direktiva di FFK.

Nos selekshon ta konsistí di e siguiente hungadónan:

1. Ashar Bernardus
2. Gino Costina
3. Shurwendel Roosje
4. Everon Espacia
5. Jarzinho Pieter
6. Rudrick Pop
7. Germaine Geerman
8. Jean Pauletta
9. Stallone Isenia
10. Reginald Martina