E motibu prinsipal dikon Kòrsou no ta yega mundial Brazil 2014!

Deporte Awe! a tuma nota di hopi komentario i te asta desgusto serka hopi hende despues ku nos selekshon nashonal di futbòl a pèrdè nan promé dos wega nan di klasifikashon pa mundial Brazil 2014. E dos wega pèrdí nan aki ta hasi hopi doló, teniendo na kuenta ku práktikamente Kòrsou a laga dos partido slep bai. Den tur e dos partido nan aki Kòrsou a kue bentaha promé i den e partido kontra Haiti, Kòrsou tabata ariba na dos okashon. E echo ku Kòrsou no por a mantené su bentaha ta kousa hopi doló, pa Deporte Awe! e pió kos ku por a sosodé ta ku Kòrsou ta sali for di e dos partido nan aki ku un empate.

Ounke e dos wega pèrdí nan aki ta hasi doló, Deporte Awe! mester rekonosé ku esaki no tabata un sorpresa pa Deporte Awe!. Dikon esaki no tabata un sorpresa pa Deporte Awe!? Algu mas ku un luna pasa Deporte Awe! a analisá henter e struktura di klasifikashon pa mundial Brazil 2014 i yega na e konklushon ku e struktura aktual di klasifikashon pa mundial den CONCACAF ta faboresé ekipo nan ku ta mihó di renk i desfaboresé ekipo nan ku ta di renk mas malu.

CONCACAF tin 35 federashon ku ta forma parti di dje i ku ta den kontienda pa bai mundial Brazil 2014. Promé ku e loteria a tuma lugá dia 30 yüli 2011, e 10 ekipo nan ku ta di renk mas malu den CONCACAF a hunga kontra otro. E sinku ganadó nan di e partido nan aki a pasa pa forma parti di e loteria huntu ku e otro 19 ekipo nan ku ta di renk mas malu i ku no ta forma parti di e 10 nan ku a hunga kaba.

Kiko FIFA ta hasi e ora ey? E sinku ganadó nan di e partido nan ku a tuma lugá promé ku e loteria ta bai den un pochi huntu ku e ekipo ku ta di renk mas malu di e 19 ekipo nan restante. E seis ekipo nan aki ta e promé nan ku ta wòrdu di lòt i nan ta number kuater den kada grupo. Den e pochi dos bo ta haña e seis ekipo nan ku ta di renk mas malu di e 18 ekipo nan restante. E seis ekipo nan aki ta wòrdu di lòt number dos i nan ta number tres den kada grupo. Den pochi tres bo ta haña e seis ekipo nan ku ta di renk mas malu di e 12 ekipo nan restante. E ekipo nan aki ta wòrdu di lòt number tres i nan ta number dos den kada grupo. Por último a keda seis ekipo ku ta wòrdu di lòt último i nan ta number 1 den kada grupo. Den otro palabra e sistema ta diseñá pa e ekipo nan mas malu hunga kontra e ekipo nan mas mihó.

E ganadó di kada grupo ta pasa pa e siguiente buèlta. Kiko FIFA ta hasi den e buèlta aki? Den e buèlta aki FIFA ta dividí e ekipo nan den tres grupo di kuater ekipo kada un. Pa hasi e repartishon aki atrobe FIFA ta parti e ekipo nan den pochi. Den pochi unu bo ta haña e tres ekipo nan mihó di renk pa FIFA den CONCACAF kual ta Merka, Mexico i Hondúras, nan ta wòrdu di lòt último i ta bin na kabes di kada grupo. Den pochi dos  bo ta haña e di kuater, di sinku i di seis ekipo nan mihó di renk den CONCACAF, kual ta Jamaica, Costa Rica i Cuba. E ekipo nan den pochi dos ta wòrdu di lòt number dos i konsekuentemente ta number dos den kada grupo. Por último den pochi tres bo ta haña e seis ganadó nan di e buèlta anterior, ku en realidat ta e seis ekipo ku ta di renk mas malu ku e keda den e kompetensia. Nan ta wòrdu di lòt promé i ta number tres i kuater den kada grupo. Un biaha mas bo ta haña un sistema diseñá pa e ekipo nan mas malu hunga kontra e ekipo nan mas mihó.

Tantu e ganadó komo e promé finalista di kada grupo ta pasa pa e siguiente buèlta. Den e buèlta aki ta bai tin un grupo di seis ekipo. E tres ekipo nan ku puntuashon mas haltu ta pasa pa Brazil 2014, miéntras ku e di kuater ekipo ku puntuashon mas haltu mester hunga den e playoff inter-kontinental.

Deporte Awe! ta reiterá un biaha mas ku e motibu prinsipal ku Kòrsou lo no yega mundial Brazil 2014 no ta pa falta di hungadó i/òf talento, tampoko pa falta di Direktor Tékniko i tampoko no ta pa falta di Federashon Futbòl Kòrsou (FFK). E problema ku Kòrsou tin i mayoria pais den CONCACAF ta a manera ku FIFA ta organisá e kompetensia klasifikatorio pa mundial den CONCACAF.

Deporte Awe! mester menshoná si ku e motibu prinsipal aki no ta kita for di e echo ku mester bin un otro maneho i/òf vishon pa loke ta trata nos futbòl lokal i internashonal. Deporte Awe! ta di pensamentu ku aunke mundial di futbòl ta algu fenomenal pa Kòrsou na e momentu nan aki no ta algu realístiko pa nos mek riba dje. Deporte Awe! ta di pensamentu ku FFK mester kuminsá mek riba kompetensia nan internashonal den nos region tantu na nivel di klup komo selekshon nashonal i di aki sigui krese. Den futuro Deporte Awe! lo amplia mas riba e punto aki.