WILLEMSTAD — Nos selekshon nashonal a klasifiká pa e siguiente buèlta di Caribbean Cup 2016. Esaki despues di e resultado di e partido entre Republika Dominikana i Barbados ku a tuma lugá dia 29 di mart na Republika Dominikana. E selekshon Dominikano a gana e wega aki ku e skor di 2-0 i a eliminá Barbados. Kòrsou despues di a sufri un derota kontra Barbados ku e skor di 1-0 i logra un viktoria kontra Republika Dominikana di 2-1 ku golnan anotá pa Gino van Kessel i Felitciano Zschusschen, ta sigui pa e segundo buèlta di Caribbean Cup ku lo tuma lugá den kuminsamentu di yüni 2016.
Tabla di posishon:
| WH | WG | WE | WP | Punto | GF | GK | Saldo | |
|---|---|---|---|---|---|---|---|---|
| Republika Dominikana | 2 | 1 | 0 | 1 | 3 | 3 | 2 | 1 |
| Kòrsou | 2 | 1 | 0 | 1 | 3 | 2 | 2 | 0 |
| Barbados | 2 | 1 | 0 | 1 | 3 | 1 | 2 | -1 |
Durante un sorteo lo bira konosí kua ta e grupo ku nos lo ta den e siguiente buèlta di Caribbean Cup na yüni próksimo.
Federashon di Futbòl Kòrsou (FFK) i nos selekshon nashonal di futbòl bou di guia di Patrick Kluivert ta yama danki na pueblo di Kòrsou i prinsipalmente na e fanátikonan ku tabata presente den Stadion Ergilio Hato pa e sosten ku nos a risibí pa e wega kontra Sto.Domingo djasabra último. Un danki spesial tambe ta bai na tur medio di komunikashon pa nan kobertura durante e partidonan aki, danki na tur spònser, instansianan i un i tur ku a kolaborá pa un anochi eksitoso.
FFK i MCB kier a yama nos selekshon nashonal pabien pa nan logro i danki pa un biaha mas a saka kara di nos dushi isla.