WILLEMSTAD — Wikènt tras di lomba weganan di e torneo 100 aña MCB patrosiná pa Maduro & Curiel’s Bank a kontinuá ku weganan desisivo pa wak ken ta e ekiponan ku lo pasa pa final. Djasabra tabata e ekiponan di Senior league ku mester a lucha pa por keda den e torneo.
Despues di un áwaseru fuerte djabièrnè tabatin duda ku weganan lo a siguí djasabra pero manera ta kustumbrá kaba di e organisadónan wega ta para na vèlt. For di djabièrnè a sòru pa e partinan di tera na Tio Daou ta tapa i pa djasabra despues di algun trabou riba e vèlt weganan por a sigui.
Den e promé partido e ekipo di Montaña Ariba a sa di gana di e ekipo di St. Michiel ku skor di 10-4 i keda na bida. Den e di dos partido e kampionnan di aña pasa Sta. Rosa ta pasa fásil riba Brievengat ku skor di 11-1. E di tres partido a bai entre e number 1 di temporada regular, Van Engelen, kontra e number 2, Marchena. E partido aki tabata bon bringa i tabata 0-0 te den bòm di 4 kaminda áwaseru a kai bastante fuerte i mester a para e wega un ratu. Aki mester duna un elogio na tur dos ekipo ku a reakshoná lihé i e muchanan mes a kore sali for di “dugout” i tapa e vèlt.
Huntu ku e kuerpo di umpire e komishon organisadó a tuma e desishon pa warda 30 minüt i wak kon e vèlt ta seka. Mester bisa akinan ku e sistema di drain pa e awa bai di Tio Daou a hasi su trabou i despues di a drecha vèlt bek e wega por a sigui atrobe. Wega a keda kayente i despues ku kada ekipo a anotá un kareda mester a bai “tie-break rule” i den un final dramátiko ku e último out di e partido na home plate e ekipo di Marchena a sali di porta grandi ganando ku skor di 2-1 i asina pasa mesora pe final di divishon Senior.
E delaster partidó di dia a bai entre e 2 promé ganadornan di dia, Montaña Ariba kontra Sta. Rosa. E partido aki tabata bon bringa inisialmente pero despues Sta. Rosa a tuma kòntròl di e wega i a sa di gana ku skor di 8-1 i keda na bida un dia mas.
Djadumingu kosnan a sigui kayente i den e divishon Junior e ekipo di Marchena a sigui lusi bon i ta gana di Montaña Abou ku skor di 9-4. Den e di dos partido Trai Seru ta gana pèrtá di Brievengat ku skor di 7-6. E di tres partido tabata unu di Senior league pa determiná e otro finalista i akinan den un partido kaminda Sta. Rosa a sali bai duru bai para, Van Engelen a bringa bini bek pero keda nèt kòrtiku i ta pèrdè ku skor di 6-4. Asin’aki Sta. Rosa ta pasa pa e final kontra Marchena pa bai purba defendé nan titulo di aña pasa. Den e último partido pa determiná e finalista di Junior tabatin un fiesta di kareda i despues di a sali kai atras 7-0 den promé inning, Trai Seru a logra bini bek i kue bentaha. Trai Seru ta yega e último inning dilanti ku diferensia di 7 kareda pero no por wanta esaki i Marchena ta empatá i bai dilanti pa 1 kareda. Serando e inning Trai Seru ta logra skor 2 pa laga Marchena den tereno ku skor di 18-17. E ekipo di Marchena ta logra kaba na mesun posishon ku aña pasa ora nan keda te den e último tres ekiponan. Trai Seru ta pasa pe e gran final di Junior kontra e ekipo di St. Maria. E final lo ta un “best of three” i nan lo kuminsá djabièrnè dia 16 di desèmber na Tio Daou pa 6or di atardi ku e partido di Junior i despues pa 830 esun di Senior. Djasabra dia 17 e weganan ta kontinuá for di 9or di mainta i e torneo lo kaba djasabra mes. Esaki ta nifiká ku si e serie(nan) empatá djasabra e timnan lo tin ku hunga un “double header”.
Kòrda ku por sigui tur e weganan tambe via di gamechanger òf via di e scoreboard riba e wepsite: eteamz.com/100anjamcb
Fanátiko nan di baseball di mucha ta invitá pa bini Tio Daou i animá nos muchanan den e último weganan di aña 2016 djabièrnè dia 16 i djasabra dia 17 di desèmber awor.