Korsou U-20 A Terminá Na Terser Puesto Den E Concacaf U-20 Championship Na Tampa

TAMPA — Despues ku 31 di òktober último, nos selekshon nashonal kategoria U-20 a biaha pa Tampa pa asina kumpli ku nan kompromisonan den e C, awe 11 di novèmber den oranan di anochi nos selekshon a regresá despues di e keda na terser puesto. Lamentabelmente nos no a logra klasifiká pa e siguiente buèlta.

Na tur ta tin 35 pais ku a kompetí den e kampionato aki i nos tabata den pul F huntu ku El Salvador, Guatemala, Guyana i Cayman Islands.

Resultado di nos weganan:

Durante nos promé enkuentro kontra El Salvador nos a kai vensí i a pèrdè ku e skor pèrtá di 2 pa 1. Luchenthly Vrutaal tabata esun ku a anotá e úniko gol pa Kòrsou. Den nos segundo partido kontra Guatemala, nan a sa di gana nos 3-1 i e gol di nos tabata un outo gol.

Durante nos terser partido nos a sali viktorioso i a gana Guyana ku e skor di 4-3 ku golnan di Jaron Vicario, Meghan Valpoort, Carolith Fermina ku un outogol. Den nos último partido kontra Cayman Island nos a gana ku skor di 4-2. Jaron Vicario, Gianni van de Pitte (2x) ku Giorney Royer ta esnan ku a anotá e golnan ku a hiba nos na e viktoria.

Ku e resultadonan aki nos a terminá na terser lugá ku un total di 6 punto, 10 gol na fabor i 10 gol kontra. Konsekuentemente nos no a logra klasifiká pa siguiente buèlta di e torneo aki.

Nos selekshon nashonal kategoria U-20 a konsistí di un grupo di 20 hungadó, di kua mitar ta hungadónan áktivo den nos Kampionato Hubenil i e otro mitar ta nos hungadónan residensiá aya na Hulanda. Nos selekshon a wòrdu dirigí pa Sr. Ludwig Alberto ku ta e entrenadó di e selekshon aki i Sr. Gersinio Constancia ku ta e asistente di e entrenadó.

Tambe a biaha huntu ku e selekshon Sr. Sherwin Inesia ku ta e masahista di e selekshon, Sr. Roderick Rojer ku ta esun enkargá ku e materialnan, Sr. Marcelo Pisas ku ta entrenadó di e porteronan, Sr. Ramfis Filet ku ta e dòkter di nos selekshon i e hefe di delegashon ku tabata Sr. Shaheen Elhage, miembro di direktiva di FFK.

Nos selekshon ta konsistí di e siguiente hungadónan:

1. Kevin Juliana
2. Danel Rosa
3. Quinton Burk
4. Ayodele Kwidama
5. Dion Hooi
6. Roderick Bolijn
7. Giorney Royer
8. Jonathan Libania
9. Meghan Valpoort
10. Jaron Vicario
11. Quincy Does
12. Sugently Martha
13. Luchenthly Vrutaal
14. Sharrion Pietersz
15. Rogyaer Anita
16. Gianni Van de Pitte
17. Nixon Buntin
18. Quintin Rustveld
19. Carolith Fermina
20. Williaam Plaate