WILLEMSTAD — Pa medio di e komunikado aki FFK ta avisá ku dia 31 di yüli 2022, FFK su kolaborashon ku Sr. Art Langeler i Sr. Guus Hiddink ku tabata e direktor tékniko i e entrenadó di nos selekshon nashonal, a terminá.
FFK ta gradisí tantu Sr. Langeler komo Sr. Hiddink pa nan trabou i esfuersonan hasí pa futbol di Kòrsou i ta deseá nan éksito pa futuro.
WILLEMSTAD — Awe diahuebs Federashon Biyar Korsou ta ranka sali ku su Kampionato Nashonal di Ekipo Bola 8. E evento lo konta ku partisipashon di 4 ekipo , Curadise , Maishi Tigers , Breaking Bad y The Biesheuvel Friends. Na House of Billiard Play den Landhuis Granbeeuw tur e weganan lo tuma lugar solamente riba tur diahuebs pa 8or di anochi. Un invitashon ta bai na tur fanatiko pa bin apoya bo ekipo faborito. E prome enkuentronan lo ta Maishi Tigers vs The Biesheuvel Friends y Breaking Bad vs Curadise. E evento aki ta patrosina pa Montana Bierhuis.
WILLEMSTAD — Direktiva di Swim Club Orca Curaçao ta partisipá ku djasabra dia 06 di ougùstùs 2022 lo kuminsá ku kurso pa muchanan di 3 i 4 aña familiarisá (kustumá) ku awa. E kurso tin un durashon di tres (3) luna i dos (2) biaha pa siman tin treinen. Riba djasabra treinen ta di 16:00 or pa 17:00 or i djadumingu treinen ta di 10:00 or pa 11:00 or na Pisina Bennie Leito.
Meta di e kurso aki ta pa e muchanan di 3 i 4 aña familiarisá/kustumá ku awa, di moda ku nan por manehá fásil den awa. Ora nan tin 5 aña nan por partisipá na e kurso pa diploma “A” sin problema. Na final di e kurso lo tin un tèst i e muchanan ku partisipá na e tèst lo risibí un sertifikado.
Kabando e kurso aki no ta nifiká ku e mucha sa landa, sino ku e por defendé su mes. Semper e mester tin “gordel”/vèst bistí i e mester ta huntu ku su mayor ora e ta kantu di un pisina òf laman.
E kurso ta kosta fl. 60,00 pa luna.
Pa inskripshon i mas informashon por WhatsApp sra. Norin Bolhuis na number di telefòn: +5999 5614062.
Tuma bon nota ku, No por inskribí na Pisina dia lès kuminsá. Inskripshon ta solamente via di e WhatsApp ariba menshoná.
E kantidat di lugá pa e kurso aki ta limitá.
WILLEMSTAD — Djaduming awor 24 di yuli 2022 Federashon Deporte i Olímpiko Kòrsou (FDOK) ta bai tin su apertura huntu ku tur e federashonnan ku ta partisipa na e promè SIMAN OLIMPIKO KORSOU di 24 pa 31 di yüli 2022.
Un total di 16 federashon miembro di FDOK lo partisipa na e Siman Olímpiko Kòrsou kual ta: Atletismo, Baseball, Basketbòl, Biyar, Futbòl ,Futbòl di Sala, , Dam, Domino, Yudo, Karate, Sailing, Sòftbòl, Taekwondo, Tennis di Mesa, Vòlibòl i Natashon.
Tur federahon i nan deportistanan lo reuni na Buurcentrum Sentro di Bario Brievengat pa 12.30 or kaminda huntu ku Brassband PCD lo kana den un desfile bai velt di Sam Buntin Ballpark.
E siman Olímpiko Kòrsou lo konsistí di kompetensianan den hopi ramonan di deporte. Meta di e evento aki ta pa stimulá i motivá nos hende nan partisipa en general na deporte kompetitivo. Alabes sera e temporada di vakashon aki ku un grandioso siman di deporte.Tambe pa gradisi nos deportistanan ku a saka kara di Kòrsou engrande.
Esaki lo sosode den koperashon ku Fundashon Desaroyo Deportivo Kòrsou (FDDK); parti mainta i merdia FDDK lo tin su aktividatnan pa hobenan (plan di vakansi) i parti anochi FDOK lo tin e parti kompetitivo dor di su diferente ramonan di deporte afilia na FDOK.
Lo trata pa por tin transporte pa públiko kada ora di 24 di yüli pa 31 di yüli 2022 ku ta sali di Otrobanda pa SDK.
Dia 31 di yüli FDOK ta bai klousura su selebrashon Siman Olímpiko en grande. FDOK ta bai organisá su di 5 kaminata riba djadumingu 31 di yúli pa 6’ or di mainta ku ta sali for di e parkeerplaats di SDK na Brievengat i regresa SDK bek.
E lema di e kaminata ta: “BAN SOSTENE DEPORTE”.
E kaminata aki ta pa pueblo di Kòrsou en general hunto ku FDOK su miembronan di tur e federashonnan afiliá na FDOK i mayornan di nos deportistanan. Karchi pa e kaminata ta optenibel na kantor di FDOK; situá na Roodeweg 92A – edifisio blou ku blanku – 2e piso t/o Colon na Otrobanda. Tambe por haña karchi serka tur nos federashonnan miembro. Preis pa e kaminata ta kosta fl. 17.50.
Dia 31 di yüli 2022 anochi FDOK lo klousura e SIMAN OLÍMPIKO KÒRSOU ku Broche di Oro ku un partido di Beisbol di 2 selekshon ku ta tuma lugà na stadion Johnny Vrutaal (Rif ).
FDOK ta hasi un apelashon na pueblo di Kòrsou pa partisipá na e kaminata aki di manera bo por kontribuí na moveshon deportivo ku tin komo lema : “BAN SOSTENE DEPORTE”. E Siman Olímpiko Kòrsou di deporte aki ta net na klousura di temporada di vakashon eskolar.
Bini uni bini tur bin sostene nos deportistanan i laga e muchanan sera nan vakashon mirando i hasiendo deporte.
Alabes ta dia ku lo homenagia nos deportistanan ku a saka kara di Kòrsou en grande e aña aki.
PUNTA CANA (R.D.) — E ekipo di Liga Pabou Little League den gran forma ta para Cuba ku tabata invikto den e kompetensia di Little League Seri di Karibe na Punta Cana. Den e gran final e ekipo di Kòrsou despues di tabata atras 1 pa 0 finalmente ta sali di porta grandi ganando ku e skor di 3 pa 1 i asina tambe titulá kampion di Karibe i tan bai representá Karibe den e Seri Mundial di Little League na Williamsport.
WILLEMSTAD — Den kuadro di Dia di Emansipashon , Fundashon Museo Tula ta organisá un enkuentro hopi signifikativo ku mester a tuma lugá di promé di yüli na mangasina di Lanthùis Kenepa (Museo Tula) ku yama “ Duna Bos na nos ansestronan, kibrando silensio”.
Debí na inseguridat pa ku e mal tempu ku a premirá djárason siman pasa mester a posponé e aktividat aki.
Fundashon Museo Tula pa medio di e komunikado aki ke informá na tur invitado i na pueblo en general ku enkuentro importante aki lo sigui djasabra awor dia 9 di yüli di 10.00 di mainta pa 01:00 di mèrdia na Lanthùis Kenepa.
Siman pasá dia promé di yüli ta un dia ku a laga un marka importante den e proseso di emansipashon di nos pueblo ora ku a tuma lugá e reunion importante di Parlamento di Kòrsou kaminda a invitá Plataforma di Sklabitut i Herensia di Sklabitut pa duna un presentashon di herensia di sklabitut den kuadro di e proseso di emansipashon.
E importansia di e enkuentro aki ta ku huntu ku integrantenan di Plataforma di Sklabitut i Herensia di Sklabitut i representantenan di pueblo ku seriedat a analisá e problema di herensia di sklabitut i su konsekuensia pa nos komunidat ku te awe ta hopi visibel . Ku esaki nan a alsa konsiensia bou di pueblo ku promé di yüli ku nos ta selebrá ta danki na lucha balente hiba pa nos ansestronan ku a habri e kaminda largu di emansipashon. Pero konsiente di e hecho ku ainda tin mas pa bai pa kibra e restonan di desigualdat ekonómiko i sosial eksistente ku a keda persiguié hopi yu di Kòrsou komo herensia di sklabitut. Parlamentu i Fundashon Konsenshi Históriko ku esaki a hisa pone riba mesa e tres enkargo pa logra den e di 160 aña di abolishon di sklabitut. Rekonosé Diskulpá i Ripará. Tarea ta na pueblo di Kòrsou pa ku yudansa di Komishon Nashonal i Gobièrnu mobilisá pa bai para tras di e enkargo aki huntu i asina duna forsa na e enkargo di parlamentu . Ku esaki pueblo di Kòrsou lo pone un base fuerte pa awor yega na emansipashon polítiko kompleto di nos pueblo; loke ta anhelo di tur pueblo ku ta stima su libertat.
Fundashon Museo Tula dia 9 di yüli awor ta organisá e aktividat ku ta duna inisio na preparashon di e di 160 aña ku un akto di hopi nifikashon i ku mester ta e komienso komo ku ta ei tur kos a kuminsá.
E dia aki lo gradisí nos ansestronan pa tur loke nan mester a pasa aden, nan sanger , sodó i lágrima ku a kore i tòg mantené nan dignidat komo hende i nan determinashon di ke ta liber. Yama nan danki pa e diferente luchanan ku nan a hiba pa otro aña nos por selebrá 160 aña di libertat.
E akto simbóliko lo ta den forma di yama nòmber di e 140 personanan ku pa promé biaha por a gosa di e derecho di ta siudadano muhé i hòmber ku nòmber i fam. Liberá for di kadenanan di sklabitut dia promé di yüli.
E mainta lo kontené ademas diskurso di Minister (di Enseñansa, Siensia, Kultura i deporte) , kanto , baile , poesia i testimonio di hóbennan di awe.
E aktividat di djasabra 9 yüli na Lanthùis Kenepa ta grátis. Pueblo ta bon bini. Por reservá via WhatsApp (+5999) 686-2255.
WILLEMSTAD — Riba invitashon di nos ‘hermana isla’ Aruba, nos selekshon femenino kategoria U-17 lo biaha pa Aruba djabièrnè, 8 di yüli 2022 pa partisipá na 2 partido amistoso. Esaki den kuadro di Aruba su partisipashon na e CONCACAF Girl’s U-15 Championship. Nos selekshon femenino U-17 a aseptá e invitashon aki ku lo fungi komo práktika pa tantu Aruba su selekshon U-15 komo nos selekshon U-17 pa nos kompromisonan den futuro.
E promé partido lo tuma lugá djasabra 9 di yüli 8’or di anochi miéntras e segundo partido lo tuma lugá 10 di yüli 3’or di atardi. Ámbos partido lo ta den Centro Deportivo Guillermo Prospero Trinidad aya na Aruba. Despues di e partidonan aki nos selekson lo regresá djaluna 11 di yüli 2022 repartí den 2 grupo.
Nos selekshon femenino kategoria U-17 ya tin algun dia ta prepará pa nan partidonan i un grupo di 18 hungadó ta forma parti di nos selekshon.
E selekshon ta wòrdu dirigí pa Sr. Heinrich Roojer ku ta wòrdu asistí pa Sra. Sterre Noordhoek komo asistente tékniko. Sra. Denice Linger Berggraaf ta e masahista miéntras Sra. Nadine Carolina ta esun enkargá ku e materialnan di nos selekshon.
E hefe di delegashon ta Sra. Fabi Constansia, miembro di direktiva di FFK.
E siguiente hungadónan ta forma parti di e selekshon ku lo bai Aruba;
Preparashonnan ta kanando den ful swing pa nos damanan ku lo biaha próksimamente pa Aruba pa 2 kompromiso amistoso.
WILLEMSTAD — Komo preparashon pa nos partisipashon na e CFU Boys’ Under 14 Challenge Series 2022, Kòrsou, Aruba i Boneiru a yega na e idea pa organisá algun partido di fogeo entre e 3 islanan ABC aki na Kòrsou. E partidonan aki a tuma lugá di 7 pa 10 di yüli 2022, na Stadion Rignaal ‘Jean’ Francisca.
E torneo aki sigur tabata unu eksitoso ku nos por siña hopi di dje pa sigui prepará pa nos próksimo kompromisonan pa e CFU Boys’ Under 14 Challenge Series 2022. Tur ekipo a duna un bon bataya i a duna tur ku tin pa mustra kiko nan tin aden.
Resultado di e partidonan;
| Fecha | Skor | Tim di kas | Bishitante | Stadion |
| 7 yüli 2022 | 0-0 | Aruba | Boneiru | RJF |
| 8 yüli 2022 | 1-2 | Boneiru | Kòrsou | |
| 9 yüli 2022 | 0-1 | Boneiru | Aruba | |
| 10 yüli 2022 | 3-4 | Kòrsou | Aruba |
Kòrsou su tim a konsistí di 22 hungadó i un staf tékniko di 7 persona. E hungadónan aki ta parti di nos preselekshon ku ta preparando pa nos kompromisonan na e CFU Boys’ Under 14 Challenge Series 2022 ku lo tuma lugá di 13 pa 21 di ougùstùs próksimo na Repúblika Dominikana.
Danki na tur ku a asistí i presensiá e partidonan aki. Nos ekipo lo siguí prepará pa duna un bon presentashon durante e CFU Boys’ Under 14 Challenge Series 2022!
WILLEMSTAD — Den ultimo siman di vakashon Federashon Deporte i Olímpiko Kòrsou ta bai organisá pa di promé bia su SIMAN OLIMPIKO KORSOU di 24 pa 31 di yüli 2022.
E siman Olímpiko Kòrsou lo konsistí di kompetensianan den hopi ramonan di deporte. Meta di e evento aki ta pa stimulá i motivá nos hende nan partisipa en general na deporte kompetitivo. Alabes sera e temporada di vakashon aki ku un grandioso siman di deporte.
Esaki lo sosode den koperashon ku Fundashon Desaroyo Deportivo Kòrsou (FDDK); parti mainta i merdia FDDK lo tin su aktividatnan pa hobenan (plan di vakansi) i parti anochi FDOK lo tin e parti kompetitivo dor di su diferente ramonan di deporte afilia na FDOK.
Lo trata pa por tin transporte pa públiko kada ora di 24 di yüli pa 31 di yüli 2022 ku ta sali di Otrobanda pa SDK.
Un total di 17 federashon miembro di FDOK lo partisipa na e Siman Olímpiko Kòrsou kual ta: Atletismo, Baseball, Basketbòl, Biyar, Boxeo, Futbòl di Sala, Futbòl, Dam, Domino, Yudo, Karate, Sailing, Sòftbòl, Taekwondo, Tennis di Mesa, Vòlibòl i Natashon.
Dia 31 di yüli FDOK ta bai klousura su selebrashon Siman Olímpiko Kòrsou ku e.o. su di sinku (5) kaminata anual. Despues di 2 aña pa motibu COVID -19 esaki a ser kansela, FDOK ta bai organisá un tremendo kaminata riba djadumingu dia 31 di yúli próksimo pa 6 or di mainta ku ta sali na e parkeerplaats di SDK na Brievengat i regresa SDK bek. E lema di e kaminata ta: “BAN SOSTENE DEPORTE”.
E kaminata aki ta pa pueblo di Kòrsou en general hunto ku FDOK su miembronan di tur e federashonnan afiliá na FDOK i mayornan di nos deportistanan. Karchi pa e kaminata ta bai ta optenibel entrante djaluna 11 di yúli awor na kantor di FDOK; situá na Roodeweg 92A – edifisio blou ku blanku – 2e piso t/o Colon na Otrobanda. Tambe por haña karchi serka tur nos federashonnan miembro i na algun puntonan di benta. Preis pa e kaminata ta kosta fl. 17.50.
FDOK ta hasi un apelashon na pueblo di Kòrsou pa partisipá na e kaminata aki di manera bo por kontribuí na moveshon deportivo ku tin komo lema : “BAN SOSTENE DEPORTE”. E Siman Olímpiko Kòrsou di deporte aki ta net na klousura di temporada di vakashon eskolar.
Bini uni bini tur bin sostene nos deportistanan i laga e muchanan sera nan vakashon mirando i hasiendo deporte.
Dia 31 di yüli 2022 anochi FDOK lo klousura e SIMAN OLÍMPIKO KÒRSOU ku Broche di Oro.
WILLEMSTAD — Kòrsou, Aruba i Boneiru a wòrdu invitá pa partisipá nan e CFU Boys’ Under 14 Challenge Series 2022. Mirando ku e 3 islanan aki tin e mes un pensamentu di ta bon prepará pa bai e U-14 Challenge Series aki, a surgi e idea pa organisá algun partido di fogeo entre e 3 islanan ABC aki na Kòrsou. E partidonan lo tuma lugá dia 7 pa 10 di yüli 2022, na Stadion Rignaal ‘Jean’ Francisca den oranan di atardi òf mainta.
Aruba su ekipo a yega Kòrsou awe mainta i Boneiru lo yega awe anochi pa sigui ku e preparashonnan pa e partidonan di fogeo aki. Kòrsou su ekipo, ku ta konsistí di hungadónan nasé na aña 2008 i 2009, tambe ta den preparashon den e próksimo dianan p’asina duna un bon presentashon. E partidonan di fogeo aki lo yuda hopi, pa por tin un mihó bista kiko mas mester mehorá i kon prepará nos selekshon ta pa e kompromisonan di e CFU Boys’ Under 14 Challenge Series 2022 ku lo tuma lugá proksimamente.
Skema di nos partidonan;
| Fecha | Orario | Tim di kas | Bishitante | Stadion |
| 7 yüli 2022 | 16:00 | Aruba | Boneiru | RJF |
| 8 yüli 2022 | 16:00 | Boneiru | Kòrsou | |
| 9 yüli 2022 | 16:00 | Boneiru | Aruba | |
| 10 yüli 2022 | 11:00 | Kòrsou | Aruba |
Kòrsou su tim ta konsistí di 22 hungadó i un staf tékniko di 7 persona. E hungadónan aki ta parti di nos preselekshon ku ta preparando pa nos kompromisonan na e CFU Boys’ Under 14 Challenge Series 2022 ku lo tuma lugá di 13 pa 21 di ougùstùs próksimo na Repúblika Dominikana.
Pueblo di Kòrsou kompletu ta keda invitá pa presensiá e partidonan aki. Bin apoyá i sostené nos ekipo ku ta preparando pa e CFU Boys’ Under 14 Challenge Series 2022.
Entrada pa e partidonan aki ta grátis.