WILLEMSTAD — Direktiva di Swim Club Orca Curaçao ta partisipá ku for di djabièrnè awor dia 09 di yüni 2017, i tur djabièrnè ku ta sigui, tin landamentu pa públiko na Pisina Bennie Leito di 7’or pa 9’or di anochi.
Entrada pa landamentu pa públiko ta kosta fl. 2,00 pa mucha te ku 14 aña i 3,00 pa persona for di 15 aña.
Pa mas informashon por yama tel: 529 6586.
WILLEMSTAD — Wikènt aki lo tin un par di wega hopi interesante den femenino i maskulino. Kuminsando djabièrnè lo bai tin e gran partido ku ta bai entre Dreamteam i Haarlem Power ku ta e kampion i supkampion di aña pasa. Esaki lo tuma lugá na Suvek Ballpark. Despues djasabra tin 2 wega sumamente interesante den femenino.Na Buenavista Ballpark lo tin debut di e 3 refuersonan di Venezuela pa e ekipo di demolition, nan lo topa e fuerte ekipo di Starosa Angels Vanddis. I na Frank Curiel Ballpark lo tin e klèsh entre e number 1 i number 2 di kampionato ku ta Pichingolo Nissan ku rèkert di 5-0 kontra Eagles Softex ku rèkert di 4-1. E wikènt aki tin tur rason pa bo yegá sòftbòl pasobra ta primintí di bira hopi interesante e wikènt aki.
E otro weganan ku lo tin ta:
Djabièrnè na Suvek: Giants vs Suffisant Eagles
Djasabra na Frank Curiel : Soto Cmtc vs Nos tei Curacao office supply
Djasabra na Buenavista : Giants vs Harlem Power
I djadumingu awor lo tin weganan di klasse A henter dia na vèlt di Montaña.
WILLEMSTAD — Despues di a klasifiká pa promé biaha den historia pa e CONCACAF Gold Cup, e selekshon di Kòrsou lo kompetí tambe den e edishon 2017 di Kopa Karibe.
E partidonan di Kopa Karibe lo tuma lugá na final di luna di yüni na Martinique. Akinan riba 22 di yüni Kòrsou lo enfrentá e selekshon di kas kual ta Martinique den stadion Stade Pierre-Aliker.
E hungadónan ku e keda selekshon pa Kopa Karibe ta:
MERKA — Den un komunikado CONCACAF a revelá e roster preliminar di 40 hungadó ku e keda someté pa e 12 asosiashonnan ku lo partisipá na e 2017 CONCACAF Gold Cup.
Segun e regulashonnan di e kompetensia e selekshon nashonalnan ta mara na e roster di 40 ku a keda entrada i esaki lo sirbi komo base pa e lista final di 23 hungadó ku lo partisipá den e Kopa.
E roster final di 23 hungadó lo keda publiká pa CONCACAF den e último siman di yüni. Despues di e publikashon aki, solamente kambionan relashoná ku leshon lo keda permití te ku 24 ora promé ku e promé partido di kada selekshon nashonal.
E selekshon di Kòrsou ta den Grupo C huntu ku Mexico, El Salvador i Jamaica. Den e buèlta di grupo Kòrsou lo hunga den e siudatnan di San Diego, Denver i San Antonio.
Kòrsou su promé partido lo ta djadumingu 9 yuli kontra Jamaica na Qualcomm Stadium, San Diego. Despues e selekshon ta biaha pa Denver kaminda lo e enfrentá El Salvador riba 13 di yüli den Sports Authority Field. Por último, e selekshon lokal lo biaha pa San Antonio, Texas kaminda e lo enfrentá Mexico djadumingu 16 di yüli den Alamodome.
Federashon Futbòl Kòrsou a entrega e siguiente lista di 40 hungadó provishonal na CONCACAF:
KIPER (4): Zeus de la Paz (Cincinnati Dutch Lions, USA); Jairzinho Pieter (RKSV Centro Dominguito, CUW); Eloy Room (SBV Vitesse, NED); Rowendy Sumter (RKSV Scherpenheuvel, CUW)
DEFENSOR (13): Shanon Carmelia (Ijsselmeervogels, NED); Jurien Gaari (Kozakken Boys, NED); Quentin Jakoba (Kozakken Boys, NED); Gillian Justiana (Helmond Sport, NED); Doriano Kortstam (Achilles ’29, NED); Darryl Lachman (Willem II, NED); Cuco Martina (Southampton FC, ENG); Shermar Martina (MVV Maastricht, NED); Shermaine Martina (MVV Maastricht, NED); Dustley Mulder (FC Eindhoven, NED); Civard Sprockel (FC Eindhoven, NED); Ayrton Statie (FC Oss, NED); Jason Wall (KFC Houtvenne, BEL)
MEDIOKAMPISTA (7): Kemy Agustien (Global Cebu FC, PHI); Leandro Bacuna (Aston Villa FC, ENG); Ashar Bernardus (RKSV Centro Dominguito, CUW); Roly Bonevacia (Wellington Phoenix FC, AUS); Jeremy de Nooijer (PFC Levski Sofia, BUL); Brandley Kuwas (Heracles Almelo, NED); Michaël Maria (SG Sonnenhof Großaspach, GER)
DELANTERO (16): Irvingly van Eijma (RKC Waalwijk, NED); Jarchino Antonia (Go Ahead Eagles, NED); Charlison Benschop (Hannover 96, GER); Kenji Gorré (Swansea City AFC, WAL); Elson Hooi (Vendsyssel FF, DEN); Rangelo Janga (AS Tren?ín, SVK); Gervane Kastaneer (ADO Den Haag, NED); Gianluca Maria (TEC VV, NED); Quenten Martinus (Yokohama F. Marinos, JAP); Liandro Martis (Leicester City FC, ENG); Rihairo Meulens (FC Volendam, NED); Gevaro Nepomuceno (FC Famalicão, POR); Romero Regales (FC Den Bosch, NED); Anthony van den Hurk (De Graafschap, NED); Gino van Kessel (Lechia Gda?sk, POL); Felitciano Zschusschen (FC Saarbrücken, GER)
WILLEMSTAD — Di 24 te ku 28 di mei último Orca a organisá un “trainingskamp” na Medellin, Colombia pa su atletanan di waterpolo U-12, U-14 i U-16.
Despues ku e divishon señor di Orca waterpolo a hunga dos wega kontra di e ekipo di De Robbin di Hulanda e fin di siman promé, e atletanan di Orca waterpolo a bai un “trainingskamp” na Medellin, Colombia. Tur esaki ta den kuadro pa pone waterpolo bèk riba e kaminda ku e mester ta; esta na un nivel aseptabel, ku nos por kompetí den region. Na opinion di e dirigentenan di Orca, gana medaya no ta e meta prinsipal pa waterpolo na e momentu aki, sino pa desaroyá e deporte
Timnan:
Orca (U-12, U-14 i U-16) a hunga kontra e siguiente klupnan: un klup di Copacabana (U-12, U-15 i U-16), un klup di Medellin (U-15), e klup di Belen (U-12, U-13, i U-15) i un klup di Antioquia (U-12).
Treinen:
Djaweps mainta 25 di mei 2017, e gruponan a trein na Copacabana di 12’or pa 1’or i 30 di atardi.
Partidonan:
Djaweps 25 di mei 2017 na Copacabana:
Simultañamente weganan tabata keda hunga, na kada banda di e pisina di Copacabana. Un banda U-16 (pèrdè
13-7 di Copacabana, gana 5-4 di Antioquia) i na e otro banda U-12 (pèrdè 9-3 di Copacabana, gana 3-0 di Copacabana i pèrdè 7-5 di Copacabana) i U-14 (pèrdè 9-7 di Copa i pèrdè 10-8 di Antioquia) tabata hunga
2 periodo òf kada periodo i kambia. Nos a opta pa hunga asina, ya por a koregí i papia ku a atletanan despues di kada dos periodo òf un periodo. Aki e ekiponan tabata bastante pareu.
Djabièrnè 26 di mei 2017 na Club Belen:
U-12 kontra Belen (pèrdè 10-0). U-14 kontra di Belen (pèrdè 8-2). U-16 kontra di Belen (pèrdè 12-3).
E ekipo di Belen tabata superior riba Orca.
Djasabra 27 di mei 2017 na Copacabana:
Weganan tabata wòrdu hunga simultañamente atrobe, U-16 kontra di Medellin (pèrdè 13-7), despues nan a meskla e timnan pa hunga kontra di otro. U-14 a hunga 2 wega i pèrdè kontra di Copacabana, pero e weganan tabata hopi pareu. U-12 a hunga 4 periodo kontra di Copacabana, (pèrdè 4-2, pèrdè 4-0, empatá 3-3 i gana 4-1). E ekipo di Medellin tabata superior riba Orca U-16. U-12 a bin ta hunga mas mihó. U-14 tiki tiki a bin ta komprondé kiko e entrenadó tabata ke i kon pa nan hunga. E entrenadó tabata buska un struktura di wega kon nan mester hiba e bala dilanti. Mas i mas den tur nan weganan por a mira esaki sosodé.
Coachnan por mira bèk riba un “trainingskamp” den kua tur atleta a mira kiko waterpolo ta enserá (e kos ta); atletanan a siña bastante i a hunga hopi partido di waterpolo.
Direktiva di Swim Club Orca Curaçao ta yama danki na tur ku a aportá pa e interkambio aki por a tuma lugá. Espesialmente e spònsernan ku a spònser e muchanan individualmente. Un danki spesial tambe ta bai pa e spònsernan Refineria Isla Kòrsou (Ku Kurason Pa Komunidat), Simple ICT Management i Simple Green (Keep Your World Clean) ku a sòru pa e atletanan tabata bon representá/uniformá
Pa mas informashon, tokante di Swim Club Orca Curaçao, por yama na telefon 529-6586.
WILLEMSTAD — Djarason 31 di mei nos lo kumisa ku un tradishon nobo, e tradishon aki lo hiba e nòmber di “mid-week softball sensation”.
Tur djárason anochi nos ta parti e siman na dos na montaña pa bai mira 2 partido di sòftbòl maskulino. E wega prinsipal di e anochi ta e kampion i supkampion di 2016 ta topa otro pa promé biaha den e kampionato maskulino.
Weganan ku tin programa pa djárason 31 mei lo ta:
19:30 – Giants vs Clase Aparte
21:30 – Dreamteam vs Harlem Power
WILLEMSTAD — Djaluna 8 di mei último Federashon di sòftbòl di Kòrsou a start ku su promé kurso pa téknikonan den sòftbòl fastpich. Sr Taffy de Jong ta e dosente i esun ku ta kordiná e kurso aki. Djaluna último Sr.Taffy de Jong a hasi entrega ofisial di e buki di kurso na direktiva di CSB.
E meta di e kurso aki ta pa yuda alsa kalidat i kapasidat tékniko di nos téknikonan. E kurso tin un durashon di 8 siman i lo a tende temanan manera, kiko ta spera di un coach, parti training mental, lèsnan di defensa i ofensivo i por último lo pone hopi énfasis riba e parti picheo. Lo tin lèsnan tantu teorétiko i tambe práktiko. Na final di e kurso tur e kursistanan lo pasa un eksámen i tambe nan lo haña un sertifikado.
BONEIRU — Durante e fin di siman ku ta tras di lomba ey (19-21 Mei, 2017), e ekipo fuerte di dam di Kòrsou representá pa MF. Clifton Agata, MF. Carló Lorevíl, Sylvio Blijden, Antonio Marquita, Eugene Ignacia, ta titulá kampion indiskutibel di e torneo di dam ABC (Aruba, Bonaire i Curaçao).
Kòrsou 14 Punto Boneiru 7 Punto Aruba 3 Punto.
Den e sekshon di hóben (nan) bao di 16 aña Kòrsou ta terminá na di tres lugá.
Hungado nan ku mas a destaka individualmente tabata:
Referee (nan) di e torneo tabata e Referí Internashonal Sr. Hensley Rondei di Kòrsou i Sr. Boy Goeloe di Boneiru.
Federashon di Dam Kòrsou kièr a gradisí Federashon di Dam Boneiru pa un torneo Bon organisá! Otro aña Kòrsou lo ta sede di e torneo di ABC den e di 2 siman di Mei 2018.
Federashon di Dam Kòrsou ta kumpli su di 50 aniversario dia 29 Juni 2017.
En konekshon ku esaki FDK ta organisando diferente aktividat kompletamente GRÁTIS pa henter e komunidat di Kòrsou, por partisipá i sera konosí ku e deporte di dam i TUR su BENEFISIO (nan) pa tantu e hóben i e adulto di mas aserka.
Algun aktividat ku tabata tin kaba i lo bai tin ta lo siguiente:
Otro Aña, Kòrsou pa via di FDK lo ta sede di e di 20th Kampionato PanAmerikano i e di 3e Youth PanAmerikano Festival di dam; tur dos ku mas ku 20 Pais di America di Juni 24 – Jul 4, 2018.
Esaki sigur lo ta un bon exposure pa Kòrsou Kompleto i ta spera ku FDK por konta ku e sosten di Kòrsou pa por hasi tur e 3 Kampionatonan International aki un éksito total otro ana.
Pa mas informashon por bishitá nos Website: www.fedakor.com , email(nan): secretary@fedakor.com, y sekfdk@gmail.com, of whatsapp nos na 599 9 (527) 8604.
WILLEMSTAD — Den Wikènt di Asunshon di 25 te ku 28 di mei ya kaba e di nuebe Curaçao Challenge ta tuma lugá. E kompetensha di windsurfing mas grandi di aña akí ta tuma lugá riba Spaanse Water na Windsurfing Curaçao i lo mustra, sigun organisadó prinsipal Hilde Schnitzler, kompetenshanan eksitante di Slalom i Freestyle. Schnitzler: “ Ku partisipantenan fuerte for di Aruba i Boneiru i un grupo di talento di sùrf hopi fanátiko di Kòrsou, nos ta spera ku lo tin hopi bientu i tambe un públiko grandi!”
Lès di windsurfing grátis pa e públiko interesá.
Durante Curaçao Challenge tin kompetensha 4 dia largu den 3 diferente kategoria. Asina tin kompetensha pa rookies, winsurfernan hóben ku no tin masha eksperiensha ainda i pa windsurfernan di slalom i freestyle ku hopi mas eksperiensha den kompetensha. Pa loke ta e kompetensha di slalom e windsurfernan ta kuminsá huntu i mester kompletá un ruta ku ta indiká ku bui den laman mas lihé posibel. Den freestyle kada bia 2 windsurfer ta desafiá otro pa hasi mas tantu kenshi difísil posibel den 4 minüt. E ganadó ta sigui pa e próksimo rònt.
E kompetenshanan di slalom i freestyle ta tuma lugá diariamente for di 10 or di mainta te 4’or di atardi i entrada ta grátis pa públiko. Esun ku ta deseá esaki por haña lès di windsurfing grátis for di 3’or di atardi serka e instruktornan di Windsurfing Curaçao, i asina por sera konosí ku e deporte di windsurfing. Mayoria partisipante den Curaçao Challenge ta bou di 18 aña. Nan no ta disfrutá solamente di e kompetensha, sino tambe di e ambiente dushi rondó di e evento. Asina djasabra anochi for di 6or tin un BBQ, tanten 7’or tin un pelíkula hopi leuk tambe tokante sùrfmentu pa solamente 20 florin pa persona.
Hopi partisipante femenino fanátiko e aña akí.
Schnitzler ta spera ku e aña aki mas o ménos 75 windsurfer ta partisipá na Curaçao Challenge. E nivel lo ta haltu, ku partisipashon di algun windsurfers lokal hóben manera Kareem Naipal, Wave Antonia I Ryan Richie, ku otro aña probablemente lo partisipá na e kompetensha di freestyle di PWA (Professional World Association). Maske tumando un promedio tin mas tantu mucha hòmber ta partisipá ku mucha muhé, e aña akí e damanan ta bon representá ya ku tin bastante mucha muhé ku ta práktika windsurfing ta bini for di Aruba.
Windsurfing ta un deporte popular riba islanana ABC ku kompetenshanan manera Curacao Challenge, Aruba High Winds i Sorobon Masters. Tòg e organisashon ta dependé di boluntario. Schnitzler: “ banda di mi tim di boluntario leal, e aña akí mi por konta ku Victor Wijnand, un race director ofisialmente rekonosé ku ta bini spesialmente pa e evento akí for di Boneiru. I maske no tabata fásil pa haña spònser, danki Dios mi por konta ku sosten di Securitas, Coca-Cola, Chogogo, CPS, VR Shipping N.V., de Mermaid, Obsession, ENNIA i Zapata Fly Board.
Hilde Schnitzler i su kasá Ingmar for di 2006 ta dediká nan mes ku alma i kurpa na windsurfing na Kòrsou. Asina nan ta hür, bende i drecha material di windsurfing, nan ta duna lès i ta organisá SUP (Stand up peddeling tours) .Curaçao Challenge ta un trabou di organisashon duru pero leuk, i ku esaki nan ta stimulá talentonan di windsurfing hóben pa surpasá nan mes i asina haña mas eksperiensha ku kompetensha i mes ora tambe pone windsurfing komo deporte akuátiko dinámiko riba mapa serka un públiko mas grandi.
Pa mas informashon bo por bishitá página di Facebook di Curaçao Challenge òf yama + 5999 -7380883
WILEMSTAD — Den e kompetensia di djasabra i djadumingu último klup di atletismo Trupial – Auto City a logra konkista 5 di e 8 lugá nan ku tabata den disputa pa forma parti di e selekshon di Kòrsou pa kampionato di NACAC Age Group na Trinidad & Tobago dia 14 i 15 di juni próksimo.
Tambe 3 di e 4 atletanan di reserva ta di Trupial – Auto City. Ku e resultado aki klup di atletismo Trupial – Auto City a demostrá su superioridat riba e otro klup nan di Kòrsou.
E atletanan selektá ta:
U 13 femenino
1 Mehaydi Isabella
2 Mariendely Casper
U13 maskulino
1 Rythemsley Daal
2 Rodiensly Ignecia
U15 femenino
1e Vanessa Mercera
Atleta di reserva ta
U13 femenino
3e lugá Joëlla Mathilda
U13 maskulino
3e lugá Savir Faneyte
U15 maskulino
3e lugá Dayveno Daal
Ku e logra aki direktiva di klup di atletismo Trupial – Auto City ta organisá un homenage na e atletanan aki i e entrenadó nan ku a hasi un bon trabou ku nos atletanan.
E homenage lo tuma lugá mayan 5.30 na Rust & Burg.
Direktiva di Trupial – Auto City ta felisitá e atletanan aki i ta yama un danki na nos coach nan ku a hasi un bon trabou. Un pabien ta bai tambe na e mayornan ku a konfia nan yu nan den nos organisashon ku awor nan por mira e bon trabou di nos organisashon. Un danki tambe ta bai na tur miembro di direktiva i tur spònser ku sa kontribuí ku nos organisashon. En espesial nos spònser mayó Auto City ku ta 100 0/0 nos tras. Tambe nos ta informá ku pa djárason awor 24 mei lo Sali un delegashon di 5 atleta di Kòrsou pa Cuba pa un kompetensia internashonal Barientos. Di e 5 atletanan aki 3 ta di klup di atletismo Trupial – Auto City
Joshua-Benjamin Phelipa riba tira disko. Rekort nashonal riba e evento aki;
Jaden Bernabela riba bula haltu. Medajista di plata den Carifta Games 2017 na Kòrsou;
Glenka Antonia, Bula haltu femenino. 4e lugá riba bula haltu na Carifta Games 2017.
Preparashon pa Trupial – Auto City Classic 2017 dia 7,8 i 9 di juli ta den ful preparashon.