Author: E. Evertsz

Posted on

Klup Di Atletismo Trupial – Autocity A Invitá 2 Kampion Olímpiko Di Cuba Pa E Festival Di Relevo 2017

WILLEMSTAD — Dia 7, 8 i 9 di yüli próksimo klup di atletismo Trupial – AutoCity ta organisá e di 25e Trupial – AutoCity Classic/Refineria Isla Festival di Relevo 2017 den stadion di SDK. Komo atrakshon pa e evento i e atletanan ku ta bini e evento, tur aña Trupial – AutoCity ta invitá un èks atleta olímpiko òf un entrenadó internashonal, pa duna un charla o training na e atleta nan ku lo partisipá na e evento. E aña aki e dirigentenan di Trupial – AutoCity a logra invitá 2 gigante for di Cuba:

  1. Lisensiado Maria de Caridad Colon Ruenes, promé hende muhé di latino kampion olímpiko riba tira sper. Tambe miembro di komishon di atleta hende muhé internashonal di IAAF.
  2. Javier Sotomayor Sanabria kampion olímpiko i ainda ku rekòr mundial riba bula haltu ku un haltura di 2.45m.

Ámbos estrea deportivo di Cuba i di mundu, lo ta na Kòrsou pa duna un charla riba hende Muhé den deporte i klínika di tira sper i bula haltu na nos atleta i entrenadó nan di Kòrsou.

Tambe klup Trupial – AutoCity a logra haña un tim di Master i un hubenil di Santo Domingo pa bin partisipá na evento di 2017. Ku partisipashon di Santo Domingo den 2017  e paisnan internashonal ku ta partisipá ta bira 9. Ku Kòrsou aden ta bira 10. Ya nos tin konfirmashon di Puerto Rico, Sint Maarten, Trinidad & Tobago, Sùrnan, Colombia, Jamaica, Aruba, Boneiru i tur klup di atletismo di Kòrsou. Despues di e magno evento di Flow Carifta Games 2017 aki na Kòrsou dia 15 pa 17 di aprel próksimo, lo bini un konferensia dia prensa, den kual lo duna tur informashon di e diferente aktividatnan ku ta bai tin henter siman. For di dia 2 di juli dia di bandera ta kamisa ku e relevo di flambeu pa bai kaba na Brion Plein, te ku 9 di juli ku un mini máratòn o kaminata di 5 km den Punta. Keda pendiente.

Posted on

Selekshon nashonal U-13 a logra e título di supkampion den torneo Himno i Bandera

ORANJESTAD — Manera ya ta konosi, nos selekshon nashonal U-13 a biaha pa Aruba dia 12 di mart último pa asina kumpli ku nan kompromisonan den e torneo internashonal Himno i Bandera ku a tuma lugá di 13 pa 18 di mart.

E paisnan ku a partisipá na e torneo aki tabata; Aruba, Boneiru, Colombia, Kòrsou, St. Maarten i Venezuela.

Resultado di nos weganan:

Fecha Tim di kas Bishitante Resultado Lugá
1 13 mart 17 Kòrsou Boneiru 3-0 Compleho Deportivo Guillermo Prospero Trinidat

(Dakota)
2 14 mart 17 Colombia Kòrsou 1-5
3 15 mart 17 Aruba Kòrsou 1-1
4 16 mart 17 Kòrsou Venezuela 2-0
5 17 mart 17 Kòrsou St. Maarten 5-0

Weganan final:

Fecha Tim di kas Bishitante Resultado Lugá
1 18 mart 17 Venezuela Colombia 1-0 Compleho Deportivo Guillermo P. Trinidat
2 18 mart 17 Aruba Kòrsou 1-0

Esnan ku a anotá e golnan durante nos promé partido tabata Joshua Rosaria (2x) i Rensver Juliana. Durante nos segundo enkuentro kontra di Colombia, Quinhandri Bibiana, Jhurielmerson Ines, Melbourne Marquez Ricardo, Nirik van Thijs i Zain Virginia tabata e goleadónan. Den e siguiente partido, kontra Aruba, Nirik van Thijs a anotá e úniko gol pa Kòrsou. Zain Virginia i Jhurielmerson Ines a soru pa e 2 golnan di nos viktoria riba Venezuela. Zain Virginia (2x), Quinhandri Bibiana ku Joshua Rosario i un outogol di St.Maarten a soru pa e viktoria di 5-0 riba St. Maarten.

Ku e resultadonan aki nos a keda komo supkampion di e torneo aki miéntras e ekipo amfitrion, Aruba a sali kampion. Venezuela a kaba na terser puesto i Colombia na di 4 lugá.

Nos selekshon nashonal di U-13 tabata konsistí di un grupo di 19 hungadó ku ta wòrdu dirigí pa Sr. Mayron Martis ku ta e entrenadó di e selekshon aki i Sr. Germain Ignacius ku Sr. Brenton Balentien ku ta e asistentenan di e entrenadó.

Tambe a biaha huntu ku e selekshon Sr. Eulogio Leocadia ku ta e masahista di e selekshon i e hefe di delegashon ku ta Sr. Stanley Coffy, miembro di direktiva di FFK.

Nos selekshon ta konsistí di e siguiente hungadónan:

  1. Quihaindri Bibiana
  2. Dayron Boelijn
  3. Keaton Bouwland
  4. Yesias Ignacius
  5. Yermal Inees
  6. Jhurielmerson Ines
  7. Rayhim Inesia
  8. Rensver Juliana
  9. Nicolas Loaiza Atehortua
  10. Melbourne Marquez Ricardo
  11. Reuel Martina
  12. Shedrion Mathilda
  13. Joshua Rosaria
  14. Gior Selassa
  15. Arthur Suart
  16. Nirik van Thijs
  17. Kane Velting
  18. Zain Virginia
  19. Marro Wilms

FFK i MCB ta yama nos selekshon di U-13 masha pabien ku nan título di supkampion di e torneo internashonal Himno i Bandera aya na Aruba.

Posted on

Eksitoso proyekto di Flow, Manchester United i FFK

WILLEMSTAD — Djasabra, 18 di mart último a tuma lugá na tereno di FFK e ‘The Flow Ultimate Football Experience’. Flow i Manchester United Football Club a uni pa brinda na 15 pais di Karibe un tremendo oportunidat. Konhuntamente ku FFK a selekshoná 40 hungadó, di 13 pa 16 aña, aktivo di nos kampionato hubenil pa partisipá na e kompetensia ‘The Flow Ultimate Football Experience’.

E hungadó nan e keda evaluá a base di e siguiente 3 abilidatnan;

  1. Abilidat di kontrol di bala
  2. Abilidat di pase nan kòrtiku
  3. Abilidat pa ‘dribbel’ ku bala

Tur hungadó a keda repartí den diferente grupo i a keda evaluá dor di algun entrenadó lokal. Na final di dia e 2 hungadónan ku e puntuashon di mas altu a resultá e 2 ganadó nan ku lo representá Kòrsou na Trinidat & Tobago. Aya na Trinidat nan lo tin un seshon individual ku entrenadónan di CFU i Manchester United. Tambe nan lo kompetí ku e ganadó nan di e otro 14 paisnan partisipante p’asina saka un ganadó. E ganadó lo sigui pa London pa representá nos region durante e kompetensia aki.

E 2 ganadónan a resultá di ta Emian-Johar Semedo di e ekipo di Willemstad i Sharrion Pietersz di e ekipo di Excellence School. Emian i Sharrion lo biaha dia 6 di mei próksimo akompañá pa un mayor i nan entrenadó pa Trinidat & Tobago.

Banda di e 2 ganadó nan aki FFK a premia e hungadónan ku a anotá mas gol durante e kompetensia aki.

Esaki nan ta lo siguiente;

  1. Adriel Evertsz
  2. Leroy Dickens
  3. Ruhairon Sambo
  4. Reuel-Jaden Stewart
  5. Richainro Adamus

Lindsey Hart i Sofia Colina tambe a keda premiá komo e 2 mucha muhé nan ku e puntuashon di mas haltu.

FFK ta felisitá tur hungadó pa nan tremendo trabou durante e kompetensia aki i ta deseá e 2 ganadónan, Emian-Johar Semedo i Sharrion Pietersz tur klase di éksito aya na Trinidat & Tobago.

Posted on

Wladimir Balentien selekshoná unánimemente den e “2017 All-World Baseball Classic Team”

MERKA — E Klásiko Mundial di Beisbòl a yega na su final ayera ku e selekshon Merikano derotando Puerto Rico ku skor di 8-0. Picher di Merka, Marcus Stroman a keda nombra komo e hungadó mas balioso di e Klásiko Mundial 2017.

Banda di esaki tambe e hungadó nan ku ta den e “2017 All-World Baseball Classic Team” a keda nombra. Akinan e pelotero Kurasoleño, Wladimir Balentien a keda selekshon di forma unánime. Balentien ku a hunga pa e selekshon di Reino a tabata tin un promedio .615 ku 4 honron i 12 kareda empuha durante e kampionato.

E siguiente peloteronan a keda selekshon pa e “2017 All-World Baseball Classic Team”:

Posishon

Hungado

Ekipo

Statistik di Torneo

C

YADIER MOLINA^

Puerto Rico

.333, 2 HR, 6 RBI, 4 R

1B

ERIC HOSMER^

USA

.385, 1 HR, 5 RBI, 3 2B, 6 R

2B

JAVIER BÁEZ

Puerto Rico

.308, 1 HR, 5 RBI, 4 R, 4 SB

3B

CARLOS CORREA

Puerto Rico

.333, 3 HR, 9 RBI, 2 SB, 10 R*

SS

FRANCISCO LINDOR

Puerto Rico

.370, 2 HR, 4 RBI, 1 2B, 7 R

OF

WLADIMIR BALENTIEN^

Kingdom of the Netherlands

.615, 4 HR, 12 RBI, 1.115 SLG, 10 R*, 29 TB

OF

GREGORY POLANCO

Dominican Republic

.579, 1 HR, 2 RBI, .842 SLG

OF

CHRISTIAN YELICH

USA

.310, 3 RBI, 4 2B, 7 R

DH

CARLOS BELTRÁN

Puerto Rico

.435, 5 RBI, 1 2B, 4 R

P

KODAI SENGA

Japan

0.82 ERA, 11.0 IP, 7 H, 1 BB, 16 SO*

P

MARCUS STROMAN (MVP)

USA

1-1, 2.35 ERA, 3 GS, 15.1 IP, 9 SO

P

JOSH ZEID

Israel

0.00 ERA, 2 SV, 10.0 IP, 5 H, 10 SO
Posted on

Kòrsou i El Salvador ta empatá den partido amistoso

WILLEMSTAD — E selekshon nashonal di Kòrsou ku ta preparando pa Kopa Karibe i tambe Kopa Oro a hunga un partido amistoso kontra e selekshon di El Salvador ayera den Stadion dr. Antoine Maduro. Ámbos selekshon ta den Grupo C di Kopa Oro i lo bolbe enfrentá otro durante e torneo den luna di yüli próksimo.

E partido a finalisá na un empate na un gol. E selekshon lokal a bai ariba na di 73 minüt ku gol di Felitciano Zschusschen. E ekipo di El Salvador a logra empatá e partido den di 90+ minüt.

E selekshon di Kòrsou ta keda na Kòrsou te ku dia 29 di mart próksimo. durante e dianan aki e selekshon lo sigui entrená. Djasabra dia 25 di mart e selekshon lo hunga otro partido di entrenamentu. Esaki lo ta un partido kaminda lo dividí e selekshon den dos pa hunga kontra otro.

Posted on

Tim di Reino a laga impreshon enorme atras

MERKA — Apesar ku nos Tim di Reino Hulandes no a logra pasa pa e buelta final di World Baseball Classic (WBC), e impreshon mundial ku a keda di e selekshon aki ta unu ku nos por ta super orguyoso di dje. “Nos ta bai pa e título.” ta loke mènedjer Hensley Meulens a anunsiá for di promé ku e torneo a kuminsá. Presisamente e aktitut aki e tim a mustra durante WBC. Hopi a mira e avanse di e Tim di Reino komo un sorpresa pero esaki no tabata e kaso pa Hensley Meulens. Pa di dos biaha siguí e peloteronan di Kòrsou, Hulanda i Aruba a logra yega e tòp 4.

E simannan tras di lomba e selekshon di Reino a logra bira un di e faboritonan di e torneo. Sigur ku partisipashon di peloteronan ku eksperensia di Grandes Liga manera Andrelton Simmons, Didi Gregorius, Xander Bogaerts , Jonathan Schoop i e Rei di Honron, Wladimir Balentien.

E presensia di Wladimir ‘Coco’ Balentien tabata evidente ya ku e a dal 4 honron durante e torneo. E prestashon aki a hiba Balentien na alkansá e título di Hungadó mas balioso (MVP). Al final Coco a finalisá ku 16 hit den 26 turno (.615) i a liderá e Tim Oraño den entre otro hit, honron (4), kareda anotá (10) i kareda empuhá (12). Djis su tras Jurickson Profar a finalisá na di dos lugá ku 13 hit (.516) i a skor seis kareda. Profar a logra mas doblete ku tur otro pelotero di e selekshon Hulandes. Kalian Sams tambe a laga un bon impreshon atrás despues di a sòru pa 3 hit (.444). Na di kuater lugá Yurendell de Caster (.421) a bira un di e kuater peloteronan den nos tim ku averahe riba .400.

Durante di e WBC aki e Tim di Reino a alkansá un rekòrt nobo ku peloteronan manera Yurendell de Caster, Rob Cordemans i Diegomar Markwell. E Tim di Reino a bira promé tim ku un mínimo di tres hungadó ku a partisipá den tur 4 edishon di WBC. Tambe e aña aki un kantidat rèkort di 24.865 fanátiko a presensiá e promé partido di semifinal ku ta yega na e kantidat rèkort di 1.001.693 bishitante. Na 2013 no mas ku 885.212 bishitante a presensiá e partidonan di WBC. Ku e weganan di semifinal i final, ahinda e kantidat riba 1 mion a sigui subi.

Nos Tim di Reino guiá pa Hensley Meulens no ta bai kas man bashí. Dor di a yega semifinal, e tim ta bin na remarke pa premionan ku total ta surpasá 1 mion dòler Merikano. Di e montante disponibel pa e Tim Oraño, mitar ta bai na e hungadónan. E otro mitar ta destiná pa desaroyo di topsport den Reino.

Posted on

Kòrsou ku delegashon di 39 atleta den Flow CARIFTA Games 2017

WILLEMSTAD — Manera ta konosí, Kòrsou ta organisado di e Flow Carifta Games 2017. E evento di atletismo mas grandi di Caribe, ku ta tuma lugá di dia 15 pa 17 di aprel 2017 próksimo.

Un kantidat di 39 atleta ta forma parti di e delegashon di Kòrsou pa CARIFTA 2017. E kuerpo di coachnan di federashon di atletismo, CAB, enkabesá pa coach Rudsel van Lamoen, riba djaluna 19 di mart a sinta pa evaluá e resultadonan registrá entre prinsipio di desèmber 2016 te ku fin di siman di 18-19 di mart último.

A base di e prestashonnan a selektá un kantidat di atleta huntu ku esnan ku a logra e marka mínimo, pa disidí kua ta e atletanan ku lo kompetí dianan 15-16-17 di aprel dilanti di nan mes públiko.

Entre e trintinuebe atletanan ta figurá 3 hóben ku lo bini for di Hulanda. T’asina ku den añanan resien tabata un kustumber ku ta selektá atleta yu di Kòrsou òf nasé na Hulanda ku mayor(nan) yu di Kòrsou pa kompetí pa nos pais. Ademas di e atletanan for di Hulanda, lo bini tambe 2 coach ku lo duna klínika di ‘pole vault’ i ‘hurdles’ na coach i atletanan lokal. Un di e coachnan, Hans Coolen, lo forma parti di e team di coach di Kòrsou pa coach e atleta Glenn Kunst den Carifta, konsiderando ku lokalmente no tin coach ku ta dominá e disiplina di ‘pole vault’.

Den próksimo dianan nos komunidat lo tende i lesa hopi di nos atletanan, kendenan ku gran orguyo lo karga bandera di Kòrsou na laria den Carifta.

Atleta Disiplina Kategoria
Nashwena Jonge 100 / 200m / 4×100 U-18
Joachima Jonis 100 / 200m / 4×100 U-18
Jeannery Wederfoort 400m / 4×100 U-18
Tanisha Dall 400m / 4×400 U-18
Maysoun Juliana 800m / 4×400 U-18
Shurianty Mathilda 800m / 4×400 U-18
Krishona Juliana Long / triple jump U-18
Kamese Halstead Shot put U-18
Gianisa Olbino Shot put / javelin U-18
Rishmylady Felicia 4×100 U-18
Keyla Sambo 4×400 / Res. 800 U-18
Joanna Benita 4×100 U-18
Qyone Antersijn 800 / 1500 U-20
Glenka Antonia High / long jump U-20
Kemisha Halstead Discus U-20
Joshua Bekman 100 / 200m / 4×100 U-18
Elgemar Laker 100 / 4×100 U-18
Aldrich Jack 200 / 400 / 4×100 U-18
Andrew de Pool 800 U-18
Jordan Philbert 400 / 800 U-18
Jaden Bernabela Long / high jump U-18
Tahir Boeldak Shot put U-18
Daniel Balentina Discus / shot put U-18
Isan van Lamoen Discus U-18
Nattaniel Koomen javelin U-18
Kgevin Kook Javelin / high jump U-18
Suehandric Paulina 4×100 U-18
Arjelison Damoen 4×100 U-18
Jean-Andre Denisia 100m /4×100 U-20
Gedyonne Augusta 200m / 4×100 U-20
Shuraimy Bito 100 / 200 / 4×100 U-20
Germain Jansen 400m U-20
Ramsey Angela 400 / 400H / 4×100 U-20
Elmer Pieter 800/1500 U-20
Yohance Valks 1500/5000 U-20
Daan de Grauw Long / high jump U-20
Georgegino Eisden Shot put U-20
Glenn Kunst Pole vault / discus U-20
Shaquille Boeldak 4×100 U-20
Ofisialnan
Rudsel van Lamoen Head coach
Wendell Prince coach
Nephtaly de Boer coach
Luis Varona Moret coach
Johannes Coolen coach
Mercedes Daantje Hefe
Posted on

Kòrsou kontra El Salvador di ekshibishon awe

WILLEMSTAD — Tur kos ta kla pa nos selekshon nashonal enfrentá El Salvador awe, 22 di mart, 8’or di anochi den Stadion Antoine Maduro. Esaki lo ta nos promé wega di fogeo komo preparashon pa e delaster buèlta di Scotiabank Caribbean Cup tuma lugá na Martnique den luna di yüni i Gold Cup 2017 ku lo tuma lugá na Merka den luna di yüli.

Den dianan tras di lomba nos hungadónan residensia den eksterior a pisa suela di Kòrsou pa kontinuá ku e práktikanan intensivo pa e partido di awe. Nos kontrinkante, e selekshon di El Salvador tambe a yega Kòrsou ayera den oranan di mèrdia i a kuminsá ku nan preparashonnan.

Aki ta sigui un biografia chikí di e hungadó nobo di nos selekshon nashonal.

Nòmber: Brandley Kuwas
Fecha di nasementu: 19 sèptèmber 1992
Ekipo: Heracles Almelo
Posishon: Mediokampo

Brandley Kuwas ta un hóben futbolista di 24 aña di edat, nasé na Hulanda (Hoorn) dia 19 di sèptèmber 1992.  Su posishon preferí ta mediokampo i for di yüli 2016 e ta militá den e ekipo di divishon di honor, Herecles Almelo. Promé ku e ekipo ku e ta militá aden, ela forma parti di ekiponan manera, SVB Excelsior, FC Volendam i KFC den kual ela gana diferente kampionato i trofeo.

For di edat yòn Brandley a kuminsá práktika e deporte di futbòl i a militá den diferente ekipo hubenil. El militá den ekiponan manera; Hellas Sport, AZ I KFC 1910. Despues di a partisipá na e partido amistoso entre nos selekshon i Achilles’29 ku a tuma lugá resientemente aya na Hulanda, Brandley a kuminsá evaluá si e lo ke keda hunga pa nos selekshon òf forma parti di e selekshon di Hulanda. Pero despues di a tuma varios konseho entre otro di su mama kende ta un yu di Kòrsou, ela skohe pa forma parti di nos selekshon i representá nos dushi isla durante e partidonan importante ku tin na kaminda. Pues Brandley tambe ta kla pa enfrentá El Salvador mañan anochi durante e partido di fogeo aki.

Karchinan pa e partido aki lo ta optenibel solamente na FFK bou di ora di ofisina.

Dia di wega karchinan lo ta optenibel na e lokèt nan di Stadion Antoine Maduro.

E partido ta kuminsá 8’or di anochi pero portanan ta habri for di 5’or di atardi, yega trempan pa evitá e trafiko!

E preisnan pa e diferente sekshonnan ta lo siguiente:

  • Sekshon A; Tribuna pariba di tribuna di honor ta Fl.50,-
  • Sekshon B; Tribuna patras di golnan na lado di Maripampoen ta Fl.25,-
  • Sekshon C; Tribuna patras di golnan na lado di Willemstad ta Fl.25,-
  • Sekshon D; Tribuna pabou di tribuna di honor ta Fl.15,-
  • Den e sekshon B i C (tribuna patras di golnan) mucha te ku 12 aña i 60+ ta paga Fl.15,-

E hungadónan di nos selekshon ku lo partisipá na e wega di fogeo aki ta lo siguiente;

  1. Eloy Room
  2. Reangelo Janga
  3. Jeremy de Nooijer
  4. Quintin Jacoba
  5. Doriano Kortstam
  6. Jurriën Gaari
  7. Rhu-Endly Martina
  8. Darryl Lachman
  9. Gillian Justiana
  10. Dustley Mulder
  11. Shanon Carmelia
  12. Ayrton Statie
  13. Michaël Maria
  14. Leandro Bacuna
  15. Germaine Agustien
  16. Brandley Kuwas
  17. Elson Hooi
  18. Jarchino Antonia
  19. Gino van Kessel
  20. Gevaro Nepomuceno
  21. Felitsiano Zschusschen
  22. Rowendy Sumter
  23. Jarzinho Pieter
  24. Ashar Bernardus
  25. Jimbertson Vapor
  26. Christopher Isenia

Un yamada ta bai na henter e pueblo di Kòrsou pa bin na bòshi, bin disfrutá di un tremendo partido! Sali ku bo bandera di Kòrsou, bo t-shirt, bo shal, bin apoyá i sostené nos hungadónan komo e number 12!

Posted on

Selekshon di Reino ta keda kòrtiku kontra Puerto Rico

MERKA — Den un partido sumamente pèrta e selekshon di Reino ta kai vensi kontra e ekipo di Puerto Rico. E selekshon di Reino ayera a hunga e semifinal di e Klásiko Mundial di Beisbòl kontra e selekshon Puertoriqueño. Lasitmanente, e selekshon di Reino ta keda nèt kòrtiku perdiendo ku skor di 4-3 den 11 entrada.

Wladimir Balentien(4-3) un biaha mas a manda reino ariba den promé entrada ora e la konektá un honron di dos kareda pa empuha Xander Bogaerts(3-1) Sin embargo, e bentaha aki tabata di korto bida ya komo ku den bòm di e entrada mes e Puertoriqueno ta empatá e partido na 3.


Resumen di e partido, kortesia di MLB.com

Puerto Rico ta bai ariba den di dos entrada ku skor di 3-2. Den di sinku entrada Reino ta tabla e partido bek na 3. Akinan tabata un doblete di Shawn Zarraga(4-1) ku a empuha Wladimir Balentien.

Ku e derota selekshon di Reino ta keda eliminá for di e klásiko Mundial di Beisbòl. Na 2013 tambe e selekshon a yega te semifinal. Na e momentu ey e ekipo a keda eliminá pa Repúblika Dominikana.

Posted on

SOV BRANDWEER KU TREMENDO FIREFIGHTERS WALK 2017

WILLEMSTAD — Ya pa di tres aña konsekutivo, Sport en Ontspannings Vereniging di Brandweer Korsou ta organisa e kaminata ku ta hiba di nomber “Firefighters Walk”. Aña pasa mas di 2000 persona a partisipa durante di e kaminata organisa pa miembronan di Brandweer Korsou i a kana for di Post di Brandweer na Steenrijk pasa den kayanan di Punda i Otrobanda i termina na Playa Parasasa. SOV Brandweer a komplase tur esnan ku a pidi pa hasi e ruta mas largu I nos lo tin un ruta di 10KM ku lo pasa via di Brug Juliana. Tur partisipante ku skohe pa e ruta di 10KM lo krusa Brug Juliana na pia kanando for di Punda pa bai Otrobanda.

Durante Firefighters Walk, SOV Brandweer lo malkria tur su partisipantenan ku e tremendo servisio ku ja nan a kustumbra kune durante di e kaminata aki. Anto pa no papia mes, na momentu ku nan yega na final na Playa Parasasa lo tin fruta, juice, sopi, awa, masashi gratis I diferente kos mas ku nan lo risibi serka nos bomberonan. Karchinan ja ta optenibel serka tur bomber I ta kosta solamente 15 florin. Dado kaso un persona no konose kualkier bombero, por pasa tur dia, for di 9or di mainta te ku 9or di anochi non-stop na Kazerne di Brandweer na Mundu Nobo pa kumpra bo karchi pa 15 florin ku ta inklui un bunita tshirt I tambe bo konsumo.

Repartishon di tshirt lo tuma luga dia 29 I 30 di Mart 2017, for di 6or – 9or pm na Roodeweg. Pa kualkier informashon of benta di karchi pa Firefighters Walk 2017 lo por tuma kontakto ku 693 – 4666 of 529-2222. Of tambe por like nos Facebook page di SOV Brandweer unda lo por risibi tur informashon di Firefighters Walk 2017.

Facebook Twitter Instagram Youtube
© 2024 Deporte Awe. Tur derechi reservá. Diseñá pa E² Media