Author: E. Evertsz

Posted on

Resultado di Voli

WILLEMSTAD — E kampionato di Vòlibòl a kontinuá ayera nochi den sala Errol Rooi ku e siguiente resultado; den klase A Femenino, Shuatanari ta derota Hurricane ku skore di 2-0 (25-20 ,25-18)  i den Maskulino A Titus ta derota Xaverianen 2-0 (25-11) (27-25).
Den klase Femenino Superior, Green Jewels ta gana Hurricane ku skore di 3-1 (22-25, 25-20, 25-14, 25-15). Ku e viktoria aki Green Jewels ta pika dilanti den e seri mihó di 3 wega pa e puesto #4 di e play-off.Diarason e wega #2 di e seri aki lo tuma lugá huntu ku e promé wega di semi final femenino di klase A.
Posted on

Kòrsou lo ta den Grupo C di CONCACAF Gold Cup 2017

MERKA — CONCACAF a anunsiá awe e partidonan i kalendario kompleto pa e edishon 2017 di  CONCACAF Gold Cup. E evento aki a tuma luga na Brocade Club den Levi’s Stadium, Santa Clara California.

Durante e evento tabata presente presidente di CONCACAF Sr. Victor Montagliani, e sekretario general di CONCACAF Sr. Philippe Moggio i e entrenadó ku ofisialnan di tur e paisnan ku a kualifiká pa Gold Cup 2017.

Pa representá Kòrsou na e sorteo di djamars, a biaha pa California Sr. Alexander Molina, hefe di delegashon di nos selekshon, nos ‘Head Coach’ Sr. Remko Bicentini, Sr. Pauletta, nos ‘team manager’ i Sr. Rignaal Francisca, presidente di FFK i alabes segundo vise presidente di Caribbean Football Union.

E selekshon di Kòrsou a kai den Grupo C huntu ku Mexico, El Salvador i Jamaica. Den e buèlta di grupo Kòrsou lo hunga den e siudatnan di San Diego, Denver i San Antonio.

Kòrsou su promé partido lo ta djadumingu 9 yuli kontra Jamaica na Qualcomm Stadium, San Diego. Despues e selekshon ta biaha pa Denver kaminda lo e enfrentá El Salvador riba 13 di yüli den Sports Authority Field. Por último, e selekshon lokal lo biaha pa San Antonio, Texas kaminda e lo enfrentá Mexico djadumingu 16 di yüli den Alamodome.

E gruponan a keda repartí di e siguiente manera:

Grupo A
New York/New Jersey (Red Bull Arena), Houston (BBVA Compass Stadium), Dallas (Toyota Stadium)

  • Honduras
  • Costa Rica
  • French Guiana
  • Canada

Grupo B
Nashville (Nissan Stadium), Tampa (Raymond James Stadium), Cleveland (FirstEnergy Stadium)

  • United States
  • Panama
  • Martinique
  • Haiti of Nicaragua

Grupo C
San Diego (Qualcomm Stadium), Denver (Sports Authority Field), San Antonio (Alamodome)

  • Mexico
  • El Salvador
  • Curaçao
  • Jamaica
Posted on

Selekshon di Reino ta blankea Korea pa su promé viktoria di WBC2017

KOREA — Ku un aliniashon forma kompletamente pa peloteronan di Aruba i Kòrsou e selekshon di Reino un viktoria di 5-0 kontra e selekshon di Korea den Gocheok Sky Dome na Korea.

For di trempan den e partido e selekshon di Reino a kue e bentaha, ora ku Jurickson Profar (4-2) ta konektá un mahestuoso honron di dos kareda pa right field. Andrelton Simmons(4-2) ku a habri e entrada ku un single a anotá riba e bataso aki.

Kortesia di MLB.com

Den di dos entrada selekshon di Reino ta amplia e bentaha ora ku Andrelton Simmons ta konektá un doblete pa empuha Randolph Oduber(3-2).

Kortesia di MLB.com

Tres kareda no tabata sufisiente pa e selekshon di Reino i den di seis entrada tabata Randolph Oduber ku a konektá un honron di dos kareda pa left center. Dashenko Ricardo(4-2) tabata esun ku a anotá riba e honron aki despues di a konektá un single.

Kortesia di MLB.com

Riba montikulo e selekshon di Reino a habri ku Rick van den Hurk ku a picha 4 entrada kompleto sin permití kareda. van den Hurk a keda sigui pa Diegomar Markwell ku a picha 2 entrada kompleto manteniendo e blankeo. Seguidamente a bin Shairon Maris i Tom Stuifbergen ku ámbos a picha 1 entrada sin permití kareda. Por último, Loek van Mil a sera e partido tambe pichando un entrada.

Rick van den Hurk a bai ku e viktoria den e partido miéntras ku Diegomar Markwell a risibí krédito pa wanta e partido.

Aliniashon di selekshon di Reino den e partido kontra Korea:

1. Andrelton Simmons SS
2. Jurickson Profar CF
3. Xander Bogaerts 3B
4. Wladimir Balentien RF
5. Jonathan Schoop 2B
6. Didi Gregorius DH
7. Curt Smith 1B
8. Dashenko Ricardo C
9. Randolph Oduber LF

Mañan 5’or i mei ora lokal di Kòrsou e selekshon di Reino ta hunga su di dos partido kontra Chinese Taipei.

Posted on

Didi Gregorius nombra komo ‘Chief Sport Officer’ pa Blue Bay Curaçao

WILLEMSTAD — For di awe Blue Bay Curaçao Golf & Beach Resort ta presentá su di dos CSO, ‘Chief Sport Officer’, i ala bes esun mas nobo: Didi Gregorius.

Komo ‘Chief Sport Officer’ e shortstop di New York Yankees ta bai kompartí su karakter positivo i su logronan deportivo ku e tim di direktor, e empleadonan i partnernan di Blue Bay. Ademas e lo karga e diferente evenementonan deportivo ku Blue Bay ta sostené i organisá. Gregorius ta na Kòrsou algun siman pa aña i durante di e temporada ei lo e traha ku Sepp Koster (CEO), Walter Hofstede, (CDO) i Rogier van der Meer (CCO).

Na novèmber di aña pasá Blue Bay a introdusí su promé CSO di e resort. E hòmber mas lihé den Reino Hulandes, Churandy Martina, komo ‘Chief Smile Officer’. Aña pasá ámbos CSO a sera konosí ku otro pa promé biaha durante di Curaçao Baseball Week, i e similaridatnan tabata grandi. Mesora tabata tin un klek i rèspèt mutuo pa logro di otro i tambe pa e forma di ehersé deporte, esei tabata un gran momentu pa deporte profeshonal.

Rogier van der Meer, ‘Chief Commerce Officer’ di Blue Bay: “Nos ta kere den e similaridatnan entre maneho di un empresa i deporte na nivel altu. Didi pa nos ta simbolisá esei, un atleta ku ta pone tur kos un banda pa logra e mihó i e máksimo. Enfoká riba éksito, dispuesto pa siña tur dia i únikamente satisfecho ku e logra di e esenario máksimo. Un bunita laso ku e metanan di nos resort.”

Didi Gregorius, e ‘Chief Sport Officer’ nobis nobis: “Mi ta hopi entusiasmá pa realisá huntu ku e tim di maneho di Blue Bay, Churandy Martina i tur otro empleadonan e próksimo pasonan pa Blue Bay. Enfoká riba e meta ku bo ke logra i determinashon pa hasi tu kos pa realisá esaki ta algun di e kosnan ku mi lo bai trese dilanti. Mi ta sintimi na kas na un empresa ku ta pensa na un manera deportivo manera di Blue Bay i mi ta kla pa e reto nobo aki.”

Riba 7 di mart Gregorius ta hunga su promé torneo huntu ku e tim di Reino Hulandes kontra Korea. E otro dos weganan den e promé buèlta ta kontra Taipei Chines i Israel. Tur kolega na Blue Bay lo wak e torneo ku èkstra atenshon, kaminda e ekiponan mas mihó na mundu ta enfrentá otro.

Gregorius entretantu tambe ta fanátiko grandi di gòlf i bo ta hañ’é regularmente riba e kancha di Blue Bay. Tin similaridat entre gòlf i beisbòl, i esei ya ta notabel na e swing Gregorius. Na final di e temporada di 2017 Greogorius lo por gaña wak si e ta gana un di e torneonan di gòlf di Blue Bay.

 

Posted on

Prospekto Nasya Ramirez no por partisipá mas na Flow Carifta Games 2017

WILLEMSTAD — Manera ya kaba konosí, Kòrsou ta organisadó di e Flow Carifta Games 2017. E evento di atletismo mas grandi di Caribe aki, lo tuma lugá di dia 15 pa 17 di aprel 2017.

Tin un grupo grandi di atleta hóben di Kòrsou, ku ya ta preparando pa un periodo largu pa e Carifta Games. Lamentablemente e Asosiashon di Atletismo (C.A.B) huntu ku e Komité Organisadó (StOA) ta partisipá ku e prospekto Naysa Ramirez no por partisipá mas pa motibunan médiko ku a presentá na un momento inesperá. Nasya ta un talento enorme den e disiplina bulamentu leu, i tabata nominado pa atleta di aña 2016.

Representante di e organisashonnan menshoná a bishitá Naysa resientemente na e kinderafdeling di SEHOS, i a desey’e un pronto rekuperashon.

E embahador di Carifta Games, sra Ruthline Koeiman, tambe a bishitá Naysa.

Nos ta deseá Nasya un pronto rekuperashon, i hopi mas éksito ku su karera deportivo.

Posted on

Aviandrie Kastablank Kampion Infantil di Ahedres 2017 den kategoria U10

WILLEMSTAD — Resientemente Federashon di Ahedres Kòrsou (FEDAKO) a tene su kampionato infantil di ahedres 2017 den kategoria U10. Durante e kampionato di ahedres U10 ku tambe a tuma lugá serka e patrosinadó, Trupial Inn & Casino, kada partisipante ta tin 30 minüt pa pensa durante kada wega.

Manera tabata di spera e faboritonan den e kategoria di edat aki tabata Frederic Simonis i Aviandrie Kastablank, kendenan tin 9 aña di edat. E dos rivalnan aki a enfrentá otro den e kuater buèlta, na momentu ku tur dos tabata invikto ainda.

Den un partido ku a desaroya igual, Aviandrie Kastablank ta logra sera un Alfil di Frederic Simonis pa despues kaptura esaki i drenta e parti final di wega ku un bentaha di material ku tabata sufisiente pa bai ku e viktoria.

Aviandrie a logra kaba e kampionato den forma invikto komo kampion Nashonal kategoria U10 ku 5 punto for di 5 wega. Na di dos lugá a sali Frederic Simonis ku 4 punto i na di tres lugá a termina Gilian Justiana ku 3 punto for di 5 wega.

FEDAKO a keda hopi satisfecho kon e muchanan a partisipá i disfrutá di e evento i tambe gradesido debí ku Trupial Inn Hotel a trit tur e partisipante i e mayornan presente un sukulente pizza i refresko di nan tremendo restorant. Mas aleu a parti un regalito tambe na tur e muchanan ku a partisipá promé ku nan a regresá nan kas.

FEDAKO ta sigui hasi su esfuersonan pa eksponé nos hóbennan na kompetensia sano i ta kontinuá djasabra 11 di mart próksimo ku su di tres i último kampionato infantil pa loke ta trata 2017. E último kampionato infantil lo ta den e kategoria U12 i lo tuma na sentro di bario Janwe. Durante e evento aki tur mucha bou di 12 riba 1 yanüari 2017 por partisipá.

Pa mas informashon por yama 512-0007 of por bishitá e paginá di Federashon di Ahedres di Kòrsou riba Facebook.

Posted on

Resultado di Vòlibòl

WILLEMSTAD — Vòlibòl a kontinuá ayera tardi den sala Errol Rooi na SDK despues di e break di karnaval ku poko partido hopi interesante.

Den Klase A Maskulino, Xaverianen a lucha fuerte pa gana e hóben nan di Watakeli Nagico ku skore di 2-1(25-21,17-25 i 16-140).

Green Tigers tambe ta tin mester di 3 set pa gana Titus ku skore di 21-25,26-24 i 15-9.

Den kategoria Femenino klase A, Xaverianen ta gana Titus 2-1  25-20,21-25 I 16-15 I Watakeli Nagico ta sali viktorioso riba Hurricane 25-16,25-14.

E úniko wega den klase superior ajera a bai entre Green Jewels – Hurricane . E wega a sali 3-2 na fabor di Hurricane 15-25,25-22,10-25,26-24 i 15-12.

Awe djaluna e moveshon nan  den Vòli ta sigui ku tres wega. 19.45 Den klase A Maskulino Xaverianen lo Sali kontra di Titus i na mes momento Shuatanari lo midi forsa ku Hurricane den klase Femenino A.

Pa 21.00 lo tin e promé wega di e seri mihó di tres entre Green Jewels i Hurricane pa determina e puesto #4 pa e wega nan di semi final den klase femenino Superior.

Posted on

Sorteo CONCACAF Gold Cup 2017

MERKA — CONCACAF lo revelá e gruponan di e skema di wega di Gold Cup 2017 djamars 7 di mart, 10’or di mainta na Brocade Club den Levi’s Stadium, Santa Clara California. E evento aki ta konta ku presensia di presidente di CONCACAF Sr. Victor Montagliani, e sekretario general di CONCACAF Sr. Philippe Moggio i e entrenadó ku ofisialnan di tur e paisnan ku a kualifiká pa Gold Cup 2017.

Pa representá Kòrsou na e sorteo di djamars, a biaha pa California Sr. Alexander Molina, hefe di delegashon di nos selekshon, nos ‘Head Coach’ Sr. Remko Bicentini, Sr. Pauletta, nos ‘team manager’ i Sr. Rignaal Francisca, presidente di FFK i alabes segundo vise presidente di Caribbean Football Union.

E 11 paisnan ku ya a klasifiká ta;

  1. Canada
  2. Mexico
  3. Merka
  4. Kòrsou
  5. Guyana Franses
  6. Jamaica
  7. Martinique
  8. Costa Rica
  9. El Salvador
  10. Honduras
  11. Panama

Di 24 pa 28 di mart 2017 lo tumá e seri di partidonan entre Nicaragua i Haiti di kua e ganadó lo okupá e último puesto huntu ku e otro 11 paisnan ku ya e klasifiká pa e di 14 edishon di CONCACAF su Gold Cup 2017 ku lo inisiá na luna di yüli próksimo na Merka. Tur e partidonan aki lo keda transmití bibu via Fox i Univision.

Kòrsou, Guyana Franses, Jamaica ku Martinique ta semi finalistanan di e Scotiabank CFU Caribbean Cup 2016-2017 i Costa Rica, El Salvador, Honduras ku Panama ta e tòp 4 paisnan di e Kopa Sentro-Amerikano.

E Gold Cup di CONCACAF ta tuma lugá kada 2 aña i ta e kampionato ofisial pa e regionnan di Nort ku Sentro Amerika i Karibe. E promé ronda di weganan lo tuma lugá den 9 stadion na 9 siudat di Merka di 7 pa 16 di yüli 2017. Mientras e partidonan di ‘knockout’ lo ta den 5 stadion den 5 siudat di Merka. Benta di karchi pa e gran evento aki ya a kuminsá, pa kompra por bishitá e siguiente página; www.goldcup.org.

E hungadónan ku a forma parti di e último weganan di nos selekshon ta lo siguiente;

  1. Eloy Room
  2. Rowendy Sumter
  3. Jarzinho Pieter
  4. Germaine ‘Kemy’ Agustien
  5. Jarchino Antonia
  6. Leandro Bacuna
  7. Shanon ‘Cheese’ Camelia
  8. Elson ‘Sontje’ Hooi
  9. Rangelo Janga
  10. Juriën Gaari
  11. Gino van Kessel
  12. Jason Wall
  13. Quinten Jakoba
  14. Michaël Maria
  15. Dustley Mulder
  16. Gevaro Nepomuceno
  17. Ayrton Statie
  18. Felitciano Zschusschen
  19. Christoper ‘Papa’ Isenia
  20. Ashar ‘Acha’ Bernardus

E hungadónan aki ta forma parti di nos preselekshon i nos ‘head coach’ Sr. Remko Bicentini ta trahando pa hasi nos selekshon aun mas fuerte.
Fin di mart, durante kalendario di FIFA, e selekshon lo bin huntu pa kontinuá ku training nan pa e final di e Scotiabank Caribbean Cup i despues sigui ku e Gold Cup 2017.

Posted on

Kampionato Bigleague/hubenil MCB a start tremendo na Buenavista Ballpark

WILLEMSTAD — Despues di hopi aña CSB ta start kampionato hubenil den luna di mart i pa terminá esaki den luna di mei. E akshon aki ta pa desaroyá nos hungadónan ku a kaba den liga Soraida Juliana den un liga di ku ta pertenesé hungadónan di mes un edat. Di e manera aki a eliminá ku hungadónan ta Sali for di Liga Sorida Juliana i bai hunga dirèkt den AA of klase A ku e konsekuensia ku nan ta falta nèt un parti di nan desaroyo promé ku nan dal e último stap pa hunga den nos liga máksimo.

Tur esakinan danki na e kooperashon i e trabou konhunto ku CLLS presidí pa sr. Cecil Garcia. E aña aki 6 ekipo lo kompetí den e kampionato Big/hubenil ku ta:

  1. Kanga/Youngstars
  2. Starosa/Starosa Angels 1
  3. Buenavista/Pichingolo
  4. Souax/Eagles 1
  5. Starosa/Starosa Angels 2
  6. Souax/Eagles 2

Djasabra i djadumingu tabatin e promé 2 weganan. Den e wega di djasabra e ekipo fuerte di Starosa/Starosa angels Vanddis a gana e ekipo di Buenavista MCB/Pichingolo ku skor di 15 pa 0 . Pa Starosa picher ganador a resultá Lyuska v/h Kruys i miho na bate Sandeline Reina di 1-1. Pa Buenavista/Pichingolo picher pèrdèdó Trishantely Alexandre i mihó na bate a resultá Anais Piar di 2-2.

Den e wega di djadumingu e ekipo di Buenavista MCB/Pichingolo ta gana e ekipo di Souax Persio Uniformes/Eagles 2 ku skor di 22 pa 4. Pa . Pa Buenavista/Pichingolo picher ganadó tabata Trishantely Alexandre i mihó na bate a resultá Manoriene Semeleer di 4-3. Pa Souax/Eagles 2 picher pèrdèdó a resultá Mahanaim Espinoza i mihó bate a resultá Soraida Leito di 1-1.

Danki spesial ta bai pa umpirenan Raymond Zurka, Alan Koolmayer, Norwin Moesqiet i tambe skorernan Minshenou Torregrossa i Merrien Martis ku tabata e ofisialnan di weganan big/hubenil MCB wikènt tras di lomba. Mester apuntá ku den e kategoria hubenil aki tur ofisialnan lo koperá di un forma boluntario pa e muchanan.

Posted on

Rick Van den Hurk lo Habri Mañan pa e Selekshon di Reino den WBC2017

SUR KOREA — Rick Van den Hurk a keda nombra komo a habridó pa e prome partido di e selekshon di Reino den e Klásiko Mundial di Beisbol. Mañan mainta 5’or i mei ora lokal di Kòrsou e selekshon di reino lo tin nan promé partido kontra di e selekshon Koreano den Gocheok Sky Dome.

Segun e manager di e selekshon, Hensley Meulens e la skohe Rick Van den Hurk pa habri mañan paso e ta e mihó picher ku e selekshon tin aktualmente.

Van den Hurk a keda firma na 2002 pa e ekipo di Florida Marlins aktualmente Miami Marlins. Na 2007 e picher drechi a hasi su debut den Liga Grandi. Banda di Marlins e picher di 31 aña a picha tambe pa Baltimore Orioles i Pittsburgh Pirates den Liga Grandi. Último añanan Van den Hurk tabata na Hapon ku e ekipo di Softbank Hawks.

Apesar di a derota e Koreanonan den e Klásiko di Beisbòl na 2013, “nos tin ku trese nos miho wega,” Meulens a deklara.

“Si nos no picha bon, nos no kore base, nos no batí oportuno, nos no fango e bala, nos lo no gana nan,” Meulens a añadí.

Woo Kyu-min ta e picher anunsiá pa ta riba montikulo kontra e selekshon di Reino. Kyu-min ta un picher drechi di 32 aña ku ta picha den e Liga di Beisbòl Profeshonal di Korea ku e ekipo di Samsung Lions.

E selekshon Koreano a pèrdè nan promé partido di e Klásiko ayera kontra Israel ku skor di 2-1.

Facebook Twitter Instagram Youtube
© 2024 Deporte Awe. Tur derechi reservá. Diseñá pa E² Media