Author: E. Evertsz

Posted on

Klup di atletismo Trupial – Auto City a regresá Kòrsou ku vários premio for di Puerto Rico

WILLEMSTAD — Djadumingu 5 di mart último klup di atletismo Trupial – Auto City a regresá for di Puerto Rico ku vários medaya. Ku un delegashon di 17 atleta di 6 pa 13 aña nan a gana 12  medaya di oro, 8 di plata i 5 di bròns. Ku esaki e delegashon a sali na di dos lugá komo ekipo i a gana un bunita Trofeo.

Na aeropuerto e delegashon a wòrdu risibí pa presidente di klup Trupial – Auto City, Ruthsel Martina, 2e sekretaria i vários mayor i famia di e atletanan. Tabata un momento di alegria ora e atletanan infantil a sali for di e porta di yegada. Pa vários di e atleta nan aki ta pa promé bia nan a bai un kompetensia internashonal.

Delegado Aishel Florentina tabatin bon palabra pa ku kompensashon di e atletanan. Tur mayor ku a bia ku e delegashon a duna un bon man i e ekipo di Cupey Track a trata nan hopi bon. Coach Sheldon Drummond tabatin palabra di elogio pa e atletanan ku a hasi nan bèst mei mei di e atletanan di Puerto Rico.

Tabatin 15 ekipo di Puerto Rico, 1 di St. Croix i 1 di Kòrsou pa un total di 17 ekipo ku a partisipá na e kompetensia aki. Direktiva, i mayornan ta felisitá e ateistanan aki i ta spera ku nan lo sigui ku mis un ánimo den nan deporte stima, atletismo.

Posted on

Atletanan Lokal ku lo Partisipá den Flow Carifta Games 2017 a Realisá un Tèst Médiko

WILLEMSTAD — Manera ta konosí, Kòrsou ta organisadó di e Flow Carifta Games 2017. E evento di atletismo mas grandi di Caribe, ku ta tuma lugá di dia 15 pa 17 di aprel 2017 próksimo.

Awe djadumingu 5 di mart, pa 8.30 mainta, un grupo di 34 hóben atleta di Kòrsou, ku ya ta preparando pa un periodo largu pa e Carifta Games, a pasa un tèst médiko. Ta asina ku tur e hóbennan ku lo partisipá na e Carifta Games i esnan ku ta tratando pa klasifiká pa por partisipá, mester a presentá na ofisina di Dokter van de Huls na Mahaai, pa asina realisá un chekeo médiko kompleto.

Representante di e organisashon di Carifta 2017, huntu ku mayornan di e 34 hóbennan, tabata presente pa wak kon tur kos ta kana ku e chekeo médiko. A trata aki di un chekeo médiko basta profundo, unda ku a a kontrolá e parti físiko i mental di kada atleta i asta a kue muestra di sanger pa manda laboratorio. Durante e mainta aki mes a tèst e hóbennan pa uso di droga tambe i tur nos atletanan tabata limpi. Tur atleta mester a yena un formulario unda nan ta indiká si nan ta sufri di kualke malesa i si nan ta usando kualke tipo di remedi (Pa kontrolá i evitá ku nan lo ta usando kualke supstansia prohibí).

Meskos e kuerpo médiko a kontrolá e hóbennan riba nan fleksibilidat i posibel leshon i kaminda tabatin mester a rekomendá e tratamentu nesesario. Mester remarká ku tur kos a kana hopi bon i un danki spesial ta bai na e kuerpo médiko i spesialmente na Dòkter van de Huls ku a kooperá ku nan lokalidat i nan konosementu, pa a realisá e chekeo médiko aki di nos atletanan. Meskos un danki na tur mayor i nos atletanan ku a sòru di ta na ora pa e programa por a kana segun planiá.

Posted on

FFK huntu ku Departamento di Rèfri lo organisá tremendo kurso pa rèfri hubenil

WILLEMSTAD — Próksimamente, riba djasabra 11 mart 2017, Federashon di Futbòl Kòrsou pa medio di su Departamentu di Rèfri lo organisá su promé kurso di rèfri pa e aña aki. Esaki lo ta un kurso pa bira rèfri hubenil ku lo kuminsá riba e promé djasabra di mart i lo kontinuá riba tur e 4 djasabranan den luna di mart i aprel.

E kurso lo ta na edifisio Mordy Maduro (FFK) na Brievengat i manera ariba menshoná lo bai ta riba 11, 18, 25 di mart i promé di aprel próksimo di 10’or di mainta pa 12’or di mèrdia.

E kurso aki tin komo meta pa logra haña mas rèfri hóben pa dirigí weganan di Liga Lito ku FFK ta organisá.
Ora kompletá e kurso aki lo risibí un sertifikado di partisipashon i e kurso ta kompletamente grátis.

Por inskribí te ku 10 mart na departamentu di rèfri via e-mail: referee@ffk.cw  òf via telefòn na e siguiente numbernan: 7365057, 5112915, 5128617 i 5202587.

Posted on

Klup di atletismo Trupial – Auto City a biaha pa Puerto Rico

WILLEMSTAD — Djárason 1 di mart klup di atletismo Trupial – Auto City a realisá un biahe pa Puerto Rico kaminda su atletanan infantil di 6 pa 13 aña lo kompetí den e di 16e kompetensia “Invitacional Atletismo Cupey Track 2017” djasabra awor 4 mart riba e pista Complejo Deportivo de Cupey Alto den Municipio de San Juan.

E kompetensia aki ta forma parti di e maneho di klup di atletismo Trupial – Auto City di kual tur aña nan ta organisá un òf mas interkambio deportivo den un pais den nos área. E tipo di interkambio aki a demostrá ku e ta duna un empuhe na mehorashon di resultado di su atletanan. Tur atleta di Trupial – Auto City ku e bira bon atleta a pasa den e trayektorio aki.

E delegashon ta konsistí di 17 atleta 2 lider/coach i 11 mayor ku lo yuda guia e atletanan aki. Mayoria di e atletanan aki ta kompetí pa promé bes den eksterior. E klup Cupey Track di Puerto Rico ta e promé klup ku a kuminsá 24 aña pasa ku interkambio aki i ámbos klup ta mira su probecho.

Di otro banda partisipashon na kompetensia nan den otro pais ta stimulá e klupnan aki pa bin partisipá den e kompetensia internashonal di Trupial – Auto City ku ta Trupial – Auto City Classic i Festival di Relevo. E aña aki e kompetensia lo tuma lugá dia 7, 8 i 9 di Juli den SDK. Ya tin 7 pais ku a konfirmá nan partisipashon kaba.  Dirigentenan di Trupial – Auto City ta trahando riba 2 pais nobo pa 2017.

E kompetensia di Trupial – Auto City Classic pa 2017 lo ta e di 25e edishon i tin kos nan grandi na kaminda. Ta verwacht un partisipashon grandi di e klupnan invitá. Direktiva, mayor, i rumannan di e atleta ku a bai Puerto Rico ta deseá nos atleta nan tur klase di éksito. E delegashon lo regresá Kòrsou bek djadumingu 5 mart.

Posted on

Kolegio Mgr. Willem Ellis i Skol Emmanuel a titulá kampion den ACU Deporte Eskolar

WILLEMSTAD — Resientemente a tuma lugá e wega final di futbòl pa muchanan di enseñansa di fundeshi den ACU Deporte Eskolar, tantu pa mucha muhé komo mucha hòmber, di kua e resultado tabata:

Mucha muhé:

  1. Kolegio Mgr. Willem Ellis
  2. Sta. Rosa de Lima
  3. Kolegio Don Sarto

Hungadónan mas balioso pa mucha muhé, esakinan a resultá Kishana Mathilda di Mgr. Willem Ellis i Reesha Gerard di Sta. Rosa de Lima. Skol mas disipliná a resultá Kolegio San Hose.

Mucha hòmber:

  1. Skol Emmanuel
  2. Broeder Rigobertus School
  3. Ala Blanka

Pa loke ta mucha hòmber, e hungadónan mas balioso a resultá Aaron Maduro di Skol Emmanuel i Jomendryk Mingueli di Broeder Rigobertus School. Skol mas disipliná a resultá Kolegio Mgr. Willem Ellis.

E tim ganadó di mucha muhé, Kolegio Mgr. Willem Ellis, lo representá Kòrsou den weganan interinsular na Aruba dianan 6 pa 9 di aprel próksimo.

FDDK ta felisitá no solamente e skolnan ku a kai den premiashon, pero tur ku a partisipá na e disiplinanan di futbòl pa enseñansa di fundeshi den ACU Deporte Eskolar i ta spera di sigui konta ku boso partisipashon. Ta huntu nos ta deporte, i huntu nos ta Kòrsou!

Pa keda na altura di tur akontesimentu den kuadro di ACU Deporte Eskolar, sigui e página di Facebook, www.facebook.com/DeporteEskolar.

Posted on

Start Kampeonato CurFutsal 2017

WILLEMSTAD — Direktiva di CurFutsal ta partisipá na su famia di Futsal ku kampeonato 2017 ta bai start ku wega nan interesante i kayente.

E ekipo nan ta repartí den Divishon A ku Divishon B.

10 Ekipo den Divishon A, ku ta e Divishon máksimo i 10 Ekipo den divishon B ku 2 ekipo nobo.

Ekiponan Divishon A:

1. Don Bosco
2. FC San Lucas
3. The Warriors
4. FC RO (ex-NOJO)
5. Ocean View 01
6. FC BABRanis01
7. FCCE UNITED
8. Sta. Helena
9. Sparta FC
10. FC IGA

Ekipo nan Divishon B:

1. Ocean View Elite
2. Securitas Antias
3. FCF
4. FC BABRanis02
5. Five Stars
6. Panteras Negras
7. FC FABARMA
8. CELESTIAL BOYS
9. Excellent
10. FC Domi

Promé Partidonan kampionato CurFutsal ta djaweps 02, djabièrnè 03, djasabra 04 di mart 2017 den sala Niels Liberia na Suffisant.

Djaweps
02-03-17
20:00 PANTERAS NEGRAS v/s SECURITASANTIAS
21:00 STA. HELENA v/s FCCE UNITED
22:00 EXCELLENT v/s FIVE STARS

Djabièrnè
03-03-17
20:00 OCEAN VIEW ELITE v/s CELESTIAL BOYS
21:00 FC SAN LUCAS v/s OCEAN VIEW 01
22:00 FC IGA v/s SPARTA FC

Djasabra
04-03-17
18:00 FC BABRANIS 02 v/s FCF
19:00 FC RO( ex-NOJO) v/s THE WARRIORS
20:00 FC DOMI v/s FC FABARMA
21:00 FC DON BOSCO v/s FC BABRANIS 01

Posted on

Promé Torneo di Tènis di Mesa

WILLEMSTAD — Djamars último 21 di Febrüari  FTMK a start ku su promé torneo di tènis di mesa den Sala Rekreo Irene Moreno na Muizenberg. Tabata trata di e Torneo Donic ku tur aña bèk ta riba kalendario. Otro aña Donic aki na Kòrsou komo organisashon ta selebrá 30 aña loke su dirigente sr. Franklin Mathilda a informá na ora di entrega di premio.

E torneo ku ta un Men Single Event, e biaha aki tabatin 17 inskripshon i  a ser hungá pa medio di un knock-out system. Tabatin diferente partido na hopi bon nivel kaminda a lucha tambe pa un posishon bo for di tempran riba e ranking ku ta determiná na final di aña e MVP.

Mester hasi menshon ku Jaysron Mathilda ku al final ta bira un di e 2 finalistanan a pasa den masha pèrta den 2 partido sigui. Tantu kontra Erwin Sophia komo Henny Metry e ta kai atras 2-0 pa bin bèk despues ganando e partidonan. Di otro banda Dimitri Leon tabata ganadó su partidonan den gran forma sin muchu doló di kabes.

Den final ku si tabata un partido di miho di 7 fanátikonan por a mira wega ku hopi rèli largu i por a disfrutá di nan. Jaysron a sali masha bon mes ku tremendo wega, kaminda Dimtiri no por a hasi mucho kayendo atras 3-0. Na e skore di 3-1 Jaysron por a kaba e wega, kaminda e tabatin bentaha di 10-8, pues ku un Match Point.  Aki gasolin a kaba ku Jaysron, kaminda falta di sufisiente kondishon a hunga un ròl.   Dimitri ta sa di gana e wega aki pa despues gana e siguiente 2 nan i bai ku e título. Skore final 4-3 ku parsialnan: 8-11, 8-11, 11-13, 11-7, 12-10, 11-5, 11-6.

Posted on

Domeinbeheer a Duna Inisio Ofisial Na Konstrukshon Di E Área Di Rekreashon I Deporte Na Kas Grandi

WILLEMSTAD — Djaweps 16 di febrüari Minister Suzy Camelia – Römer i Domeinbeheer a duna inisio na trabounan di konstrukshon di e área di rekreashon i deporte na Kas Grandi. Tambe presente tabata habitantenan di e área, representantenan di Plataforma Bándariba i representantenan di Fundashon Kompleho Deportivo Casa Grande (KODEKAG).

Representantenan di MNO Vervat, Curaçaose Wegenbouw Maatschappij, Aliansa Civil & Roadworkers BV i LB Constructie, ku ta bai traha riba e proyekto, a splika ku e proyekto tin gran balor tantu pa e komunidat di Kas Grandi komo pa nan komo kontratista mes. Pa nan e proyekto ta un oportunidat mas pa kontratistanan lokal uni i yuda ku desaroyo di Kòrsou.

Domeinbeheer ta desaroyadó prinsipal di e proyekto aki i den koperashon ku Lyongo Architecture a logra yega na un diseño adekuá pa e área di rekreashon. Despues ku a tene un anochi di informashon na luna di yüli aña pasá, unda Domeinbeheer a presentá e konsepto di e proyekto di desaroyo i risibí remarkenan konstruktivo serka habitantenan di e área, a yega porfin na komienso di e fase di konstrukshon. CCM Engeneering ta e kompania enkargá ku kordinashon di e proyekto.

Minister Suzy Camelia – Römer, Domeinbeheer huntu ku kontratistanan i algun habitante di e área, a duna inisio na e konstrukshon di forma ofisial ku un akto simbóliko i un selebrashon ameno. Komo akto simbóliko a desvelá e bòrchi di proyekto situá dilanti di e área di rekreashon i deporte, kual ta mustra imágen di e plan di desaroyo. Esaki ta un di e proyektonan mas ku ta forma parti di Domeinbeheer su trayekto di optimalisashon ‘Rumbo pa Ekselensia’.

Posted on

Kampionato Infantil di Ahedres

WILLEMSTAD — Djasabra awor 25 febrüari Federashon di Ahedres Kòrsou (FEDAKO) ta sigui ku su di dos kampionato di grupo infantil pa loke ta trata 2017.

E djasabra aki ta e muchanan di kategoria U10 ta toka turno pa kompetí na Hotèl Trupial Inn.

Manera ta konosí kaba, e aña aki ta Trupial Inn Hotèl ta patrosinadó i anfitrion pa e kampionatonan Infantil di ahedres.

Durante e evento di e wikènt aki pa grupo U10, por partisipá esnan ku riba e fecha di 1 di yanüari 2017 ta tin 9 aña òf tabata mas hóben di edat.

E evento di djasabra awor lo bira hopi interesante, debí ku den e grupo U10 tin bários bon prospekto ku lo partisipá i e ganadónan di U8 tambe lo tei pa midi nan forsa den e grupo U10. Tempu pa pensa pa gruponan infantil lo ta 30 minüt pa kada mucha durante kada wega i no ta nesesario pa hasi anotashon di wega.

Partisipantenan mester ta presente 09:30 ‘or na Hotèl Trupial Inn pa registra i paga fl. 5,– di inskripshon. Lo tin diferente premio pa

partisipantenan i tambe posibilidat pa klasifiká pa e próksimo kampionato di un grupo di mas edat.

Un invitashon ta bai na un i tur pa pasa mira nos muchanan den akshon. Pa mas informashon por yama 512 0007 of manda un whatsapp.

Facebook Twitter Instagram Youtube
© 2024 Deporte Awe. Tur derechi reservá. Diseñá pa E² Media