Author: E. Evertsz

Posted on

Messi promé hungadó ku ta anotá sinku gol!

Pa tur loke Lionel Messi a logra den su karera te ku awor, nunka e no a hinka sinku gol den un wega profeshonal. Tampoko nunka niun hende no hinka sinku gol den un wega di Liga di Kampion nan. Pero ayera Messi a kita e dos kos nan aki for di riba su lista. Ku su sinku gol nan Messi a yuda Barcelona gana ku un skor di 7-1 riba Bayer Leverkussen.

Na un momento dado Messi a bira e promé hungadó ku ta hinka kuater gol den un wega di Liga di Kampion nan pero Messi tabata tin otro plan anotando su di sinku gol.

Den e tabla ku ta siguí bo por mira e lista di hungadó nan ku mas gol den un wega di Liga di Kampion nan promé ku Messi a tuma e liderazgo.

Hungadó Ekipo Aña
Marco van Basten AC Milan 25-11-92
Simone Inzaghi S.S. Lazio 14-03-00
Dado Prso AS Monaco FC 05-11-03
Ruud van Nistelrooy Manchester United FC 03-11-04
Andriy Shevchenko AC Milan 23-11-05
Lionel Messi FC Barcelona 06-04-10

Ku e sinku gol nan anotá, Messi ta pone su mes den bon posishon pa kibra un otro rèkòrt den Liga di Kampion nan. Aktualmente e rèkòrt di mas gol anotá durante di e kompetensia di Liga di Kampion nan ta 12. Durante e temporada ku a pasa Messi a logra anotá 12 gol i durante e temporada di 2002/2003, Ruud van Nistelrooy tambe a hasi esaki. Despues di gana di Leverkussen, Barcelona tin por lo mínimo dos wega mas garantisá, kaminda Messi por kibra e rèkòrt aki.

Posted on

Merka ta designa Korsou komo pais grandi den labamentu di plaka!

Kòrsou i St. Maarten a wòrdu designa komo “paisnan ku hopi labamentu di plaka” segun un reporte di Departamento di Estado Merikano. E reporte anual yama “Strategia pa Kontròl Internashonal di Narkótiko a subi Kòrsou i St. Maarten for di e kategoria di “hurisdikshon di prekupashon” pa e kategoria di “hurisdikshon di prekupashon primario.”

Ku esaki Kòrsou i St. Maarten ta uni nan mes na un lista amplio di 66 pais ku ta inkluí Afghanistan, Oustralia, Brazil, Isla nan Kaiman, China, Hapon, Rusia, Reino Uni, Merka, Uruguay i Zimbabwe.

Segun e reporte e pais nan aki a bira “pais nan grandi den labamentu di plaka,” òf “pais ku nan instituto nan finansiero ta partisipá den transakshon nan di plaka for di kua un gran parti ta prosedente di trafikashon internashonal di narkótiko.”

Klik aki pa e reporte riba Kòrsou

Posted on

Tremendo futuro pa Didi Gregorius

Segun e kolumnista di MLB.com Bernie Pleskoff, Didi Gregorius ta un batido surdu ku ta hunga den kuadro ku un sintimentu inkreibel pa e wega di beisbòl. Su kordinashon di pia i instinto ta na nivel di liga grandi. Usando un promé stap hopi lihé, Gregorius su alkanse pa tur dos banda di kuadro ta sólido. Ku shortstop komo su posishon natural, Gregorius fásilmente ta reta Zack Cozart i Paul Janish pa tempu di wega den futuro.

Algun hende por kuestioná Gregorius su abilidat pa bati picheo di liga grandi. Pero segun Pleskoff, Gregorius tin un swing natural di liña, ku man nan hopi lihé na plato. Su kobertura di plato ta ekselente i pa un hungadó hóben, picheo nan ku ta kibra riba plato no ta gaña Gregorius.

Pleskoff ta siguí bisa ku Gregorius mester di eksperensiá i ripitishon, pero e tin un chèns di bira un hungadó speshal. Ku mas eksperensia, Gregorius lo hunga i bati su kaminda pa liga grandi. Tin ora Gregorius ta parse muchu agresivo, pero Gregorius lo no wòrdu ninga, Pleskoff a tèrminá bisando.

Temporada pasa Gregorius a hunga tantu den klase A komo den dòbel A i  e la bati pa un averahe kombiná di .289 ku shete honron i 44 kareda empuhá.

Posted on

Renk nan di FIFA pa luna di mart a sali!

Awe djarason FIFA a publiká e posishon nan den kua kada ekipo nashonal ku ta miembro di FIFA ta keda di renk. Den e tòp 10 ekipo nan nashonal tabata tin algun kambio kompará ku luna di febrüari. Despues ku Hulanda a gana Inglatera siman pasa, Hulanda a move pa number dos, mandando Alemania pa di tres lugá. Brazil tambe a subi dos lugá, bayendo na posishon sinku i mandando Inglatera i Portugal na number seis i shete respektivamente. Mexico ta keda e ekipo mas haltu di renk den CONCACAF na number 22, miéntras ku kampion mundial Spaña ta keda na promé lugá pa di shete luna konsekutivo. Kòrsou ta bai un puesto atras kompará ku luna di febrüari i awor ta di renk na posishon 154 di mundu.

Posted on

Valcke ta pidi diskulpa na Brazil!

Sekretario general di FIFA Jerome Vlacke a pidi diskulpa na Brazil despues ku e la kritiká Brazil públikamente riba preparashon nan pa mundial di futbòl Brazil 2014. Den un karta Valcke a bisa, “mi ta presentá mi diskulpa na tur hende ku a keda ofendí pa mi komentario nan.” Segun Valcke ta un fayo ku a wòrdu kometé den e tradukshon di su komentario nan na franses pa portugues a trese malkontentu na Brazil.

Klik aki pa lesa e karta di Jerome Valcke

Posted on

Selekshon Hulandes na torneo St. Peterburg International Baseball

Awe e selekshon Hulandes ku a sali kampion na Panamá aña pasa den mundial di beisbòl ta kuminsá su partisipashon na e torneo St. Petersburg International Baseball. E torneo aki ta un torneo ku ta wòrdu organisá tur aña i e aña aki seis ekipo di liga grandi lo hunga kontra Hulanda, Canada i Merka. Awe e selekshon Hulandes lo tin su promé wega kontra Canada.

E siguiente hungadó nan ta forma parti di e ekipo Hulandes ku a biaha pa St. Petersburg, Florida:

Kuerpo tékniko:
Brian Farley – manager
Steve Janssen – coach
Wim Martinus – coach
Tjerk Smeets – coach
Ben Thijssen – coach

Picher (12):
David Bergman (Corendon Kinheim), Leon Boyd (Burnaby Bulldogs, Canada), Dennis Burgersdijk (Mr.Cocker HCAW), Rob Cordemans (L&D Amsterdam), Berry van Driel (DOOR Neptunus), Diegomar Markwell (DOOR Neptunus), Steven van Groningen (Corendon Kinheim), Kevin Heijstek (DOOR Neptunus), Tim Roodenburg (DOOR Neptunus), Nick Stuifbergen (L&D Amsterdam), Kyle Ward (UVV) i Orlando Yntema (UVV).

Kècher (3):
Danny Arribas (DSL Pirates), Quentin de Cuba (Corendon Kinheim) i Bas Nooij (L&D Amsterdam).

Infielders (8):
Jeffrey Arends (DOOR Neptunus), Michael Duursma (Vaessen Pioniers), Bryan En-gelhardt (Corendon Kinheim), Roeland Henrique (L&D Amsterdam), Dwayne Kemp (DOOR Neptunus), Gyenuar Lopez (Vaessen Pioniers), Mark Jan Moorman (Vaessen Pioniers) i Vince Rooi (L&D Amsterdam).

Outfielders (5):
Shaldimar Daantji (DOOR Neptunus), Eugene Kingsale (DOOR Neptunus), Bas de Jong (L&D Amsterdam), Rafael Jozefa (DOOR Neptunus) i Danny Rombley (UVV).

Posted on

Centro Dominguito Ta Gana!

E kampionato di promé divishon di futbòl a kontinuá i ayera nochi riba tereno di Federashon Futbòl Kòrsou, Centro Dominguito a topa Subt. Den e partido aki Centro Dominguito a logra un viktoria di 2-0. Rolando Martina a anotá tur dos gol pa Centro Dominguito. E promé gol a wòrdu anotá den promé mitar i despues den di dos mitar Martina ta amplia e bentaha di Centro ku un di dos gol. Djarason 8’or di anochi e kampeonato di FFK ta kontinuá kaminda Hubentut Fortuna ta enfrentá Victory Boys.

Posted on

Base Yen!

Jair Jurrjens

Jair Jurrjens a picha den su promé wega di Spring Training sin ningun molèster na su rudia drechi. Jurrjens a bisa, “mi tabata purba na haña e sentimentu di pusha for di riba montikulo i no sinti molèster na e rudia i na mi persepshon mi a logra den esaki.”

Jurrjens tabata tin 47 picheo i a wòrdu karga ku dos kareda i tres hit. Tambe Jurrjens a poncha unu i permití un base por bola.

Andrelton Simmons

Den e partido aki Andrelton Simmons tambe a mira aktuashon. Simmons tabata tin un turno na bate den kua e la konektá un tripel empuhador di un kareda.

Didi Gregorius

Di otro banda e otro hóben yu di Kòrsou prospekto di Cincinnati, Didi Gregorius no a keda atras. Gregorius tabata tin un turno na bate den e partido di Cincinnati kontra Cleveland i a konektá un doblete. Den un wega ‘B’ kon Cincinnati a hunga, Gregorius a konekta un tripel i asina empuhando dos kareda.

Roger Bernadina

Roger Bernadina ku ta luchando pa un posishon den e ekipo di Washington Nationals tambe a mira aktuashon awe. Berndadina tabata tin dos turno na bate den kua e la haña un base por bola i konektá un hit.

Posted on

Tenshon entre FIFA i Brazil!

Den siman tras di lomba, sekretario general di FIFA Jerome Valcke a krítika Brazil públikamente riba nan preparashon nan pa Kopa Mundial 2014. Valcke no ta komprondé dikon kos nan no ta kanando i tur preparashon ta kana retrasá.

Brazil su minister di deporte, Aldo Rabelo, a yama e komentario nan di Valcke inapropiá, ofensivo i inakseptabel. E ministerio a siguí bisa ku nan lo entrega un karta na presidente di FIFA Sepp Blatter indikando ku Brazil lo no siguí traha ku Valcke i pa puntra FIFA pa apuntá un representante nobo.

Segun eks kampion mundial i aktual kongresista Romario, nos kara lo ta na bèrgwensa ku e aeropuerto nan na Brazil si trabou nan no kuminsá lihé. Pa ta sinsero. Mi ta purba na keda positivo i spera ku esaki lo no pasa Romario a terminá bisando.

Posted on

Futbol Prome Divishon ta sigi!

Despues ku Stadion Ergilio Hato no ta disponibel te ku final di e luna aki pa motibu di konstrukshon i renobashon di e lus nan, tòg Federashon Futbòl Kòrsou a haña manera pa sigui ku e partido nan di Promé Divishon.

Djasabra Jong Holland a tabla kontra Undeba ku un skor final di 0 – 0, miéntras ku ayera nochi Sithoc a gana ku skor di 5 – 0 kontra Vesta.

Awe nochi Centro Dominguito ta topa Subt riba tereno di Federashon Futbòl Kòrsou.

Facebook Twitter Instagram Youtube
© 2024 Deporte Awe. Tur derechi reservá. Diseñá pa E² Media