E. Evertsz, redaktor pa Deporte Awe

November 26, 2011

Pedido pa Floyd Mayweather ta sigui subi!

Manera Deporte Awe! a relatá anteriormente Floyd Mayweather Jr. ku te ainda ta invikto i ku a gana di forma kontorversial di Victor Ortiz ya kaba a separá MGM Grand hotèl i kasino pa sinku di mei 2012. Apesar di esaki ainda Mayweather no tin kontrinkante pa e fecha aki.

Maske mayoria di e fanátiko nan di bòkseo ke mira Mayweather enfrentá Manny Pacquiao tin hopi bòksdó ku tin algu otro den mente. Amir Khan ta un di e bòksdó nan ku a bisa ku ta dispuesto na subi di peso pa asina enfrentá Mayweather. Tambe tin papia di e posibel pelea di Saul “Canelo” Alvarez kontra Mayweather of tambe di Erik Morales kontra Mayweather.

Banda di e bòksdó nan aki, Robert Guerrero tambe a bin aserka komo posibel kontrinkante di Mayweather. Aktualmente Guerrero ta rehabilitando un skouder ku e la leshoná i ta pendiente pa drenta rin mas pronto ku ta posibel.

Den un entrevista ku boxingscene.com Guerrero a bisa ku e ta meresé e pelea paso e ta den su mihó forma i e tin e abilidat pa bringa di pa den. Pero mas importante ku un kontrinkante defensivo manera Mayweather bo mester tin bon kondishon i e abilidat di tira hopi moketa. Segun Guerrero e biaha ku e la tira mas tantu moketa tabata den su pelea pa titulo mundial kontra Malcolm Klassen kaminda e la tira kasi 1300 moketa.

November 23, 2011

Ryan Braun mas balioso den Liga Nashonal!

E left fielder di Milwaukee Brewers, Ryan Braun ku su bateo oportuno a yuda Brewers gana e titulo di Liga Nashonal Sentral a wòrdu premio ku e premio di Hungadó Mas Balioso den Liga Nashonal pa e Asosashon di Eskritor di Beisbòl. Braun a terminá temporada ku un averahe di .332, 109 kareda anotá, 111 kareda empuhá i 33 honron.

November 22, 2011

Cotto-Margarito ta kla pa New York!

Dia tres di desèmber próksimo mester tuma lugá e revancha entre Miguel Cotto i Antonio Margarito na Madison Square Garden New York. For di dia 19 di sèptèmber e promoshon pa e pelea aki a kuminsá i a hiba kuné ku tur karchi pa e pelea aki ta serka di kaba. Tur fanátiko di bòkseo a keda straña e siman aki ora e Komishon Atlétiko di Estado New York a anunsiá ku nan lo no lisensia Margarito pa bringa na New York.

E motibu dikon nan no ke lisensia Margarito ta pa un leshon ku Margarito a haña na su wowo drechi, aña pasa den e pelea kontra Manny Pacquiao. Den un reunion e Komishon Atlétiko di Estado New York a yega na un akuerdo ku nan lo lisensia Margarito si e bin New York pa un eksamen mediko ku un dokter di nan eskoho.

Esaki a sosodé i djaluna ku a pasa ei Margarito a biaha for di kaminda e ta train na Mexico City pa New York. Mesora e ora ei e Komishon Atlétiko di Estado New York a pone un reunion riba agènda pa awe djamars kaminda nan lo presentá e konklushon di e eksamen médiko. Den e deliberashon di e Komishon Atlétiko di Estado New York nan a konkluí ku Margarito a pasa e eksamen médiko i konsekuentemente ta keda lisensia pa bringa na New York.

E promotor di e pelea Bob Arum tabata wanta su kurason pa e desishon di e Komishon Atlétiko di Estado New York. E motibu di esaki ta paso aunke Arum tabata tin otro sitio nan disponibel pa e pelea tuma lugá, awe Cotto a duna di konosé ku e no ta bringa niun otro kaminda ku no ta na New York.

“Mi a firma pa e pelea aki tuma lugá na New York. Mi no a firma pa bringa niun otro kaminda. Mi ke bringa na New York. Mi no ta bai presentá mi mes na niun otro komishon di estado ku no ta di New York.”

“No ta kuestion di duna bentaha na niun hende. Ta kuestion di hasi loke ta korekto i esei ta bringa na New York”, Cotto a sigui bisa.

November 21, 2011November 21, 2011

Justin Verlander ku dobel premiashon pa sera e tripel korona!

No mas ku un siman pasa e picher di Detroit Tigers, Justin Verlander a wòrdu elegí unánimamente pa e premio Cy Young i awe e la añadí e premio di Hungadó Mas Balioso den Liga Amerikano. Verlander di 28 aña di edat a bira e promé picher habridó den 25 aña ku ta gana e premio di Hungadó Mas Balioso i solamente e di dos hungadó den historia ku ta gana tres premio diferente di e Asosashon di Eskritor di Beisbòl. Ademas di e dos premio nan ku Verlander a gana e aña aki e la gana e premio di nobato di aña na 2006 pa asina sera e tripel korona.

November 21, 2011September 27, 2013

Gregory Halman asesiná na Hulanda!

Manera kos ta bayendo esaki sigur no ta un bon aña pa hungadó nan di beisbòl profeshonal ku ta regresá nan pais natal despues di temporada. Un par di siman pasa e kècher Venezolano di Washington Nationals Wilson Ramos a keda sekuestrá na Venezuela dor di antisosial nan. Awe den ora nan di mardugá e hóben Hulandes prospekto di Seattle Mariners, Gregory Halman ta keda asesiná.

Segun un komunikado emití pa polis di Rotterdam, algu pasa di mitar di seis nan a risibí un yamada indikando un hinkamentu na Jan Sonjestraat. Na yega di polis nan a topa Halman seriamente herida i mesora huntu ku personal di ambulans a purba reanim’é pero sin resultado.

Na e kas mesora un sospechoso a keda detené i a wòrdu hiba pa warda di polis pa interogashon. Te ainda no ta konosí kiko e motibu di e hinkamentu tabata.

Segun vershon nan èkstraofisial e hóben Gregory Halman tabata den un apartamentu ku un amiga femenino i mester a bai na un apartamentu abou pa reklamá e habitante riba molèster di sonido duru. Akinan mester a kuminsá un diskushon i e habitante Jason Halman ku ta ruman di Gregory mester a hink’é ku konsekuensia fatal.

Halman a hunga 40 wega ku e ekipo di tripel A di Seattle Mariners den 2011. Den e 40 wega nan aki e tabata tin un averahe di .299 den 177 turno na bate i a konektá 14 doblete, un tripel i tres honron. Ku Seattle Mariners mes Halman a hunga den 35 wega ku un averahe di .230 den 87 turno na bate i a konektá dos doblete, un tripel i dos honron.

November 20, 2011

Fanatiko nan ke mira Mayweather kontra Pacquiao!

Manera Deporte Awe! a relatá anteriormente, ainda aña no a kaba i ya hopi fanátiko di bòkseo tin nan bista ta riba 2012. Floyd Mayweather Jr. ku te ainda ta invikto i ku a gana di forma kontorversial di Victor Ortiz ya kaba a separá MGM Grand hotèl i kasino pa sinku di mei 2012. Apesar di esaki ainda Mayweather no tin kontrinkante pa e fecha aki. E fanátiko nan di bòkseo ke mira Floyd Mayweather kontra Manny Pacquiao.

Den un enkuesta hasi pa RingTv.com e gran mayoria di enkuestado nan a bisa ku nan ke mira Mayweather bringa kontra Pacquiao. Den e enkuesta e fanátiko nan a ser puntra ken Manny Pacquiao mester enfrentá próksimamente i di e 14.218 kontestashon nan 10.640 fanátiko a bisa Mayweather. Un kantidat chikí di 2.116 fanátiko a bisa Juan Manuel Marquez.

Lo ke ta straño ta ku den e opshon nan no ta aparesé Amir Khan. Amir Kahn a duna di konosé ku e ta plania pa subi peso i bai Welterweight i asina buska e posibilidat pa bringa kontra Mayweather. Si Khan ta dispuesto pa bringa Mayweather anto e ora ei e mester ta dispuesto pa bringa Pacquiao i ta interesante pa sa kiko e fanátiko nan ta pensa di e pelea aki.

November 19, 2011

Ekspanshon di Playoff!

Despues di hopi deliberá porfin ta asina leu ku kisas ya den 2012 Beisbòl Liga Grandi lo ekspandé su formato di playoff. E playof aktual ta konta ku un formato di tres nivel i ocho ekipo. Den e ekspanshon lo bai tin un formato di kuater nivel i 10 ekipo.

E idea di Beisbòl Liga Grandi ta pa añadí dos wild-card mas huntu ku e dos nan ku tabata tei kaba. Den kada liga, e dos ekipo wild-card nan lo enfrentá otro den un playoff di un wega. E ganadó di e playoff di un wega aki ta sigui pa e siguiente buèlta.

Den pasado ta konosí ku ekipo nan manera New York Yankees i Boston Red Sox a friwil den final di temporada sabiendo ku nan tur dos di tur manera lo pasa pa playoff. Ku e ekspanshon aki bo ta evitá esaki i ekipo nan ta haña nan obligá di duna tur ku nan tin pa gana nan divishon i evitá ku nan tin ku hunga e playoff di un wega aki.

November 19, 2011

Posibel mudansa Cotto-Margarito!

No ta na sierto parti di mundu, ni tampoko no ta sierto organisashon nan so ta warda kos pa último ora. Tin biaha ta esun nan ku ménos bo a spera ta warda kos pa último ora. Estádos Unídos ta konosí pa su bon maneho di evento nan grandi i un parti grandi di e bon maneho aki ta basa riba puntualidat. Pero ta parse ku e Komishon Atlétiko di Estado New York (NYSAC) ta karesé di e abilidat aki.

E motibu dikon nan no ke lisensia Margarito ta pa un leshon ku Margarito a haña na su wowo drechi, aña pasa den e pelea kontra Manny Pacquiao. Sin ku e Komishon Atlétiko di Estado New York lisensia Margarito e pelea di dia tres di desèmber no por tuma lugá na New York.

Loke ta straño ta ku e Komishon Atlétiko di Estado New York nunka no tabata tin problema pa e pelea aki tuma lugá na New York. Den e gira promoshonal pa e pelea Melvina Lathan e presidente di e Komishon Atlétiko di Estado New York a bisa ku e ta masha kontentu ku e pelea ta tuma lugá na New York i ku e lo ta e tremendo show.

Tumando nota di esaki mesora ta bin e pregunta di kon ta awor numa, ku ta mas òf ménos dos siman promé ku e pelea e Komishon Atlétiko di Estado New York ta trese esaki dilanti?

Miéntras tantu e Komishon Atlétiko di Estado New York a reuní i a akordá ku si Margarito ke wòrdu lisensia na New York, un dòkter selekshoná pa e Komishon Atlétiko di Estado New York mester eksaminá Margarito i si e resultado ta positivo e pelea ta sigui na New York. Apesar di esaki Bob Aruma promotor di e pelea a bisa ku e tin kuater otro sitio di back up den kaso ku e pelea no sigui na New York.

November 17, 2011

Mayweather kontra Pacquiao den 2012?

Ainda 2011 no a kaba i te ainda a keda algun bon pelea di bòkseo pa e aña aki. Fin di siman tin Julio Cesar Chavez Jr. kontra Peter Manfredo Jr pa e titulo di WBC. Sigiuentemente tin Saul Alvarez kontra Kermit Cintron, Miguel Cotto kontra Antonio Margarito, Amir Khan kontra Lamont Peterson i tambe Wladimir Klitschko kontra Jean Mark Mormeck.

Apesar di tur e pelea nan aki hopi fanátiko ya nan bista ta riba 2012. Floyd Mayweather Jr. ku te ainda ta invikto i ku a gana di forma kontorversial di Victor Ortiz ya kaba a separá MGM Grand hotèl i kasino pa sinku di mei 2012. Apesar di esaki ainda Mayweather no tin kontrinkante pa e fecha aki. E fanátiko nan di bòkseo ke mira Mayweather kontra Pacquiao.

Segun Freddy Roach entrenadó di Manny Pacquiao, e no ta disidí riba ken Pacquiao ta bringa kontra dje i tur kos ta den man di e promotor Bob Arum. Roach ta sigui bisa ku e no a papia ku Pacquiao riba su siguiente pelea kiermen ku e no por bisa kiko Pacquiao mes ke.

Den un entrevista ku Yahoo! Sports, Bob Arum promotor di Manny Pacquiao a bisa ku e no ta dispuesto pa papia riba un posibel pelea di Mayweather kontra Pacquiao awor aki. Arum a bisa ku awor aki e su skedjel ta yen ku promoshon di Chavez Jr. kontra Manfredo Jr. i Cotto kontra Margarito.

Despues di e pelea di Pacquiao, djasabra último ei Arum a bisa ku e ta preparando pa un di kuater pelea entre Pacquiao i Marquez. Segun e CEO di Golden Boy, Richard Schaefer a bisa Yahoo! Sport, ta parse manera ku Arum no ta interesá den e pelea di Mayweather kontra Pacquiao.

Kiko lo pasa si e pelea di Mayweather kontra Ortiz no konkretisa? Amir Kahn a duna di konosé ku e ta plania pa subi peso i bai Welterweight i asina buska e posibilidat pa bringa kontra Mayweather. Pero segun Floyd Mayweather Sr., Khan no ta kla pa bringa Mayweather ainda.

Apesar di un viktoria kontra Lamont Peterson, Amir Khan tin ku bai duna e prestashon di su bida den ring dia 10 di desèmber. Den e pelea aki Khan no tin ku solamente sali viktorioso pero mustra tambe ku e ta kla pa un posibel pelea kontra Mayweather Jr.

November 17, 2011

Clayton Kershaw e mihó den Liga Nashonal!

E picher slengu di Los Angeles Dodgers, ganadó di Tripel Korona den picheo ku mas tantu viktoria den liga (21), kareda permití (2.28) i ponche (248) awor tambe a gana e premio di Cy Young ku ta keda otorgá pa e Asosashon di Eskritor di Beisbòl.

E resultado di e votashon tabata lo siguiente:

Hungadó, Ekipo	1	2	3	4	5	Puntuashon
Clayton Kershaw, Los Angeles Dodgers	27	3	2			207
Roy Halladay, Philadelphia Phillies	4	21	7			133
Cliff Lee, Philadelphia Phillies		5	17	9	1	90
Ian Kennedy, Arizona Diamondbacks	1	3	6	18	3	76
Cole Hamels, Philadelphia Phillies				2	13	17
Tim Linceceum, San Francisco Giants				1	5	7
Yovani Gallardo,Milwaukee Brewers				1	3	5
Matt Cain, San Francisco Giants				1	1	3
John Axford, Milwaukee Brewers					2	2
Craig Kimbrel, Atlanta Braves					2	2
Madison Bumgarner, San Francisco Giants					1	1
Ryan Vogelsong, San Francisco Giants					1	1