E. Evertsz, redaktor pa Deporte Awe

October 26, 2011

Texas òf San Luis? Un Analisis di Partido #6.

Texas a bin di atras pa tuma liderazgo den e seri mihó di shete kontra San Luis. Pero San Luis tin Texas kaminda nan ke, den un teritorio hopi familiar kaminda kasi semper San Luis ta sali viktorioso. Texas di otro banda tambe tin San Luis dominá i si San Luis ke gana Seri Mundial nan tin ku hasi algu ku Boston Red Sox a logra hasi ku Texas. Ken lo gana e seri? Texas òf San Luis? Ban analisá.

Esaki ta di 62 biaha ku Seri Mundial ta para na 3-2. Di e 61 biaha nan anterior, e ekipo ku ta ariba 3-2 a logra gana wega 6, 24 biaha (39.3%). Adishonal, di 61 biaha e ekipo ku ta ariba 3-2 a logra gana Seri Mundial 41 biaha (67.2%).

San Luis Cardinals tabata abou 3-2 den Seri Mundial na sinku okashon previo. Den e aparishon nan ei San Luis a logra gana e di seis partido tur biaha ku eksepshon di aña 1930 kontra Philadelphia Athletics. E Seri Mundial di 1930 tambe tabata e úniko biaha den sinku aparishon ku San Luis a pèrdè Seri Mundial despues di tabata atras 3-2.

Un ekipo a logra bin bek i gana Seri Mundial ora nan ta atras 3-2 den e formato aktual di mihó di shete na 18 okashon.

San Luis Cardinals ta e di 33 ekipo den historia di Seri Mundial ku ta atras 3-2 i hungando e di seis partido di e seri na kas.

Di e otro 32 biaha nan e ekipo ku ta abou 3-2 tin un rekòrt di 23-9 den e di seis partido. E último biaha ku e senario aki a presentá tabata na 2003, ora ku New York Yankees a pèrdè e di seis partido na Yankee Stadium.
Di e 32 okashon nan previo ku un ekipo atras 3-2 ta regresá kas pa terminá e seri, e ekipo aki ta logra gana Seri Mundial 12 biaha, inkluyendo shete di e último nuebe okashon nan. E último ekipo ku a logra esaki tabata Anaheim Angels riba San Francisco Giants den 2002.

Esaki ta únikamente e di tres biaha den historia di Seri Mundial ku un ekipo ta kue un bentaha di 3-2 despues di e siguiente senario: pèrdè e promé partido komo bishitante; gana e di dos komo bishitante; pèrdè e di tres partido na kas; gana i di kuater i di sinku partido na kas. E úniko otro ekipo nan ku a logra hasi esaki ta Milwaukee Braves na 1957 i New York Mets na 1973.

Texas Rangers tin e bentaha di 3-2 den un seri mihó di shete pa di tres biaha den e kuater okashon nan ku e ekipo ta partisipá den un seri mihó di shete. Den e dos okashon nan previo, Texas a logra gana e seri den seis partido, esaki kontra New York Yankees den e Kampionato di Liga Amerikano na 2010 i e aña aki kontra Detroit Tigers tambe den e kampionato di Liga Amerikano. Adishonal esaki ta promé biaha den historia ku Texas ta ariba den Seri Mundial

Texas Rangers a hungá 45 wega konsekutivo inkluyendo postemporada sin pèrdè dos wega tras di otro

E último biaha ku Texas a pèrdè wega konsekutivo tabata na momentu ku nan a pèrdè tres sigui ougùstùs 23 – 25 kontra Boston Red Sox.
E racha aki ta surpasá esun di Philadelphia Phillies ku a bai 44 wega konsekutivo sin pèrdè dos wega sigui entre yüni 6 – yüli 26.

October 20, 2011

Wega a kaba pa Texas?

Den e promé partido di Seri Mundial e ekipo di San Luis Cardinals a logra gana di Texas Ranger ku skor di 3 pa 2. Kiko esaki ta nifiká pa Texas? Nan por bin bek i gana e seri òf tur kos ta pinta ku San Luis lo gana Seri Mundial e aña aki? Ban analisá historia i opservá kon e kos ta pinta pa tantu Texas komo San Luis.

E ganadó di e promé wega di Seri Mundial a logra Sali kampion 65 biaha (61%). Esaki tabata e kaso den shete di e último ocho i 12 di e último 14 Seri Mundial nan kuminsando na 1997 ku 2002 (Anaheim ganando di San Francisco) i 2009 (New York ganando di Philadelphia) e úniko eksepshon nan. E la sosodé tambe den 14 di e último 17 i 19 di e último 23 seri nan. Adishonal na San Francisco i Philadelphia, e úniko otro eksepshon den e último 22 Seri Mundial nan tabata ámbos biaha Atlanta, ku a gana e promé wega kontra Toronto na 1992 i New York na 1996 pero a pèrdè e seri ámbos biaha den seis wega.

Den 17 di e último 25 Seri Mundial nan kuminsando na 1985, e ganadó di e promé partido tambe a Sali viktorioso den e di dos partido. E eksepshon nan ta nan 1992 (Toronto riba Atlanta), 1993 (Philadelphia riba Toronto), 1997 (Cleveland riba Florida), 2002 (Anaheim riba San Francisco), 2003 (New York riba Florida), 2006 (Detroit riba San Luis), 2008 (Tampa riba Philadelphia), 2009 (New York riba Philadelphia).

San Luis a mehorá nan rekòrt na 17-20 den e promé wega di pos temporada, inkluyendo nan rekòrt di 7-11 den Seri Mundial.

Di e seis viktoria nan den e promé partido di Seri Mundial anterior, San Luis a bai na gana e seri na kuater okashon: 1934 den shete wega; 1964 den shete wega; 1967 den shete wega; i na 2006 den sinku wega.
Den e seis okashon nan anterior ku San Luis a gana e promé partido, nan a logra gana e di dos partido solamente na un okashon. Esaki tabata na aña 1985 ora nan a pèrdè Seri Mundial kontra Kansas City Royals den shete wega.

52 ekipo a yega di kue un bentaha di 2-0 den Seri Mundial i 41 di e ekipo nan aki a logra gana e kampionato (78.8%). E último ocho ekipo nan ku a logra esaki, nan tur a gana e kampionato (Yankees den 1998-99-00; Arizona den 2001; Boston den 2004 i 2007; Chicago den 2005; i San Francisco den 2010). Den e último 15 biaha nan ku un ekipo a logra bai ariba 2-0 den e seri, na solamente 1 okashon un ekipo no a logra gana e kampionato. Atlanta Braves ta e eksepshon kaminda nan a bai ariba 2-0 den e seri na 1996 kontra New York Yankees pero a pèrdè e siguiente kuater partido nan.

Di e 54 biaha nan ku Seri Mundial ta tabla 1-1 despues di dos partido, e ganadó di e di dos partido a logra gana e kampionato na 29 okashon (53.7%). Pero esaki tabata e kaso solamente na dos di e shete okashon nan ku esaki a pasa for di 1993, esaki nan tabata Anaheim den 2002 i New York na 2009. E Philadelphia di 1993, Cleveland di 1997, New York Yankees di 2003, Detroit di 2006 i Tampa di 2008 tur a logra tabla e seri na 1-1 pero no a logra di gana e kampionato.

Solamente un biaha for di 1982 e ekipo di kas a logra gana e promé partido di Seri Mundial pero no a logra gana e kampionato. Na 1992, Atlanta Braves a gana Toronto Blue Jays na kas den e promé partido pero a pèrdè e seri den seis. Den historia di Seri Mundial solamente 20 biaha un ekipo di kas a logra gana e promé partido pero no a logra gana e seri. E ekipo di kas ku gana e promé partido di Seri Mundial a bai na gana e seri na 41 di 61 okashon, inkluyendo 10 biaha konsekutivo for di 1992 i 16 di e último 18 for di 1980.

October 20, 2011September 27, 2013

Skedjel di partido pa Kopa Mundial di FIFA 2014 a wòrdu anunsiá!

E skedjel di partido pa e di 20 Kopa Mundial di FIFA a wòrdu anunsiá awe 20 di òktober na Zurich, Suisa. 12 suidat na Brazil lo ta anfitrion di e 64 partido nan ku lo tuma lugá den e kopa. Sao Paulo lo ta testigu di e partido di apertura riba 12 di yüni 2014, miéntras ku Rio de Janeiro lo ta e lugá di enkuentro pa e final di torneo mas prestigioso di futbòl mundial.

E anfitrion Brazil lo wòrdu di lòt komo A1 i konsekuentemente nan lo hunga e wega di apertura na Sao Paulo dia 12 di yüni, 16.00 ora lokal di Kòrsou. Nan siguiente partido lo ta djamars 17 di yüni na Fortaleza, 18.00’or di atardi. Por último Brazil ta sera e ròndu di grupo djaluna 23 di yüni, 12.00’or di mèrdia na Brasilia.

Adishonal e orario di komienso di e diferente partido nan lo ta lo siguiente (orario lokal di Kòrsou):

Partido di Apertura: 16.00
Partido nan di Grupo: 12.00, 15.00, 18.00, 21.00
Ròndu di 16 / Kuart-final: 12.00, 16.00
Semi-final: 16.00
Partido pa di tres lugá: 16.00
Final: 15.00

Pa e skedjel kompletu klik aki.

October 19, 2011October 19, 2011

Ken lo gana? Análisis di Seri Mundial 2011

Liga Amerikano tin e bentaha di tur tempu den Seri Mundial ku un rekòrt di 62 seri gana i 44 pèrdí, pero den último sinku aña nan Liga Nashonal a gana tres seri ku viktoria di Cardinals na 2006, Phillies na 2008 i Giants na 2010. Despues ku Yankees a gana tres seri mundial sigui na 1998 te ku 2000, e dos liga nan ta empatá na un rekòrt di sinku seri gana i sinku seri pèrdí. Pero si kue un periodo di tempu mas grandi den Seri Mundial bo ta haña ku Liga Amerikano a gana nuebe di e último 15 seri nan for di 1996; 12 di 19 for di 1991; i 17 di 28 biaha kuminsando na 1983.

Liga Amerikano i Liga Nashonal ta interkambiando viktoria den Seri Mundial pa seis aña konsekutivo for aña 2005 ku viktoria di Liga Amerikano dor di Chicago (2005), Boston (2007)i New York (2009). Kontrali Liga Nashonal a sali viktorioso dor di San Luis (2006), Philadelphia (2008) i San Francisco (2010). E racha aki ta e racha mas largu di interkambio di viktoria entre e dos liga nan despues di e interkambio di viktoria ku a tuma lugá pa shete temporada konsekutivo entre aña 1985 i 1991. Den e racha aki Liga Amerikano a gana na aña 1985, 87, 89 i 91, miéntras ku Liga Nashonal a gana na 1986, 88 i 90.

Texas Rangers ta hasi nan di dos aparishon konsekutivo den Seri Mundial despues di sali kampion di Liga Amerikano pa di dos biaha den historia di e frankisia.

Texas ta e promé ekipo di Liga Amerikano ku ta gana e banderin di Liga Amerikano pa dos aña konsekutivo despues ku New York Yankees a gana kuater sigui entre 1998 i 2001. Tambe Texas ta e di nuebe ekipo den Liga Amerikano ku ta ripití su pase pa Seri Mundial den aña nan konsekutivo.
Texas ta e promé ekipo di liga grandi ku ta regresá den Seri Mundial den e temporada siguiente di un derota den e seri despues di Atlanta Braves na aña 1992 i ta e promé ekipo di Liga Amerikano despues di Oakland Athletics na aña 1989.

San Luis Cardinals ta hasi nan di 18 aparishon den Seri Mundial despues di gana nan di tres titulo di liga den e último ocho temporada nan (2004 i 2006 tambe nan a gana Liga Nashonal).

E di 18 aparishon den Seri Mundial di Cardinals ta tabla Giants i Dodgers na di dos lugá di ekipo nan ku mas aparensia den Seri Mundial, lagando nan tras di solamente New York Yankees ku 40 aparishon den Seri Mundial.
E 18 biaha nan ku San Luis a gana e banderin di Liga Nashonal ta empatá nan na di dos lugá den Liga Nashonal, ku Giants na kabes ku 19 banderin (Giants a gana e banderin na 1904 pero no tabata tin Seri Mundial).
Cardinals tin un rekòrt di 10–7 den nan anterior 17 biahe nan pa Seri Mundial. Cardinal a hunga 105 wega den Seri Mundial i tin un rekòrt di 52-53.

Den San Luis su promé wega di Seri Mundial awe nan lo surpasá Dodgers i Giants i lo kue e di dos lugá di ekipo nan ku mas wega hunga den Seri Mundial. Úniko ekipo dilanti di San Luis ta New York Yankees ku 225 wega hunga den Seri Mundial.

Pa promé biaha despues ku a kuminsá ku seis divishon den Liga Grandi na aña 1994, ekipo nan di Liga Nashonal Sentral ta topa Liga Amerikano West den Seri Mundial. E úniko otro enkuentro di divishon ku tin ku tuma lugá ainda den Seri Mundial ta Liga Amerikano Sentral kontra Liga Nashonal West.

San Luis i Texas a hunga solamente tres biaha kontra otro i San Luis tin e bentaha ku un rekòrt di 2-1. E úniko biaha ku e dos ekipo nan a hunga kontra otro tabata den un seri di tres wega na yüni di 2004 den e stadion di San Luis, Busch Stadium II.

October 18, 2011

Skedjel di Seri Mundial 2011!

Mañan 19 di òktober ta kuminsá e di 107 Seri Mundial di beisbòl figurando e kampion nan di Liga Nashonal i e kampion nan di Liga Amerikano. Seri Mundial a kuminsá for di aña 1903 i a kontinuá tur aña ku eksepshon di aña 1904 ora e kampion nan di Liga Nashonal New York Giants i nan manager John McGraw a ninga di hunga kontra e kampion nan di Liga Amerikano Boston Red Sox, tambe na 1994 no tabata tin Seri Mundial pa motibu di wèlga ku a terminá e temporada riba 11 di ougùstùs.

Wega	Fecha	Sitio	Orario
1	Òktober 19	Busch Stadium San Luis	8:05 p.m.
2	Òktober 20	Busch Stadium San Luis	8:05 p.m.
3	Òktober 22	Rangers Ballpark Texas	8:05 p.m.
4	Òktober 23	Rangers Ballpark Texas	8:05 p.m.
5*	Òktober 24	Rangers Ballpark Texas	8:05 p.m.
6*	Òktober 26	Busch Stadium San Luis	8:05 p.m.
7*	Òktober 27	Busch Stadium San Luis	8:05 p.m.

*Si ta nesesario

October 16, 2011September 27, 2013

Hulanda kampion di mundu!

Despues di un retraso di mas ku dos ora pa motibu di awa seru Hulanda ta bolbe gana di Cuba pero e biaha aki pa konkista e medaya di oro. Un biaha mas tremendo picheo di e ekipo Hulandes a wanta e Kubano nan na solamente 1 kareda permitiendo 5 hit. Tur e kareda nan di Hulanda a bin den di kuater ining kaminda Hulanda a logra nota 2 kareda ku tabata sufisiente pa e viktoria. Den di kuater ining Bryan Engelhardt a konektá un single ku koredó na primera i segunda i asina empuhá un kareda pa empatá e partido na 1. Ku un out den mesun entrada ku koredó na segunda i tersera, Jonathan Schoop ta konektá un single, empuhando un kareda ku ta manda Hulanda ariba 2 pa 1. E bentaha aki tabata sufisiente pa e staf di picheo di Hulanda ku a wanta e bentaha i hiba Hulanda na nan promé viktoria den historia di mundial di beisbòl. E bon prestashon di Curt Smith den e torneo a sòru pa e Sali e hungadó mas valioso di e torneo i tambe gana e premio di hungadó ku mas kareda empuhá. Ku e viktoria aki Hulanda ta bira e di dos ekipo Europeo despues di Gran Bretaña na aña 1938 pa gana e titulo di mundial di mando.

October 14, 2011September 27, 2013

Hulanda ku un viktoria for di oro!

Hulanda ofisialmente a pone su mes den e final di mundial di beisbòl na Panamá. Den e enkuentro di awe Hulanda a pone Arshwin Asjes riba montikulo kontra Venezuela. Asjes a picha 7 ining fuerte permitiendo dos kareda i poncha sinku. Despues di un par di dia di ménos produkshon nan bate, awe e bate nan Hulandes a bolbe Sali i asina Hulanda a gana Venezuela ku skor di 12 pa 2. Pa Hulanda Curt Smith a konektá un honron i empuhá tres kareda. Bryan Engelhardt tambe tabata tin un bon dia na plato i a konektá kuater hit den sinku turno i empuhá tres kareda. Hulanda lo hunga mañan atardi 6’or ora lokal di Kòrsou kontra Cuba pa e titulo máksimo.

October 14, 2011September 27, 2013

Hulanda ta gana dos i kita invikto di Cuba!

Manera Deporte Awe! a relatá anteriormente e wega entre Hulanda i Oustralia a keda suspendé pa awa seru ku un empate na 1 kareda. E partido aki a kontinuá den di 7 ining ku Oustralia menasando ku koredó na primera i tersera i dos out. Oustralia no ta logra probechá di e situashon i bon picheo di Hulanda ta logra saka Hulanda for di e ining. Mesora den bon di 7 ining Hulanda no ta pèrdè pa gana i ta anotá e kareda di bentaha ku alabes a bira e kareda di viktoria tambe pa asina gana Oustralia ku skor di 2 pa 1.

Djis un ratu despues di e partido kontra Oustralia, Hulanda a hunga su partido kontra Cuba. Den e partido aki Hulanda a mustra nan poder i tabata tin mester solamente dos ining ofensivo pa kita invikto di Cuba. Den di 2 ining i den di 4 ining Hulanda ta konektá honron di dos kareda, un di Brian Engelhardt i e otro di Kalian Sams. E picheo Hulandes tambe tabata tin un bon prestashon permitiendo solamente un kareda di e Kubano nan i seya e viktoria ku skor di 4 pa 1.

Ku e viktoria aki Hulanda ta pone su mes den bon posishon pa hunga e final di mundial di beisbòl i asina bira e promé pais Europeo den 73 aña pa yega final di mundial di beisbòl. Pa pasa pa final Hulanda mester sea gana nan partido di awe kontra Venezuela òf si Cuba gana di Canada sea ku Hulanda gana of pèrdè tambe Hulanda lo ta den final.

October 13, 2011September 27, 2013

Wega di Hulanda suspendé!

E partido di Hulanda kontra Oustralia a keda suspendé ku un empate na unu pa motibu di awa seru. E suspenshon a bin den kabes di 7 ining, ku Oustralia na bate i ku koredó na primera i tersera i dos out. Keda pendiente, na momentu ku Deporte Awe! haña informashon tokante kontinuashon di e partido nos lo anunsiá esaki.

October 11, 2011September 27, 2013

Kòrsou ta difikultá kos pa Haiti!

Aunke Kòrsou a keda matemátikamente eliminá for di e kontienda pa yega mundial Brazil 2014 despues di e partido ku Kòrsou a pèrdè kontra Antigua dia 7 di òktober tòg a keda tres partido pa e ekipo di Kòrsou hunga. Un di a partido nan ei tabata awe kontra Haiti kaminda Kòrsou a empatá na 2 gol. Den e partido aki Kòrsou a bai ariba 2 pa nada ku gol nan di Richmar Silberie na di shete minüt di promé tempu i shete minüt despues ku gol di Sendley Bito. Kòrsou no por a wanta e bentaha aki i na di 25 minüt Haiti ta haña un pinalti i hasi e partido 2 pa 1. Den di 60 minüt Kòrsou no ta logra mantené e bentaha i ta permití e gol di empate.

Despues di kuater partido den e klasifikatorio pa mundial Brazil 2014 tin un kos ku Deporte Awe! por señalá komo e denominadó komun pa loke ta trata e selekshon Kurasoleño i esei ta e echo ku Kòrsou no por logra mantené nan bentaha. Ku eksepshon di un partido, tabata tin tres partido ku Kòrsou a bai ariba promé pero no ta logra wanta e bentaha. Na dos okashon Kòrsou ta pèrdè despues di ta ariba i na un okashon empatá.

Kon kos lo tabata si nos por a wanta e bentaha nan aki? Si Kòrsou por a logra esaki, awe e selekshon Kurasoleño lo tabata tin tres wega gana i un wega pèrdí ku ta bon pa 9 punto, faltando dos partido kontra Isla Virgenes. Den e senario aki Kòrsou lo tabata empatá ku Antigua na 9 punto komo lider di Grupo F. E resultado aki lo a faboresé Kòrsou enormemente teniendo na kuenta ku Antigua lo hunga su último dos nan kontra Haiti. Lástimamente esaki lo keda simplemente un nostalgia pa hopi di nos.

Apesar di esaki tòg e empate di awe kontra Haiti di awe ta duna tòg un tiki satisfakshon. Ku e empate di awe Kòrsou ta hinka Haiti den un buraku. Ku e empate aki Haiti tin kuater wega hunga ku 10 punto i faltando dos wega kontra Antigua. Antigua a gana su partido kontra Isla Virgenes i konsekuentemente ta komandá Grupo F ku 12 punto, faltando dos wega.