Author: E. Evertsz

Posted on

Hulanda ta kuminsá e di dos fase di mundial riba bon pia!

Hulanda a hunga awe su promé partido den e di dos fase di e mundial di beisbòl na Panamá. Den e fase aki Hulanda ku a klasifiká komo number un den su grupo a enfrentá Korea ku a klasifiká number kuater den su grupo. Hulanda a mustra di ta superior na e Koreano nan i a gana esaki nan ku un skor di 5 pa 1.

Despues ku den e promé kuater ining nan niun di dos ekipo no por a anotá kareda den di sinku ining Kalian Sams ta manda Hulanda ariba 2 pa nada ku un honron di dos kareda. Den di seis ining Hulanda ta siguí hunga e bala largu, e biaha aki Sharlon Schoop ta konektá un honron di tres kareda i asina hasi e partido 5 pa nada na fabor di Hulanda. E skor a keda asina aki te den kabes di nuebe ining ora Korea ta konektá un honron solitario i hasi a partido 5 pa 1. Mañan Hulanda ta hunga kontra Oustralia.

Posted on

Hulanda ta bolbe drenta e kolumna di viktoria!

Un dia despues di pèrdè nan promé partido den e kampionato mundial di beisbòl na Panamá, Hulanda ta bolbe gana. Hulanda a hunga su último partido den e promé ròndu di kampionato kontra Panamá i a gana ku skor di 7 pa 3. Ku e viktoria aki Hulanda ta klasifiká na promé lugá di su grupo pa e siguiente ròndu.

Den bòm di promé ining Panamá ta bai ariba 1 pa nada. E bentaha aki no ta dura muchu i den kabes di dos ining e ruman nan Schoop ta sòru pa Hulanda empatá e wega riba un doblete di Sharlon i despues un single empuhador di Jonathan. Hulanda ta kuminsá un ining grandi den di tres, kaminda Hulanda ta logra hinka 4 kareda i asina hasi e partido 5 pa 2 na nan fabor.

E sinku kareda nan aki no tabata sufisiente pa e ekipo hulandes. Un biaha mas e ruman nan Schoop ta ataka Panamá, e biaha aki riba un dòbel robo kaminda Jonathan a roba segunda i Sharlon ta roba home. Hulanda ta keda ku su 6 kareda nan te den di nuebe ining kaminda Danny Rombley ta konektá un honron di un kareda i asina hasi e partido 7 pa 3 na fabor di Hulanda.

Posted on

Hulanda ta pèrdè su promé!

Despues di a gana e promé sinku partido nan den e kampionato mundial di beisbòl, Hulanda ta pèrdè su promé partido ku skor di sinku pa kuater den 11 ining kontra Canada. Hulanda ta bai ariba den di dos ining ku skor di dos pa nada riba un base por bola ku Curt Smith a haña ku base i yen i despues riba un eror di e primera base Kanades.

Den di sinku ining Canada ta empatá e partido riba un honron di un kareda i despues ku dos koredó na base Sharlon Schoop kometé un eror i asina logra anotá un kareda mas. E partido a keda empatá te den di shete, akinan Canada ta bai ariba ku skor di tres pa dos. Mesora den bòm di shete Hulanda ta yena base i tabla e wega na tres riba un base por bola ku base yen.

E partido ta keda empatá te den di dies ining na momentu ku Canada ta bai ariba ku skor di kuater pa tres. Hulanda no ta keda atras i den bòm di dies ta bolbe empatá e partido riba un flai di sakrifisio di Curt Smith. Den di 11 Canada ta bolbe nota un kareda i bai ariba sinku pa kuater pero e biaha aki Hulanda no ta logra bin bek i ta kai chikí kontra Canada.

Juan Carlos Sulbaran a picha seis ining pa e ekipo Hulandes i e la permití dos hit, dos kareda i poncha seis. Mañan Hulanda ta hunga su último partido den e promé fase di mundial di beisbòl kontra Panamá. E partido aki lo tuma lugá mitar di nuebe di anochi orario lokal di Kòrsou.

Posted on

Racha di viktoria Hulandes ta sigui!

Awe den e kampionato mundial di beisbòl na Panamá, Hulanda a hunga kontra di e aktual kampionnan di mundu kual ta Merka. Hulanda tabata tin mester solamente dos ining ofensivo pa seya e partido aki i asina klinch su pase pa e siguiente buèlta. Despues di un base por bola i un single den promé ining Curt Smith ta konektá honron pa manda Hulanda ariba ku skor di tres pa sero.

Den di tres ining Hulanda ta bolbe ataka i despues di yena base ku un out Jonathan Schoop ta limpia base ku un triple i e mes ta logra anotá riba un eror di e shortstop, hasiendo e partido shete pa unu. Esaki tabata sufisiente pa Diegomar Markwell ku a picha seis ining, permití kuater kareda i poncha seis. Finalmente e partido a kaba ku skor di shete pa sinku pa e ekipo Hulandes. Mañan 3:30 di atardi (orario lokal di Kòrsou) Hulanda ta hunga kontra Canada.

Posted on

Kòrsou ta pèrdè kontra Antigua i matematikamente ta elimina for di mundial 2014!

Kòrsou ta bolbe pèrdè ku skor di 1 pa nada kontra Antigua den un wega ku Kòrsou mester a gana. Den e promé partido kontra Antigua Kòrsou a pèrdè ku skor di 5 pa 2. Ku e wega pèrdí aki Kòrsou tin un rekòrt di sero wega gana i tres wega pèrdí. Faltando tres partido mas esaki ta nifiká ku Kòrsou no ta pasa pa e siguiente ròndu di klasifikashon pa mundial Brazil 2014. Pa logra pasa pa e siguiente buèlta di e klasifikatorio pa mundial bo mester gana bo grupo.

Dikon Kòrsou ta keda eliminá? Tantu Haiti komo Antigua a gana tur tres di nan promé partido nan i konsekuentemente nan tin 9 punto kada un. Ainda Kòrsou falta hunga tres partido pero ku e wega pèrdí kontra Antigua, Kòrsou mester gana tur su siguiente tres partido nan i spera ku Antigua ta pèrdè tur su tres siguiente partido nan pa asina forsa un empate na 9 punto ku Antigua. Pero pa Antigua pèrdè tur tres di su siguiente partido nan ta nifiká ku Haiti ta gana por lo mínimo dos partido, teniendo na kuenta ku Antigua ta hunga kontra Haiti nan último dos partido nan di klasifikatorio pa mundial 2014. Ku Haiti ganando por lo mínimo  e último dos partido nan ta sufisiente pa nan yega 12 punto i asina gana e grupo. Meskos ta konta den e kaso ku Haiti pèrdè su último tres partido nan, e ora ei Antigua ta gana por lo mínimo dos i asina gana e grupo.

Posted on

Puerto Rico tambe ta bira víktima di selekshon Hulandes!

E ekipo Hulandes ta siguí gana den e kampionato mundial di beisbòl na Panamá. Hulanda den nan 4 partido nan ku nan a hunga tin 4 wega gana i asina ta e úniko ekipo den su grupo huntu ku Panamá ku te ainda ta invikto.

Awe Hulanda a blankea e ekipo di Puerto Rico i asina logra nan di 4 viktoria. Hulanda a bai ariba for di den bòm di promé ining riba honron solitario di Sidney de Jong. Den di 4 ining riba un doblete empuhador di Curt Smith Hulanda ta amplia e bentaha i hasi e wega 2 pa 0. Despues den di 6, Bryan Engelhardt ta añadí ku honron di 2 kareda. No ta dura masha ku den di 7 ining Sidney de Jong ta konektá un single pa asina empuhá 1 kareda mas.

Pa Hulanda Tom Stuifbergen a picha 7 ining permitiendo 5 hit, 1 base por bola i poncha 2. David Bergman a seyá e viktoria pa Hulanda pichando e último 2 ining nan sin pèrmití kareda. Mañan djabièrnè Hulanda ta hunga kontra Merka.

Posted on

Kòrsou ku Wega Importante Kontra Antigua!

Djabièrnè 7 di òktober e wega nan klasifikatorio pa mundial Brazil 2014 ta kontinuá. Un biaha mas Kòrsou ta hunga kontra Antigua i Barbuda, e úniko diferensia entre e wega aki i esun anterior ta ku Kòrsou ta hunga na kas i ta un wega ku Kòrsou mester gana.

Sinseramente no nesesariamente Kòrsou mester gana djabièrnè, un empate tambe ta tene Kòrsou na bida aunke ku un empate e kos ta omplika hopi. Dikon Kòrsou no por permití di pèrdè den e siguiente partido? Pa un ekipo pasa pa e siguiente buèlta di klasifikashon pa mundial e mester gana su grupo, ku otro palabra Kòrsou mester sali na promé lugá den e grupo ku e ta ku Haiti, Antigua i Isla Virgenes. Si Kòrsou pèrdè kontra Antigua e mester gana tur su siguiente 3 partido nan i spera ku Antigua ta pèrdè tur su 3 siguiente partido nan pa asina forsa un empate na 9 punto ku Antigua. Pero pa Antigua pèrdè tur 3 di su siguiente partido nan ta nifiká ku Haiti ta gana por lo mínimo 2 partido. Ku Haiti ganando e 2 partido nan aki ta sufisiente pa nan yega 12 punto i asina gana e grupo.

Den e promé partido kontra Antigua, Kòrsou a pèrdè ku skor di 5 pa 2, apesar di esaki tòg e situashon ta mustra alentador pa Kòrsou. E wega nan ku Kòrsou a hunga par di siman pasa kontra Sürnam ta hopi importante. Sürnam ta un selekshon na nivel di Antigua, tur 2 ekipo a wòrdu di lòt number 2 den nan respektivo grupo pues tur 2 ekipo ta e di 2 mihó ekipo den nan grupo (lesa Korsou por yega mundial 2014?). Kontra Sürnam, Kòrsou a pèrdè 1 partido i empatá e siguiente partido, importante di esaki ta ku Kòrsou a empatá kontra Sürnam na Sürnam ku solamente su hungadó nan lokal. Na momentu ku Kòrsou hunga djabièrnè kontra Antigua, Kòrsou lo no konta solamente ku su hungadó nan lokal pero lo konta tambe ku refuerso di hungadó nan ku ta hunga den eksterior.

E wega di Kòrsou lo tuma lugá djabièrnè awor dia 7 di òktober, 8’or di anochi ora lokal di Kòrsou na Sentro Deportivo Kòrsou. Entrada pa e wega lo ta NAF 15,-pa hende grandi i 7.50 pa mucha i 60 plùs. Kumpra bo karchi for di tempran na entre otro Beep Beep Rio Canario, Pòmp di gasolin Jansen nan Sta. Maria, SDK I ofisina di FFK na Brievengat.

Posted on

Hulanda ta Bolbe Gana!

Hulanda ta siguí ku su racha di viktoria den e kampionato mundial di beisbòl na Panamá. E último viktoria di Hulanda a bin riba kuenta di Hapon i asina pone ku Hulanda tin 3 wega gana i 0 wega pèrdí den e kampionato.

Pa promé biaha den e kampionato Hulanda ta kai atras na momentu ku den bòm di 3 ining Hapon ta bai ariba 1 pa nada. Pero e ekipo hulandes no a drenta pániko i a respondé mesora bek. Den kabes di 4 ining Sharlon Schoop ta konektá un doblete i anotá un ratu despues riba un eror di e segunda base. Den mesun 4 ining Hulanda ta yena base i siguí ku un tripel di Shaldimar Daantji ku ta empuhá 3 kareda. Hulanda ta añadí 1 kareda mas den di 9 ining pa kortesia di un doblete empuhador di Curt Smith.

Riba montikulo Hulanda a habri e partido ku Rob Cordemans ku a picha 6 ining, permití 1 kareda, 5 hit i bolea 1. Despues di Cordemans, Diegomar Markwell i David Berman a kompartí e siguiente 3 ining nan pa asina sera e wega. Mañan Hulanda ta liber awe i lo hunga su siguiente partido dia 6 di òktober, 3 di atardi orario di Kòrsou kontra Puerto Rico.

Posted on

Hulanda ta Apoderá di Gresia!

Awe tabata tin e di dos partido ku e ekipo Hulandes a hunga den e kampionato mundial di beisbòl na Panamá. Ku yudansa di entre otro Curt Smith i Mariekson Gregorius Hulanda a gana fásil ku skor di 19 pa nada di Gresia. Curt Smith den su 3 turno nan na bate a konektá 3 hit di kua un honron i a empuhá 3 kareda. Na tur Hulanda a logra konektá 19 hit den solamente sinku ining di wega, e 19 hit nan aki a sòru pa 8 kareda den di dos, 9 den di tres i 2 den di kuater ining. E eksploshon ofensivo di e ekipo Hulandes a pone ku Juan Carlos Sulbaran tambe tabata tin un dia fásil riba montikulo. Sulbaran a picha sinku ining, poncha 4, pèrmití 4 hit i 0 kareda.

Posted on

Hulanda ta Gana Promé Partido ku Bon Prestashon di Shairon Martis!

Awe Hulanda a hunga su promé partido den e kampionato mundial di beisbòl na Panamá. Den e partido aki Hulanda a Sali viktorioso ku un skor di 2 pa 1. Hulanda a anotá tur su kareda nan den e di dos entrada, kaminda un single di Vince Rooi a empuhá Sharlon Schoop i Bryan Engelhardt. E dos kareda nan aki tabata sufisiente pa Shairon Martis ku a picha 7 ining, pèrmití 3 hit i 1 kareda. Tur e 3 hit nan ku Martis a pèrmití tabata den di 4 ining. Den e ining en kuestion Martis a pèrmití 3 single di kua un di nan tabata sufisiente pa empuhá 1 kareda. Despues di Martis a bin e picher Tom Stuifbergen ku a picha 2 ining sin pèrmití hit i asina salba e wega gana pa Martis. E siguiente wega di Hulanda ta mañan 3 di òktober, 3’or di atardi ora di Kòrsou. Den e enkuentro aki Hulanda lo hunga kontra Gresia i probablemente lo tin e hóben yu’i di Kòrsou Juan Carlos Sulbaran riba montikulo.

Facebook Twitter Instagram Youtube
© 2024 Deporte Awe. Tur derechi reservá. Diseñá pa E² Media