E. Evertsz, redaktor pa Deporte Awe

October 1, 2011September 27, 2013

Skedjel Ekipo Hulandes den Kampionato Mundial di Beisbòl 2011 na Panamá!

Manera Deporte Awe! a relatá anteriormente, e kampionato mundial di beisbòl ku ta organisá pa federashon internashonal di beisbòl lo tuma lugá entre promé di òktober i 15 di òktober. E kampionato aki por konta ku e selekshon di beisbòl Hulandes, e selekshon aki por konta ku un kantidat grandi di yu’i Kòrsou ku ta forma parti dje. Seguidamente bo por haña e skedjel di e selekshon Hulandes i e orario den ora lokal di Kòrsou di e partido nan. Manera nos tin informashon riba unda bo por mira e partido nan riba Internèt nos lo publiká esaki.

FECHA	KAS	BISHITANTE	ORARIO
10-02-11	Hulanda	Chinese Taipei	15:00
10-03-11	Hulanda	Gresia	15:00
10-04-11	Hapon	Hulanda	15:00
10-06-11	Hulanda	Puerto Rico	15:00
10-07-11	Merka	Hulanda	20:30
10-08-11	Hulanda	Canada	15:00
10-09-11	Panamá	Hulanda	20:30

September 30, 2011September 30, 2011

Manager di Boston Red Sox lo Tuma Retiro!

Apénas 48 ora despues ku Boston Red Sox a pèrdè e lucha pa Wild Card tin rumor nan ta sirkulá ku manager Terry Francona probablemente lo tuma su retiro despues di reuní ku maneho di Boston Red Sox segun Ken Rosenthal di Fox Sports.

September 28, 2011September 27, 2013

CIBC FirstCaribbean ta Hasi Entrega Ofisial di Ròlstul na Glennon Haynes!

CIBC First Caribbean International Bank un biaha mas ta duna kontenido na su promesa pa enrikesé bida di un suidadano di nos isla ora ku e banko a hasi entrega ofisial di un ròlstul kompletamente adiestrá na e nesesidat di e suidadano.

Glennon Haynes a keda limitá na un ròlstul despues di a sufri un aksidente den pleno kompetensha di futbòl. CIBC FirstCaribbean resientemente a entreg’é ofisialmente un ròlstul nobo, algun siman despues di a sorprendé “live” durante di un edishon di e programa popular na televishon “Hòmber” ku e promesa ku e banko lo perkurá pa un ròlstul pe.

E ròlstul, kompletamente adiestrá na su nesesidat, resientemente a yega Kòrsou i FirstCaribbean a hasi entrega ofisial di e stul na Sr. Haynes, komo muestra di rekonosementu di su kontinuo aktitut positivo ante bida i su espíritu empresarial.

E seremonia a tuma lugá na e ofisina prinsipal di CIBC FirstCaribbean durante di un enkuentro ameno huntu ku famia Haynes, empleadonan i prensa.

Futbòl ta un di e deportenan mas popular riba nos isla. Haynes, kende tabata defendé di e ekipo di Centro Dominguito, a kompetí den e divishon mas haltu di nos futbòl. Tabata durante di kampeonato regular na 2005 ku Haynes sufri un aksidente serio. Hopi deportista i otronan, ku a sufri tipo di aksidentenan serio asin’aki, a keda inspirá pa e ehèmpel duna dor di Sr. Haynes. Maske ku ela keda desabilitá, dor di e aksidente aki, tòg Haynes a keda mantené e mes un prinsipionan di un deportista i espíritu kombativo ku e tabatin promé ku ela sufri e aksidente.

Desafortunadamente e ròlstul, ku Haynes tabata usa, tabata strob’é di move i tabata un opstákulo den su funshonamentu. Pa e motibu aki e tabatin mester di un ròlstul speshal adaptá na su sirkunstansha.

E donashon di CIBC FirstCAribbean di un ròlstul speshalmente prepará pa

Sr. Haynes mester keda konsiderá komo un muestra di e banko su kompromiso pa sigui enrikesé nos komunidat. Managing Director, Pim van der Burg, na okashon di anunsio di kompra di e ròlstul, a enfatisá en bista di e aktitut semper optimista riba bida di Glennon Haynes, e forma determiná ku e ta enfrentá su retonan i su espíritu empresarial. Esaki segun van der Burg mester sirbi komo un ehèmpel pa nos tur den komunidat.

Entrega di rolstul na Glennon Haynes — Lysaira Arvelo-Ortela, Marketing Manager di CIBC FirstCaribbean na Kòrsou ta hasi entrega ofisial di rolstul na Glennon Haynes.

September 26, 2011May 9, 2012

Video: Konfeshon di Joran van der Sloot!

E programa di televishon Cuarto Poder na Perú a logra a haña un video di e interogashon polisial ku a tuma lugá despues di a transladá Joran fo’i Chile bek pa Perú. Den e video Joran ta konfesá Stephany Flores den kasino I ta invit’é bai serka dje den su kamber di hotèl. Una bes den e kamber di Joran, Stephany ta haña sa e relashon ku Joran tin ku e kaso di Natalee Holloway. Aki nan Joran ta rabia, bati Stepahny i pa despues strangule. Video ta kortesia di: Cuarto Poder i AmericaTV

Parti 1

Parti 2

September 26, 2011September 26, 2011

Video: Joe Cortez ta papia riba pelea di Mayweather kontra Ortiz!

Anteriormente riba Deporte Awe! bo por a wak i tende tantu di Mayweather komo di Ortiz kiko a pasa den e pelea entre nan dos. Pero a keda un persona mas ku for di siman pasa despues di e pelea niun hende no a tende di dje i esei ta Joe Cortez, ku tabata e rèfri den e pelea di Mayweather kontra Ortiz. Pa kortesia di WLFI 18 Deporte Awe! a haña e siguiente entrevista ku Joe Cortez. Den e entrevista Joe Cortez ta konta no solamente kiko a pasa durante di e pelea sino e ta splika tambe dikon e pelea ta legal, tambe e ta papia riba su karera komo rèfri i kiko bòkseo mester hasi pa ta manera UFC.

September 25, 2011September 27, 2013

Kòrsou ta empatá den di dos partido kontra Sürnam!

E selekshon di Kòrsou a biaha pa Paramaribo, Sürnam, kaminda lo hunga dos wega amistoso komo preparashon pa e siguiente kompromisonan den e buèlta eliminatorio pa yega Mundial 2014. Den un komunikado emití, F.F.K. ta trese dilanti ku e selekshon a hasi e biahe bou di direkshon tékniko di e argentino Manuel Bilches i su asistente lokal Gersley Gijsbertha.

Den e promé partido ku Kòrsou hunga kontra Sürnam riba djabièrnè 23 di sèptèmber, Kòrsou a pèrdè ku e skor di 2 pa 0. Na di 25 minüt di e promé tempu e ekipo di Sürnam a bai ariba 1 pa 0 ku gol di Stefano Rijssel. Djis despues di e komienso di e di dos mitar Milton Pinas ta anotá pa hasi e skor 2 pa 0.

Awe Kòrsou a hunga su di dos wega di training kontra Sürnam i a empatá den e partido aki. Na di 14 minüt Sürnam a bai ariba ku gol di Evani Esperance, e bentaha aki no a dura muchu ya komo ku den promé mitar mes Mirco Colina Jr. ta empatá e partido pa Kòrsou. Den di dos mitar un biaha mas Sürnam ta bai ariba 2 pa 1 riba un tira liber di Giovanni Drenthe. Un biaha mas Mirco Colina Jr. ta sali na defensa di Kòrsou i ta empatá e partido na 2, ku alabes a bira e resultado final.

September 25, 2011

Kiko ta bai pasa ku Atlanta Braves…

Ku e wega pèrdí kontra Washington Nationals, Atlanta ta kompliká su pase pa post temporada un tiki. Manera Deporte Awe! a relatá anteriormente Atlanta a gana solamente 5 partido den nan último 15. Pa hasi e situashon mas interesante Atlanta a gana solamente 10 partido despues ku orkan Irene a kanselá nan partido nan na New York dia 27 i 28 di ougùstùs. Despues di aprel, sèptèmber ta e úniko luna di henter e temporada ku Atlanta tin mas wega pèrdí ku gana, aktualmente Atlanta tin 9 wega gana i 15 wega pèrdí den sèptèmber.

Esaki ta nifiká ku e number mágiko ta keda 3, ku ta nifiká ku kualke kombinashon wega gana pa Atlanta i wega pèrdí pa San Luis den e próksimo 3 wega nan tin ku suma 3. Poniendo esaki den sifra ta dunabu un mihó bista.

A keda 3 wega, si Atlanta gana tur 3 no ta importá si San Luis gana tur 3 tambe Atlanta ta pasa pa post temporada. Si den e 3 último wega nan Atlanta gana 2 wega, San Luis mester pèrdè un mínimo di 1 wega pa asina Atlanta pasa pa post temporada. Den e kaso ku Atlanta pèrdè 2 wega, e ora ei San Luis mester pèrdè sigur 2 wega tambe pa asina Atlanta por keda na bida. Por último si Atlanta pèrdè tur 3 wega, e ora ei San Luis tambe mester pèrdè tur 3 pa asina Atlanta por pasa pa post temporada.

Banda di e notisia nan aki no muchu alentador di Atlanta tòg tin algun notisia un tiki mas mihó. Ta asina ku e yu’i Kòrsou Jair Jurrjens no tabata sigur si lo e picha den post temporada aunke no ta sigur ainda e manager di Atlanta a laga e posibilidat habri. Jair a picha 44 bala den liga instrukshonal na Florida djasabra. Segun e manager e velosidat di Jair a subi bek na loke e mester ta i Jair a risibí un banchi traha na midi pa su rudia. Ban wak ku tur kos por sigui mehorá pa Jair ku e por bin duna su ekipo un man bek. Despues ku Jair no a habri dia 4 di sèptèmber Atlanta tin un rekòrt di 8 wega gana i 13 wega pèrdí.

September 25, 2011September 27, 2013

Kòrsou a pèrdè den wega di training na Sürnam!

September 25, 2011

Atlanta ku Wega Determinante Kontra Washington!

A keda 4 wega mas pa hunga den temporada regular di liga grandi. Pero ainda no ta determiná kua ta e 4 ekipo nan den kada liga ku ta bai post temporada. Den liga nashonal 3 di e kuater lugá nan pa post temporada ta yena kaba. Tantu Philadelphia, Arizona i Milwaukee a logra gana nan divishon i asina posishoná nan mes den post temporada. Pero ainda a keda un lugá pa un ekipo mas di liga nashonal.

Manera e situashon ta awor aki den liga nashonal, Atlanta ta para pa kue e último lugá den post temporada pa liga nashonal. E guera pa e último lugá aki no ta unu fásil mirando ku ta falta 4 wega pa temporada regular kaba i Atlanta ta solamente 2 wega ariba den “Wild Card”, tras di Atlanta ta sigui e ekipo di San Luis.

Aktualmente tur kos ta den Atlanta su man. E number mágiko ta 3, ku ta nifiká ku kualke kombinashon wega gana pa Atlanta i wega pèrdí pa San Luis den e próksimo 4 wega nan ku ta suma 3, ta garantisá e pase di Atlanta pa post temporada. E situashon ta mas fásil bisa ku den práktika i e último wega di Atlanta kontra Washington lo bira un wega krusial.

E Nashonal nan di Washington ku tin un rekòrt di 77 wega gana i 80 wega pèrdí i ta último ekipo ku un porsentahe di wega gana bou di .500 ku Atlanta lo hunga kontra dje. Despues di hunga kontra Washington, Atlanta lo hunga su 3 último partido nan kontra Philadelphia ku ta e ekipo ku mihó rekòrt den liga grandi aktualmente. Aunke ku Philadelphia ta den post temporada kaba e manager di Philadelphia a duna di konosé ku miéntras tantu ku nan ta hunga kontra ekipo ku ta den kontienda pa post temporada nan lo hunga ku nan hungadó nan regular i dunando 100%. Esaki ta pone ku Atlanta mester purba saka un wega gana mañan kontra Washington i asina drenta e último 3 partido nan ku por lo mínimo 2 wega ariba.

E otro motibu dikon e tarea ta difísil pa Atlanta ta e echo ku Atlanta a gana solamente 5 partido den nan último 14. Pa hasi e situashon mas interesante Atlanta a gana solamente 10 partido despues ku orkan Irene a kanselá nan partido nan na New York dia 27 i 28 di ougùstùs. Despues di aprel, sèptèmber ta e úniko luna di henter e temporada ku Atlanta tin mas wega pèrdí ku gana, aktualmente Atlanta tin 9 wega gana i 14 wega pèrdí den sèptèmber.

Di otro banda San Luis ta hunga nan último wega kontra Chicago Cubs i despues kontra Houston. Ámbos ekipo ta den bòm di nan divishon. Houston a logra gana solamente 55 wega e temporada aki i ta e ekipo ku ménos wega gana den liga grandi aktualmente. Pa pone e chèri riba e bolo mester menshoná ku San Luis a gana 14 di nan último 18 partido nan.

Ku tur esaki un kos ta bin den mente, e último wega di Atlanta kontra Washington lo bira e wega determinante. Dependiendo loke pasa den e wega aki hopi konklushon por wòrdu saka, aunke mester ta kla si ku pase loke pase den e wega aki Atlanta mester gana.

September 23, 2011September 27, 2013

Selekshon di Korsou ku Wega di Training na Surnam

E selekshon di Korsou a biaha pa Paramaribo, Sürnam, kaminda lo hunga dos wega amistoso komo preparashon pa e siguiente kompromisonan den e buèlta eliminatorio pa yega Mundial 2014. Den un komunikado emití, F.F.K. ta trese dilanti ku e selekshon a hasi e biahe bou di direkshon tékniko di e argentino Manuel Bilches i su asistente lokal Gersley Gijsbertha.

Dia 7 di òktober awor aki na Kòrsou nos selekshon lo risibí Antigua, miéntras ku dia 11 di òktober nan lo mira akshon na Port-Au-Prince, Haiti. F.F.K. ta trese dilanti ku último dos simannan e kipernan Marcelo Pisas, Raymond Rivierre i Rugenio Josephina a hiba training fuerte bou di mando di e entrenadónan Ruud Koopmans i Jozef Nivellac.

E partidonan na Sürnam lo tuma lugá riba djabièrnè 23 di sèptèmber i djadumingu 25.

E hungadónan ku a hasi e biahe ta:

Kiper: Raymar Revierre, Marcello Pisas, Rugenio Josephia.

Defensa: Joel Victoria, Jervine Mook, Viylison Lake, Glenciene Gregoria.

Mediokampo: Jeramiel Cleofa, Mirco Colina Jr., Shurvey Delando, Richinel Doran, Ferly Servania, Leonard Isenia, R. Santroma.

Delantero: Jamian de Kaster, Daymon Lodovica, Reginal Martina, Charles Martina.

Hefe di delegashon ta Stanley Coffy i e kuerpo tékniko ta formá pa: Manuel Blches, Gersley Gijsbertha, Jozef Nivellac. Masahista Clinton Locadia i dirigente Raynold Mercera tambe ta forma parti dje delegashon.

Kortesia di: www.extra.an