Category: Atletismo

Posted on

SOV BRANDWEER KU TREMENDO FIREFIGHTERS WALK 2016

WILLEMSTAD — Ya pa di dos aña konsekutivo dia 3 di aprel, Sport en Ontspannings Vereniging di Brandweer Korsou ta organisa e kaminata ku ta hiba di nomber “Firefighters Walk”. Aña pasa mas di 1500 persona a partisipa durante di e kaminata organisa pa miembronan di Brandweer Korsou i a kana durante kayanan di Otrobanda.

E aña aki tin kambionan GREAT den e kaminata di “Firefighters Walk” aki, kaminda ku lo sali for di Post di Brandweer na Steenrijk pasa den kayanan di Punda i Otrobanda i termina na Playa Parasasa. Tambe SOV Brandweer a komplase tur esnan ku a pidi pa hasi e ruta mas largu i a komplase paso nos lo tin un ruta di 10KM ku lo pasa via di Brug Juliana. Pa prome bes lo bo por krusa Brug Juliana na pia kanando for di Punda pa bai Otrobanda. Pues algu ku nos partisipantenan lo bai gusta sigur.

Gimmick pa Dia di Hende Muhe

Partisipantenan na Firefighters Walk di aña pasa por korda kon bomberonan a malkria tur hende muhe riba Dia di Hende Muhe i a regala nan un flor na momentu ku a yega na Post di Brandweer di Mundu Nobo. Awel e aña aki, SOV Brandweer lo kuminsa malkria tur hende muhe riba Dia di Hende Muhe. Karchinan normal pa Firefighters Walk ta kosta 15 florin, pero Djamars awor 8 di Mart 2016, tur Hende Muhe ku pasa na Ofisina di Brandweer entre 5or pa 7or pm lo por kumpra su karchi mesora pa solamente 12,50 pa persona ku ta inklui un tshirt I konsumo. Kantidat di karchi pa e kampaña di Dia di Hende Muhe aki ta limita i na momentu ku bin kumpra karchi lo por kumpra solamente 2 pa persona, pa asina duna oportunidat na mas persona ku kier probecha di e kampaña aki.

Pa kualkier informashon of benta di karchi pa Firefighters Walk 2016 lo por tuma kontakto ku 693 – 4666 of 527-7282 of 529-2222. Of tambe por like nos Facebook page di SOV Brandweer unda lo por risibi tur informashon di Firefighters Walk 2016.

Posted on

Resultado di atletanan di Trupial – Auto City na Trinidad & Tobago Carifta Trails 2016?

PORT OF SPAIN — Klup di Atletismo Trupial – Auto City a bai Trinidad pa kompetí den nan Carifta trials riba dia 5 i 6 di mart 2016 ku 7 atleta. E atletanan a gana kuater oro, kuater plata i a kibra tres personal bèst. E intenshon pa manda e atletanan den e kompetensia aki tabata pa prepará nan bai Carifta Games 2016 na Grenada ku mas forsa. Nabi Wallace Coach di grupo ta hopi satisfecho ku e resultadonan i tin mas konfiansa awor den su atletanan pasombra nan ta mustra bon prepará pa gana medaya na Carifta Games 2016 na Grenada.

E resultado di nos atleta nan ta lo siguiente:

Glenka Antonia U-18 mucha muhé a sali promé lugá den bula haltu ku un haltura di 1.70m i promé lugá den bula leu ku un distansia di 5.52m

Krishona Juliana U-18 mucha muhé a sali di dos den bula haltu ku un haltura di 1.67m

Anne Van der Woude U-18 mucha muhé a sali di dos den 1500m ku un tempu di 5:53.29 i di dos lugá den 3000m ku un tempu 12:52.68

Qyone Antersijn U-20 mucha muhé a sali promé lugá den 1500m ku un tempu di 5:08.04 i di dos lugá den 800m ku un tempu 2:25.36

Jaden Bernabela U-18 mucha hòmber a sali promé lugá den bula haltu ku un haltura di 1.90m i di kuater lugá den bula leu ku un distansia di 6.77m

Joel Boafo U-18 mucha hòmber a kore un tempu di 11.71 den 100m i 22.95 den 200m. yegando te final riba 200 m

Errol Cova U-20 mucha hòmber a kore un tempu di 52.24 den 400m i 2:03.36 den 800m

Un danki ta bai na tur spònser Auto City i C- Post i mayornan ku a hasi posibel ku e biaha aki por a wòrdu realisá. Direktiva di Trupial – Auto City ta felisitá e delegashon pa un trabou bon hasi. E siguiente interkambio deportivo lo ta den luna di mei na Medellin, Colombia.

Posted on

Trupial – Auto City ku biahe pa Trinidad & Tobago

WILLEMSTAD — Djaweps 2 di mart klup di atletismo Trupial – Auto City a Sali di biahe pa Trinidad & Tobago kaminda 7 atleta lo tuma parti na e Trinidad & Tobago Carifta Trials 2016.

Den e kompetensia aki Trinidad ta saka su selekshon ku lo bai representá Trinidad na e Kompetensia nan di Carifta 2016 ku lo tuma lugá dia 26 pa 28 di mart próksimo na Granada. E kompetensia aki ta sirbi komo un pre- kompetensia pa nos atletanan, na unda nan lo topa atletanan di nan edat i riba mis un nivel ku nan lo topa na Granada. Trinidad, Barbados, Bahamas i Jamaica ta e pais nan ku ta mas fuerte den e kompetensia di Carifta.

Si nos atletanan ta aspirá medaya ta hopi bon pa nan bia algun kompetensia riba e nivel ku nan lo bai topa den e kompetensia prinsipal di Carifta. Klup Trupial ta kere firme den kompensá kontra atleta mas mihó ku nos i tur aña na tin vários interkambio ta hasi ku atletanan den nos aria. 7 di e 8 atletanan di Trupial – Auto City ku ta selektá den e selekshon di Kòrsou ta realisá e biahe aki. Ta trata di:

1. Krishona Juliana bula haltu U18

2. Anne v/der Woude 1500 m i 300 m U18

3. Qyone Antersijn 800 m i 1500 m U20

4. Glenka Antonia Bula haltu i bula leu U18

5. Jaden Bernabela Bula haltu i bula leu U18

6. Errol Cova 800 m U20 .

7. Joel Boafo 100 i 200 m U18

Delegado lo ta sra. Aishel Florentina i Coach ta sr. Nabi Wallace

Direktiva di Trupial – Auto City ta deseá e atleta nan a, tur klase di éksito. Un danki ta bai na e spònser nan Auto City i Pòst N.V. i mayornan di atletanan ku a yuda pa e biahe por a wòrdu realisá.

Posted on

Hensley Paulina sub-kampion Hulandes 60m indoor

HULANDA — Hensley Paulina a sali sub-kampion riba 60m den e kampionato Nashonal Hulandes indoor. Den e final Henlsey a logra kore un tempu di 6.69 sekònde. Na promé luga a sali Solomon Bockarie ku un tempu di 6.68 sekònde i na di tres luga Giovanni Codrington ku un tempu di 6.70 sekònde. Churandy Martina no a partisipá den e kampionato Nashonal pa motibu di leshon. Brian Mariano tambe a partisipá na e evento pero a keda deskualifika den karedanan preliminar.

Posted on

Churandy Martina ta klasifiká pa Mundial Indoor igualando rèkert nashonal Hulandes

ALEMANIA — Churandy Martina den e kompetensianan di indoor na Karlsruhe, Alemania djasabra último a logra kore e tempu límite pa Mundial Indoor riba 60m den luna di mart próksimo na Portland, Merka. E tempu limite pa Mundial Indoor riba 60m tabata di 6.64 sekònde miéntras ku Churandy a kore un tempu di 6.60 sekònde. Ku e tempu aki, Martina a iguala e rèkert Nashonal Hulandes di 60m indoor tambe. E rèkert Nashonal Hulandes tabata riba nomber di Brian Mariano ku a logra esaki den e kampionato Europeo na Paris den aña 2011.

Posted on

Klup di atletismo Trupial – Auto City a regresá Kòrsou ku 2 Trofeo i 4 medalia for di Puerto Rico

WILLEMSTAD — Djasabra 17 di òktober último klup di atletismo Trupial – Auto City a partisipá na e di 32e kompetensia Milla de Cupey 2015 ku hopi éksito. E kompetensia aki ta forma parti di e interkambio deportivo ku klup Trupial – Auto City tin ku e klup di atletismo Cupey Track di Puerto Rico. Bou di un áwaseru den e promé evento nan i e echo ku na Puerto Rico nan mester kompetí únikamente ku kèts den e luna nan di sèptèmber pa desèmber  atletanan di Trupial  – Auto City a keda un tiki desapuntá pa e regla aki, ya ku nan a bai ku nan spike pa gara mas mihó den e pista sintétiko di Tartan. Pero asina mes nan a bataya fuerte ku e diferente atletanan di Puerto Rico. Un total di kasi 500 atleta for di 6 aña a partisipá na e kompetensianan aki.

E resultado di nos atleta ku a kai den premio ta lo siguiente:  

Kategoria 6 – 7 aña maskulinoDjevion Jansen     6e lugá medalia bròns     300 m.  58”76 sec.

Kategoria 8 – 9 aña maskulinoTobias Kaper   7e lugá medalia bròns     600 m. 2’06”86 min.

Kategoria 10-11 aña femeninoVanessa Mercera 3e lugá Trofeo     800 m. 2’41”01 min.

Kategoria 11-12 aña maskulinoNoah Kaper   3e lugá Trofeo    1000 m..3’27”25 min.

“Joshua Lanoy   10e lugá medalia bròns   1000 m. 3’38”26 min.

Kategoria 12-13 aña femeninoMaysoun Juliana 4e lugá medalia di bròns 1000 m. 3’33”61 min.

Ku e resultado aki 6 di e 9 atleta di Trupial – Auto City a bini bek ku un premio.  E evento tabata bon organisá. Tur kareda a start no ora i e organisadó nan por mira atras riba un evento bon organisá. Klup di atletismo Trupial – Auto City a risibí un kaloroso bon bin serka e alkalde di San Juan ku a keda kontentu ku nos a bini Puerto Rico pa partisipá na evento aki i asina duna e evento mas realse.  E evento tabata un bon eksperensia pa e atletanan ku nan tabata hopi nervioso promé ku e kareda, loke a pone ku algun di nan no a kore sigun nan sa kore na Kòrsou. E salada di keda kareda tabata hopi duru i nos atletanan a kuminsá start slou. . Dor di esaki  nan tabata wòrdu sera atras den e promé meter nan. Pero esaki ta netamente meta di partisipashon di Trupial- Auto City na e evento nan aki, pa nos atleta nan haya mas eksperensia for di  atletanan un tiki mas mihó ku nan. Un Danki ta bia na tur e  mayor, spònsernan Insel Air, ACU, CPA,  Wiwi Schoonmaak bedrijf, Seguros Brouwer, Ortela Contruction, European West Indies Trading – EWT..  ku a kontribuí pa e biaha por a bira posibel.

Posted on

Partisipashon di Klup di atletismo Trupial – Auto City na e 32e Milla de Cupey 2015 na Puerto Rico

WILLEMSTAD — Djaweps 15 di òktober klup di atletismo Trupial – Auto City a biaha pa Puerto Rico ku un delegashon di 9 atleta di 6 pa 11 aña, 2 delegado i 4 mayor pa tuma parti na e di 32e Milla Internashonal de Cupey 2015 na Puerto Rico. E kompetensia aki ta organisá dor di klup di atletismo Cupey Track di Puerto Rico, kual klup ta e promé klup ku 24 aña pasa klup di atletismo Trupial a kuminsá tene interkambio deportivo ku’é  na Puerto Rico i na Kòrsou. E idea aki krese ku aktuamentu tin 7 pa 8 pais den Caribe ku ta partisipá anulamentu na e kompetensia di Trupial – Auto City Classic/Refineria Isla Festival di Relevo na Kòrsou.

E kompetensia di Milla de Cupey lo tuma lugá djasabra 17 di òktober próksimo riba un pista di 4 ban na Cupey Halto. Nos ta deseá e atletanan tur klase di éksito i ta spera ku e atleta nan lo regresá ku vários premio Kòrsou. Direktiva, atletanan i mayornan ta gradisí tur e spònser ku a kontribuí ku e biaha por a bira posibel. Un danki spesial ta bai na Insel Air, ACU, CPA,  Wiwi Schoonmaak bedrijf, Seguros Brouwer, Ortela Contruction, European West Indies Trading – EWT ku a duna un kontribushon ku e gastunan pa e atletanan por a bira mas ménos. Direktiva ta gradesido pa e donashonnan aki i ta spera ku mas kompania por yuda nos organisashonnan deportivo  pa nan por sigui krea oportunidat pa nos hòbinan por desaroyá den e deporte ku ta práktika. Un mente sano den un kurpa sano.

Posted on

Resultado APC Run & Walk 2015

WILLEMSTAD — Ku un kantidat rekòrt di 956 partisipante klup di atletismo Trupial – Auto City i Algemeen Pension Fond – APC por mira atras riba un eksitoso APC Run & Walk 2015. Bou di un shelu medio kla i despues un solo kla kla e ganadónan a start for di lugá di stashoná outo na Sentro Pro Arte e kanadó a kana nan ruta stipulá sin niun problema. Den sekshon maskulino  William van Heyningen a resultá e ganadó ku un tempu di 57:52 min. I den sekshon femenino Shirley Mercelina ku un tempu di 1:15.24 min. Despues pa 6:30 e koredónan di e 10 km a start di kual Merwin Dollison a yega na promé lugá ku un tempu di 35:35 min. Den kategoria femenino Shardiela Eisden a resultá e ganadó apsoluto ku un tempu di 49:06 min.

Despues a sigui e diferente karedanan di nos muchanan ku a bira hopi interesante. Hopi bunita tabata e kareda di 400 m pa nos muchanan di 4 pa 6 aña i 800 m pa nos muchanan di 8 pa 10 aña. Nos por a mira kon  e mayornan tabata animá nan yu nan ku alma i kurpa.  Tabatin algun ku a kore kasi henter e ruta parti paden huntu ku nan yu nan. Bunita di e karedanan aki ta ku nan ta tuma lugá riba e lugá di stashoná outo di Sentro Pro Arte. Pues mayornan i fanátiko nan por a mira hinter e ruta di e muchanan.  Tabatin un partisipashon hopi grandi di e klupnan afiliá na CAB, loke a hasi e evento mas grandi ku 2014. Ku e evento aki klup di atletismo Trupial – Auto City por mira atras riba e bon evento i ya nan ta kuminsá prepará pa e edishon di 2016 i 2017,  ku mira riba e di 15e edishon na 2017  pa hasi e evento muchu mas grandi posibel.

Ya gerensia di APC a komprometé ku nos lo sigui sostené e evento aki i pa 2017 nan ke mira e evento yega riba nivel  internashonal. Ku un mini na kasonan di kansansio i bon intervenshon di Rode Kuis e evento a kana sin un kaso di lamentá. Tambe nos ta gradisí kuerpo polisial ku a presentá na bon kantidat pa guia e kanadó nan i koredónan sin problema riba e ruta. Un danki ta bai na sr. Westerhout i si tim ku e yuda nos ku e kuementu i di tempu i kuerpo di hurado di CAB ku e kordiná e yaga na final. Tambe nos ta gradisí tur kolaborador ku a bin duna un bon man. Sin nan evento no por a kana asina bunita. Pa 2016 nos ta bolbe konta ku boso yuda. Nos ta gradisí APC pa e konfiansa  den nos organisashon, Curaçao Botlling co, Kuster’s Trading ,Satex, Enshure  i Bon Bini Supermarket ku a delatá tur nos partisipantenan ku nan produktonan saludabel. Tambe Auto City i ku a yuda nos ku transporte pisa ku nos por a transportá tur nos materialnan pa e sitio konserní.  Un danki ta bai tambe na Fundashon Pro bista i Single Mother Succes ku a yuda benta karchi i tambe yuda durante e aktividat. Nos ta hopi kontentu ku nan yudansa. Ya preparashonnan a kuminsá pa den 2016 nos kibra e liña mágiko di 1000 partisipante.

Posted on

Tur kos ta kla pa APC Run & Walk 2015

WILLEMSTAD — Despues di un preparashon hopi intensivo klup di atletismo Trupial – Auto City ta anunsiá ku tur kos ta kla pa e Kareda/Kaminata APC Run & Walk 2015. E anda aki e evento lo tuma lugá dia 4 di òktober próksimo riba e lugá di stashoná out di Sentro Pro Arte.

Inskripshon a start entrante djaluna 28 sèptèmber di 8 or di meinta te 5 or na ofisina di Algemeen Pension Fonds na Schouwburgweg i di 5 or pa 7 or di atardi na SDK. Tambe por inskribí via online na http://avtrupial.info. Despues di inskribí via Internet, mester print e inskripshon i bini kuné  na un di e lugánan di inskripshon pa paga i e partisipante lo risibí su T-shirt i karchi di konsumo.

Nos ke rekordá e partisipantenan ku tin un kategoria di kompetensia i un di kana lider. Pues e grupo di kanadó nan pa nan salu tambe ta bon bini. E evento e aña aki lo yuda 2 organisashon ku ta traha pa nos komunidat ku ta  Fundashon Pro Bista i Single Mothter Succes. E kaminata di 10 i 5 km. ta start pa 6 or di meinta i e kareda di 10 i 5 km ta start 6:30. Despues pa 7.30 lo sigui ku e diferente karedanan di mucha di 2 km, 800 i 400 m. ku tambe lo start i kaba riba e lugá di stashoná out di Sentro Pro Arte.

Algemeen Pension Fond spònser maya i tur sobra co- spònser nan ta invitá tur amante di kanamentu i kareda bin partisipá na APC Run & Walk 2015 pa tene bo kurpa sali i kontribuí ku un bon kousa pa nos komunidat.

Posted on

Liemarvin Bonevacia lo kore 400m na Olimpiada Rio 2016

HULANDA — Atleta Liemarvin Bonevacia a klasifiká pa Weganan Olímpiko di Rio 2016. E atleta di 26 aña di edat durante e Mundial di Atletismo na Beijing a mehorá su propio rèkert Hulandes riba 400m koriendo 44,72 sekònde. Ku esaki a atleta di Kòrsou a kumpli ku tantu e tempu límite di IAAF (45,40) pa klasifiká pa Rio 2016 komo esei di NOC*NSF (45,25).

A base di e prestashon aki e Union di Atletismo Hulandes a nominá Liermarvin pa klasifikashon serka NOC*NSF. NOC*NSF a evaluá e proposishon i a honrá esaki.

 

Facebook Twitter Instagram Youtube
© 2024 Deporte Awe. Tur derechi reservá. Diseñá pa E² Media