Atletismo Archives | Page 7 of 11

February 3, 2014February 3, 2014

Hensley Paulina esun mas velos den kompetensia indoor na Amsterdam

AMSTERDAM – Den e wikènt tras di lomba e atleta Hensley Paulina a representá Rotterdam Atletiek den e kompetensia di indoor na Amsterdam organisá pa Phanos Atletiek. Meskos ku Brian Mariano, Paulina tambe ta buskando su klasifikashon pa e Kampionato Mundial di indoor na Polonia.

Segun e organisadó nan, Hensley tabata e atleta mas velos riba pista di 60m, koriendo un tempu di 6.82 sekònde. Ku e tempu aki Hensley ta drecha su rèkert personal di 6.88 sekònde ku e la kore na aña 2012. Apesar di esaki e tempu aki no ta sufisiente pa Paulina klasifiká pa e Kampionato Mundial di indoor na mart próksimo. E tempu límite pa klasifiká ta di 6.65 sekònde i mester keda registrá promé ku 25 di febrüari próksimo.

February 3, 2014

Brian Mariano ku tempu di 6.93 sekònde riba 60m indoor

MONDEVILLE, FRANSIA – Den wikènt tras di lomba tabata tin un kantidat di kompetensia di atletismo indoor. Brian Mariano ku ta buskando su klasifikashon riba 60m indoor pa e Kampionato Mundial di indoor na Polonia a kore na Fransia riba djasabra promé di febrüari.

Brian a kore den e di dos seri den e kompetensia di 60m indoor. Aki nan Mariano a yega na di sinku lugá ku un tempu di 6.93 sekònde. Brian no a logra pasa pa e final mas lat, ya ku solamente e promé dos finalista di kada seri a pasa pa final.

E tempu di 6.93 sekònde no ta Mariano su mihó tempu ku e la kore e aña aki. Den yanüari den kompetensia di Phanos Amsterdam, Brian a kore un tempu di 6.79 sekònde. Na aña 2010, Brian a kore su mihó tempu riba 60m indoor ku ta 6.60 sekònde. Si Brian logra ripití e prestashon aki e ta klasifiká pa e Mundial Indoor ku ta rekerí e atleta nan kore bou di 6.65 sekònde pa klasifiká.

January 27, 2014

VIDEO: Brian Mariano na di dos lugá riba 60m ‘indoor’

ZWOLLE – Den wikènt tras di lomba e ekipo di atletismo di AV PEC na Zwolle a tene nan kompetensia di 60m ‘indoor’. Brian Mariano ku ta buskando su klasifikashon pa e kampionato Mundial ‘Indoor’ a partisipá na e evento aki.

Mariano a representá su ekipo di Rotterdam Atletiek den e kompetensia. Brian ku te ainda ta mantené e rèkert Hulandes riba 60m ‘indoor’ a logra kore un tempu di 6.79 sekònde den e final. Esaki tabata bon pa e di dos lugá, su dilanti a finalisá Joren Tromp ku tempu di 6.78 sekònde.

E tempu ku Mariano a kore no ta sufisiente pa e klasifiká pa e Kampionato Mundial Indoor di e Asosiashon Internashonal di Federashon nan di Atletismo (IAAF). Pa por klasifiká pa e Kampionato Mundial e atleta mester kore bou di 6.65 sekònde i mester hasi esaki promé ku 25 di febrüari próksimo. Ainda tin algun kompetensia indoor promé ku 25 di febrüari, pues ta posibel ainda pa Mariano logra su klasifikashon pa e kampionato Mundial na Sopot, Polonia den mart próksimo.

Otro siman, djadumingu 2 di febrüari Hensley Paulina lo partisipá den e kompetensia di 60m ‘indoor’ di Phanos Atletiek na Amsterdam. Paulina tin un rèkert personal di 6.88 sekònde riba 60m ‘indoor’. Pues, Paulina tambe tin ku mehorá su tempu pa e por klasifiká pa e Kampionato Mundial.

Ainda Brian Mariano no a konfirmá su partisipashon pa e evento aki.

Siguiente mente bo por wak e kareda di Brian Mariano di wikènt tras di lomba. Mariano ta den baan number 5.

January 22, 2014

Hensley Paulina den kompetensia ‘indoor’ di Phanos Atletiek na Hulanda

AMSTERDAM – E ekipo di atletismo, Phanos Atletiek na Amsterdam a anunsiá ku e atleta yu’i Kòrsou, Hensley Paulina lo partisipá den nan kompetensia di 60m ‘indoor’. E kareda nan lo tuma lugá djadumingu 2 di febrüari 2014.

Na 2012 den e kompetensia di 60m ‘indoor’ na Appeldoorn, Paulina a kore un rèkert personal di 6.88 sekònde. Paulina di Rotterdam Atletiek mester baha bou di 6.88 sekònde si e ke klasifiká pa e Kampionato Mundial Indoor di e Asosiashon Internashonal di Federashon nan di Atletismo (IAAF) na Sopot, Polonia. Pa por klasifiká pa e Kampionato Mundial e atleta mester kore bou di 6.65 sekònde i mester hasi esaki promé ku 25 di febrüari próksimo.

January 13, 2014

Brian Mariano na di dos lugá den kompetensia na Amsterdam

AMSTERDAM – E atleta yu di Kòrsou, Brian Mariano a logra yega na di dos lugá den e kareda di 60m indoor. Esaki ta e di dos for di tres kompetensia nan indoor organisá pa e ekipo di atletismo na Amsterdam, Phanos.

Mariano a representá su ekipo Rotterdam Atletiek di e kompetensia. Brian ku te ainda ta mantené e rèkert Ulandes riba 60m indoor logra kore un tempu di 6.78 sekònde den e final. Su dilanti a yega na promé lugá, Giovanni Codrington ku tempu di 6.76 sekònde.

December 23, 2013

Churandy Martina nominá komo atleta di aña 2013

PAPENDAL – E federashon di atletismo Hulandes konosí komo “Atletiekunie” a publiká su nominashon nan pa atleta di aña 2013. Den e nominado nan tin e atleta Kurasoleño Churandy Martina. Martina a keda nominá pa su prestashon na e Mundial di Atletismo na Mosku, kaminda Martina a logra e di shete lugá riba 200 meter. Den e kategoria di hende homber huntu ku Churandy tambe a keda nominá Ignisious Gaisah i Eelco Sintnicolaas.

E ganadó nan lo keda anunsiá riba 16 di yanüari 2014. E determinashon di ganadó nan lo keda hasi pa un hurado di 12 eksperto.

August 14, 2013September 23, 2013

No tin motibu dikon Churandy Martina lo no kore 200 meter na Mosku

MOSKU, Rusia – Despues di algun insertidumbre si Churandy Martina lo kore e evento di 200 meter na e kampionato Mundial di Atletismo na Mosku, tur kos ta mustra ku Churandy lo kore e evento. “No tin motibu te ku e momentu nan aki ku e no por kore,” asina e asosiashon di Atletismo hulandes a duna di konosé.

Den fin di siman tras di lomba Martina a kore un tempu di 10.09 sekònde den semifinal den e evento di 100 meter i a keda net un désimo di un sekònde pa pasa pa e final. Despues di e evento aki Martina a deklará, ku durante e siman aki e ta bai train e bògt nan pa asina e evaluá si e leshon na su pia ta wanta i e ora ei e ta disidí si e ta kore 200 meter.

Seguidamente bo por tuma nota di e skedjel di e evento nan ku Martina lo partisipá aden. Tur e orario nan ta orario lokal di Kòrsou.

Fecha	Ora	Evento	Round
10-08-2013	12:15 pm	100 meter	Round 1
11-08-2013	11:05 am	100 meter	Semi Final
11-08-2013	01:50 pm	100 meter	Final
16-08-2013	02:35 am	200 meter	Round 1
16-08-2013	11:40 am	200 meter	Semi Final
17-08-2013	12:05 pm	200 meter	Final
18-08-2013	8:50 am	4 x 100 meter	Round 1
18-08-2013	10:40 am	4 x 100 meter	Final

August 12, 2013

Churandy Martina no ta sigur ainda ku lo e kore 200 meter

MOSKU, Russia – Churandy Martina no a logra yega final den e evento di 100 meter durante di a kampionato Mundial di Atletismo na Rusia. Martina ku a kore un tempu di 10.09 sekònde den semifinal a keda net un désimo di un sekònde pa pasa pa e final. Segun Martina, “mi a duna tur loke mi tabata tin.” Den e semifinal Martina a kore kontra Usain Bolt (9.93 sekònde) i Mike Rogers (9.93 sekònde).

Churandy ainda ta programa pa kore 200 meter riba 16 i 17 ougùstùs i tambe 4 x 100 meter relevo riba 18 ougùstùs. Pa loke ta trata su partisipashon den e evento di 200 meter, Martina a bisa: “e siman aki mi ta bai train e bògt nan pa asina mi evaluá si e leshon na mi pia ta wanta i e ora ei mi ta disidí si mi ta kore 200 meter.”

Seguidamente bo por tuma nota di e skedjel di e evento nan ku Martina lo partisipá aden. Tur e orario nan ta orario lokal di Kòrsou.

Fecha	Ora	Evento	Round
10-08-2013	12:15 pm	100 meter	Round 1
11-08-2013	11:05 am	100 meter	Semi Final
11-08-2013	01:50 pm	100 meter	Final
16-08-2013	02:35 am	200 meter	Round 1
16-08-2013	11:40 am	200 meter	Semi Final
17-08-2013	12:05 pm	200 meter	Final
18-08-2013	8:50 am	4 x 100 meter	Round 1
18-08-2013	10:40 am	4 x 100 meter	Final

August 8, 2013

Partisipashon di Churandy Martina na kampionato mundial di atletismo Mosku

MOSKU, Rusia – E delegashon Hulandes ku lo partisipá na e kampionato mundial di atletismo na Mosku ta kompletu. Awe restante di e atleta nan a yega pa kuminsá nan partisipashon na e kampeonato entre 10-18 ougùstùs 2013. Churandy Martina a biaha pa Rusia for di djaluna ultimo i awe e la dediká algun palabra di motivashon na e delegashon.

“Disfrutá di e kampionato mundial. Gosa hopi”, Martina a bisa. “Esaki ta e momentu. Tur hende a hasi nan máksimo pa ta aki nan. Demostrá riba pista pa asina na final bo por bisa ku bo a hasi tur kos pa duna un bon prestashon. Asina aki bo por ta kontentu ku bo mes i bo por mehorá. Sorprendé bo mes”, Martina a terminá bisando.

Martina lo partisipá den e evento nan di 100 meter, 200 meter i 4 x 100 meter relevo. Martina ta keda kompañá pa, Brian Mariano, Hensley Paulina, Liemarvin Bonevacia, Jerrel Feller i Joren Tromp. Seguidamente bo por tuma nota di e skedjel di e evento nan ku Martina lo partisipá aden. Tur e orario nan ta orario lokal di Kòrsou.

Fecha	Ora	Evento	Round
10-08-2013	12:15 pm	100 meter	Round 1
11-08-2013	11:05 am	100 meter	Semi Final
11-08-2013	01:50 pm	100 meter	Final
16-08-2013	02:35 am	200 meter	Round 1
16-08-2013	11:40 am	200 meter	Semi Final
17-08-2013	12:05 pm	200 meter	Final
18-08-2013	8:50 am	4 x 100 meter	Round 1
18-08-2013	10:40 am	4 x 100 meter	Final

July 30, 2013July 30, 2013

Kuater atleta di Kòrsou den selekshon Hulandes di atletismo

PAPENDAL, Hulanda – Direktor tékniko, Joop Alberda a anunsiá e selekshon Hulandes ku lo partisipá na e Mundial di Atletismo na Mosku, Rusia. E selekshon ta konsistí di 13 atleta individual i dos ekipo di relevo 4x100m. Churandy Martina lo ta kapitan di e selekshon ku lo kompetí entre 10 di ougùstùs i 18 di ougùstùs na Mosku.

Churandy Martina lo ta kapitan di e selekshon i tambe lo partisipá den e evento nan di 100, 200 i 4×100 meter relevo. Hensley Paulina di 20 aña tambe a wòrdu yamá pa forma parti di e ekipo di 4×100 meter relevo. Brian Mariano tambe lo forma parti di e ekipo di 4×100 meter relevo. Por ultimo, Liemarvin Bonevacia tambe a wòrdu añadí na e ekipo di 4×100 meter relevo.