Category: Atletismo

Posted on

Selekshon di relevo 4×100 meter na di seis lugá

LONDON, Inglatera – E tim di relevo 4×100 meter Hulandes ku ta preparando pa e kampionato mundial di atletismo na Mosku, Rusia a sali na di seis lugá den e kareda nan di Diamond League na London. E ekipo konsitiendo di Brian Mariano, Joren Tromp, Jerrel Feller i Hensley Paulina a kore un tempu di 39.69 sekònde. Churandy Martina a kanselá su partisipashon ku e ekipo di relevo den e kareda di ayera despues di a sinti molester na un múskulo di si bèl di pia na momentu ku e tabata kore 200m.

Martina lo partisipá den e mundial di atletismo na Mosku tantu den e evento di 100m komo 200m. E atleta nan ku lo forma parti di e ekipo di relevo 4x100m ainda no ta konosí, pero ku tur probabilidat Churandy Martina lo ta un di nan. E sombra nan lo keda anunsiá mañan pa e direktor tékniko di e selekshon Joop Alberda.

Posted on

Brian Mariano, Churandy Martina, Hensley Paulina i Liemarvin Bonevacia ta yuda selekshon Hulandes di atletismo yega Super League

DUBLIN, Irlanda – E selekshon Hulandes di atletismo a logra finalisá na di tres posishon den e Kampionato Europeo di Pais nan na Dublin, Irlanda. Ku e resultado aki e selekshon Hulandes a keda promové pa e Super League, kual ta e liga di mas altu den e Kampionato Europeo di Pais nan. Den e kompetensia na Dublin, Hulanda a hasi uso di Churandy Martina riba 100m i 4x100m. Liemarvin Bonevacia riba 400m i 4x400m, Brian Mariano i Hensley Paulina den e evento di 4x100m.

Den e evento di 100m, Churandy Martina a resultá a atleta di mas velos i asina kontribuyendo ku 12 punto pa e selekshon Hulandes. Martina a kore un tempu di 10.46 sekònde. Su tras na di dos lugá a finalisá Denis Dimitrov di Bulgaria ku un tempu di 10.76 sekònde.

Riba 4x100m tambe e ekipo Hulandes a sa di ta e ekipo mas velos. E ekipo konsitiendo di Brian Mariano, Jerrel Feller, Hensley Paulina i Churandy Martina a sa di finalisá ku un tempu di 39.14 sekònde.

Liemarvin Bonevacia a sali na di dos lugá den 400m. Aki nan e la kore un tempu di 47.38 sekònde. Na promé lugá a yega Brian Gregan ku un tempu di 46.32 sekònde. Den e evento di 4x400m, Hulanda a sa di marka un tempu di 3:10.46 sekònde ku tabata bon pa promé lugá. Tras di e ekipo Hulandes a yega Repúblika Cheko ku un tempu di 3:10.62 sekònde.

Posted on

Churandy Martina deskualifika riba 200m na Oslo

OSLO, Noruega – E kompetensia nan di atletismo Diamond League organisá pa e Asosiashon Internashonal di Federashon nan di Atletismo (IAAF) a kontinuá ku kompetensia nan na Oslo, Noruega. Churandy Martina a partisipá den e evento di 200m i tabata e promé biaha e aña aki ku Martina a kompetí kontra Usain Bolt. Martina no tabata muchu un kompetensia pa Bolt, ya komo ku e la wòrdu deskualifika for di e evento despues di un salida falsu.

“Tur kos ta pasa pa un motibu,” Martina a bisa riba Twitter. “Mi a move den e bloke di salida i a keda diskualifika. Mi tin ku pone e kos aki tras di lomba i wak dilanti pa e próksimo kareda.”

Posted on

Brian Mariano ta gana riba 100m na Gouden Spike

LEIDEN, Hulanda – Despues di a kore 200m un dia promé na FBK-Games, Brian Mariano a sigui pa su siguiente kompetensia na Leiden. Aki nan Mariano a partisipá na e kareda nan di atletismo internashonal Gouden Spike. E kompetensia aki ta forma parti di e Lotto Baancircuit, ku ta sun seri di evento di atletismo na Hulanda.

Den e kompetensia di Gouden Spike, Brian Mariano a partisipá den e evento di 100m. Ku un tempu di 10.66 sekònde Mariano a kore e mihó tempu di e evento i a sali na promé lugá den su seri di kareda. Huntu ku Mariano den e kareda aki tambe a kore Prince Kwidama ku a finalisá na di sinku lugá den e seri ku un tempu di 10.80 sekònde.

E kompetensia nan di e Lotto Baancircuit ta kontinuá 7 di yüli na Leiden den e Klaverblad Arena Games. E ultimo kareda di e temporada ta riba 7 di sèptèmber kaminda lo tin e Eef Kamerbeek Games na Eindhoven.

Posted on

Churandy Martina na promé lugá ku tempu rèkert na FBK-Games

HENGELO, Hulanda – E evento di FBK-Games Hengelo a bira e evento number un di atletismo internashonal na Hulanda. FBK-Games ta forma parti di Asosiashon Internashonal di Federashon nan di Atletismo (IAAF) su World Challenge ku entre otro tin evento nan na Rio de Janeiro, Mosku, Daegu, Madrid i Hengelo.

Den e e kompetensia di e aña aki tantu Churandy Martina komo Brian Mariano a partisipá. Ambos den e evento di 200m, ya komo ku no tabata tin e evento di 100m den e kompetensia di e aña aki. Martina a yega na promé lugá den e evento di 200m, koriendo su mihó tempu riba 200m di e aña aki ku ta 20.23 sekònde. Ku e tempu aki Martina ta kibra e rèkert di 25 aña bieu riba 200m na FBK-Games. Na 1988 Henry Thomas di Merka a marka e rèkert aki ku un tempu di 20.39 sekònde.

Brian Mariano a finalisá na di ocho lugá den e kompetensia aki. Apesar di esaki e ta logra kore su mihó tempu pa e aña aki, ku un tempu di 21.64 sekònde.

Posted on

VIDEO: Churandy Martina na di kuater lugá den Prefontaine Classic

EUGENE, Oregon – E kompetensia nan di atletismo Diamond League organisá pa e Asosiashon Internashonal di Federashon nan di Atletismo (IAAF) a kontinuá wikènt aki ku Prefontaine Classic na Eugene, Oregon. Siman pasa tambe tabata tin kompetensia pero Churandy Martina no a partisipá den esaki. Den e kompetensia di e siman aki Martina a tuma parti den e evento di 200m.

A dura Martina 20.36 sekònde pa kompletá e evento ku tabata su mihó tempu riba 200m e aña aki. Algun siman pasa Churandy a kore 200m na Shanghai, China ku un tempu di 20.59 sekònde. E tempu di 20.36 ku Martina a kore den e Prefontaine Classic tabata bon pa e di kuater puesto. Na promé lugá a yega Nickel Ashmeade di Jamaica ku un tempu di 20.14 sekònde. Walter Dix di Merka i Jason Young di Jamaica a yega na di dos i di tres lugá respektivamente.

Posted on

Churandy Martina na di 7 lugá riba 100m

BEIJING, China – E kompetensia nan di atletismo IAAF World Challenge organisá pa e Asosiashon Internashonal di Federashon nan di Atletismo (IAAF) a kontinuá awe ku su evento nan na Beijing, China. Churandy Martina a partisipá den e evento di 100m i a finalisá na di 7 lugá ku un tempu di 10.16 sekònde. E kareda nan e keda tene den e stadion Bird’s Nest na Beijing, aki nan Martina a kore na wega nan Olímpiko di 2008. E dia ei Churandy a kore un tempu di 9.93 sekònde ku tabata bon pa di 4 lugá.

E  tempu di 10.16 sekònde, ta e tempu di mas malu ku Martina a yega di kore riba 100m for di aña 2003. Apesar di esaki Martina ta logra kore bou di e tempu límite pa Mundial di Atletismo ku ta 10.21 sekònde. Den e evento aki na promé lugá a sali Justin Gatlin ku a kore un tempu di 9.91 sekònde.

Posted on

Churandy Martina ta sali na di sinku lugá den Diamond League

SHANGHAI, China – E kompetensia nan di atletismo Diamond League organisá pa e Asosiashon Internashonal di Federashon nan di Atletismo (IAAF) a kontinuá wikènt aki ku kompetensia nan na Shanghai, China. Churandy Martina a partisipá den e evento di 200m i logra yega na di sinku lugá ku un tempu di 20.59 sekònde. Na promé lugá a yega Warren Weir di Jamaica ku un tempu di 20.18 sekònde.

Posted on

Brian Mariano na di tres lugá

HOORN, Hulanda – Brian Mariano a partisipá den e di dos kareda di Lotto Baancircuit ku tabata Flynth Recordwedstijden. Mariano a partisipá den e kareda di 100m pa su ekipo di Rotterdam Atletiek. Den e kareda aki Brian a sali na di tres lugá ku un tempu di 10.62 sekònde. Dilanti di Mariano a yega Jerrel Ferrel na di dos lugá ku un tempu di 10.58 sekònde i na promé lugá Giovanni Codrington ku tempu di 10.55.

Lotto Baancircuit ta kontinuá ku e di tres kareda ku ta Golden Spike i lo tuma lugá djadumingu 9 di yüni na Leiden. 7 di yüli e kompetensia ta bai sinta na Leiden den e Klaverblad Arena Games. E ultimo kareda di e temporada ta riba 7 di sèptèmber kaminda lo tin e Eef Kamerbeek Games na Eindhoven.

Posted on

Churandy Martina lo kore 200m na Shanghai

SHANGHAI, China – E kompetensia nan di atletismo Diamond League organisá pa e Asosiashon Internashonal di Federashon nan di Atletismo (IAAF) ta kontinuá wikènt aki ku kompetensia nan na Shanghai, China. Churandy Martina a inskribí pa e evento di 200m i ta aparesé riba e lista provishonal di atleta nan ku lo kompetí den e evento aki.

Siman pasa tabata tin e promé kompetensia nan di Diamond League, e siman ei tabata na Doha, Qatar. Martina no a partisipá na e kompetensia aki ya komo ku den esaki tabata tin solamente e evento di 100m. Martina no ta sinti su mes kla ainda pa presta na nivel riba 100m i a opta pa no partisipá.

Riba e lista provishonal ta figura huntu ku Martina entre otro, Justin Gatlin, Wallace Spearmon, Warren Weir i Jason Young. Tur esaki nan inkluyendo Martina ta koredó nan ku a yega di kore bou di 20 sekònde riba 200m.

Facebook Twitter Instagram Youtube
© 2024 Deporte Awe. Tur derechi reservá. Diseñá pa E² Media