Beisbòl Archives | Page 12 of 107

April 3, 2016

Major League Baseball ta tene Coach Development Program na Kòrsou

WILLEMSTAD — Major League Baseball (MLB) a anunsiá ku nan lo tene un Coach Development Program na Kòrsou di durante dianan 1 pa 9 di aprel. MLB ku sosten di Curacao Baseball Development Foundation lo ta anfitrion di 30 coach lokal na Holiday Beach Resort.

Joel Araujo, Senior Manager Talent Development a presentá e programa, krea i diseñá pa train coachnan den vários área speshalisá di e wega di beisbòl. “Nos ta hopi orguyoso pa trese e programa aki pa promé biaha Kòrsou. Pa Major League Baseball ta importante pa duna sosten na beisbòl di Kòrsou i su coachnan ku e inisiativa aki,”asina Araujo a bisa. Huntu ku Araujo, Miembro di Salon di Fama Roberto Alomar a partisipá den presentashon di e programa. Alomar, 12 biaha miembro di ekipo di Tur Strea i dos biaha kampion mundial ku Toronto Blue Jays, lo kompartí su eksperensia ku e coachnan i ku nos hóbennan ku un klínika awe den Tio Daou Ballpark.

Philip Elhage, presidente, Kenneth Gijsbertha, vise presidente, Andy Nicolaas, Arthur Adams, Romulo Irausquin, Hensley Meulens i Ben Thijssen di Curaçao Baseball Development Foundation a presentá e plataforma i nan dedikashon pa promové e deporte aki riba nos isla.

E kurso intensivo aki ta repartí diariamente entre e parti teorétiko ku lektura di diferente aspekto di e wega i despues klínika riba tereno. MLB ya kaba tabata anfitrion di e programa aki rònt mundu pa siña e arte di pitcheo, bateo, ketcha, fildeo, forsa i kondishon i tambe scouting. E programa ta eduká e coachnan studiante kon pa tene un seshon di práktika efektivo i identifiká instrumentonan pa yuda nan engrandese e wega di beisbòl den nan propio pais

Esaki ta e di 10 edishon di Coach Development Program (CDP) krea pa MLB den Latinoamérika. Esnan anterior tabata na entre otro Sto. Domingo, El Salvador, Nicaragua, Argentina, Chile, Mexico i Colombia. E staf di MLB ta inkluí profeshonalnan ku eksperensia i eks hungadónan di Liga Grandi manera

Denio Gonzalez – Bateo
Temistocle Liendo – Outfielder
Edgardo Lebron – Infielder
Raul Casanova – Catcher
Hector Stewart – Pitcher
Francisco Cedano – Supstansha prohibi
Daniel Vendrell – Forsa i kondishon.

Pa mas informashon riba e programa bishita:?http://mlb.mlb.com/mlb/international/mlbi_index.jsp

March 17, 2016March 16, 2016

Wladimir ‘Coco’ Balentien lo no hunga mas partido di Spring Training pa motibu di leshon

HAPON — Segun informashon, Wladimir ‘Coco’ Balentien lo no hunga e sobra di Spring Training ku e ekipo di Tokyo Yakult Swallows pa motibu di leshon. No tin informashon spesífiko di e leshon otro di ku ta trata di un sker chikí den su múskulo nan di banda robes. Temporada pasa Wladimir a pèrdè gran parti di e temporada pa motibu di un sker den múskulo di su pia robes. Ban spera ku no ta e múskulo aki a bolbe sker i ta dunando Wladimir problema un biaha mas.

March 14, 2016

MLB ta eksihí dokumentonan ofisial na momentu ku peloteronan lokal registrá

WILLEMSTAD — Manera a keda anunsiá resientemente e siman aki representantenan di Ofisina di Komishonado di Major League Baseball (MLB) lo ta na Kòrsou. E evento aki ta pa registrashon di prospektonan lokal ku lo por firma entrante 2 di yüli 2016. Esaki lo tuma lugá djarason 16 di mart i djaweps 17 di mart na Renaissance Hotel di di 4’or di atardi pa 9:30’or di anochi.

Pa por registrá, MLB ta eksihí pa kumpli ku algun rekisito importante. E pelotero ku ta bin registrá mester trese sea su pasport òf un kopia di su akto di nasementu òf ku sédula pa asina por kumpli ku e akto ofisial. Nan mester ta kompaña pa ámbos mayor òf bin ku e formulario ku a keda pone disponibel pa MLB kompletamente yena i ku firma di ámbos mayor si a kaso e hóben ta bou di 18 aña di edat. Den pasado e pelotero tabata bin kompaña pa ámbos mayor i na Renaissance mes tabata yena e formulario. Esaki tampoko no ta un problema pa e representantenan di MLB. Si a kaso un di e mayornan a fayesé ta importante si pa trese un kopia di e akto di fayesimentu. Si ta un mayor so ta ‘voogd’, nan tin ku presentá e prueba di esaki tambe.

Manera tabata e kaso añanan anterior, tur hungadó estranhero, esnan di Kòrsou tambe, mester registrá na e “Office of the Commissioner of Baseball” promé ku nan por bini na remarke pa un kontrato pa e periodo di firma 2016-17 ku un klup di Liga Grandi. Hungadónan ku ta residente di Kòrsou mester yena e formulario ku ta keda pone disponibel pa MLB, pa kuminsá e proseso di inskripshon.

Hungad?nan ku a nase riba e fecha 1 di Sèptèmber 1995 ?f despues méster ta registrá pa 5’or p.m ora standart di ?st dia 15 di mei 2016. Kualke hungadó ku ninga òf di otro manera faya di registrá den e término aki lo no ta eligibel pa firma ku ningun afiliado di e 30 klupnan di Liga Grandi durante di e periodo pa firma 2016-17. Hungadónan nasé promé ku 1 di sèptèmber 1995 no ta kai bou di e eksigensia di registrashon.

March 8, 2016

MLB lo ta na Kòrsou dia 16 i 17 di Mart pa registrá peloteronan prospekto

WILLEMSTAD — Pa di sinku aña siguí representantenan di Ofisina di Komishonado di Major League Baseball (MLB) lo ta na Kòrsou pa tene registrashon di nos prospektonan ku lo por firma pa entrante 2 di yüli 2016 òf di esnan ku no a registrá den pasado ku ta eligibel pa firma. Esaki lo tuma lugá dianan 16 i 17 di mart próksimo na Renaissance Hotel di 4’or di atardi pa 9:30’or di anochi.

Manera tabata e kaso añanan anterior, tur hungadó estranhero, esnan di Kòrsou inkluí, mester registrá serka “Office of the Commissioner of Baseball” promé ku nan por bini na remarke pa un kontrato pa e periodo di firma 2016-17 ku kualke organisashon di Liga Grandi. Hungadónan ku ta residente di Kòrsou mester yena e formulario ku ta keda pone disponibel pa MLB, pa kuminsá e proseso di inskripshon. Pa fasilitá esaki, Ofisina di Komishonado di MLB lo manda algun representante Kòrsou pa guia e proseso aki.

Firmando e formulario aki e hungadó, su mayornan i/òf su tutor (nan) legal (wettelijke voogd(en)) ta duna nan pèrmit eksplísito pa prosesamentu di e datonan pidi den e dokumento aki, den kuadro di e prosedura di registramentu bou di kua pero no limitá na esaki so, hinkamentu di e informashon den e sistema di informashon elektróniko (eBis) di organisashon MLB. Na momentu ku bai registrá sea dia 16 òf dia 17 mart na Renaissance mayornan mester ta presente huntu ku e hóben prospekto. Mester trese un dokumento ofisial manera sea pasport, akto di nasementu òf id. Si e hóben no tin 18 aña e mester presentá ku ámbos mayor òf bin ku e dokumentonan firma. Si a kaso un di e mayornan a fayesé ta nesesario pa trese e akto di fayesimentu. Den kaso ku ta un mayor so ta ‘voogd’, mester trese e dokumentonan legal.

E ofisina di Komishonado di MLB i tur e 30 klupnan den Liga Grandi, entre nan klupnan di liga menor ku ta liga na nan, por basa nan mes riba e datonan kompilá den e dokumento aki i riba e akta di nasementu òf sédula/identifikashon di e hungadó na momentu di inskripshon di, negoshamentu ku i kontratamentu di e hungadó aki. E hóben pelotero ku ta registrá mester tuma nota ku e formulario aki ta aplikabel pa e periodo pa firma di 2016-17. Pa kualke pregunta relashoná ku akseso òf uso di informashon di e hungadó serka MLB òf relashoná ku e proseso di Registrashon, por fabor manda un e-mail pa registration@mlb.com.

No ta deskartá e posibilidat ku e aña aki por kibra e rekòrt di kantidat di prospekto ku ta bai firma ku organisashonnan di Liga Grandi. Tin sigur 6 prospekto ku ta halando hopi atenshon kaba. Tryout di organisashonnan di liga Grandi ya ta un kos komun aki i último dos aña, MLB ta trese skoutnan internashonal pa ta presente na e showcase di fin di aña. Den desèmber 2015 tabatin rekòrt di asistensha di skout internashonal na Kòrsou. Den e periodo di 2014-2015 un total di ocho hóben pelotero a firma ku vários organisashon di Liga Grandi. Den 2015-2015 e kantidat a kai un poko na 6.

March 1, 2016

Andruw Jones ku posishon permanente ku Atlanta Braves

MERKA — E ekipo di Atlanta Braves a anunsiá ku nan a kontratá èks All-Star, Andruw Jones komo asistente spesial di operashonnan di beisbòl. Andruw lo reportá na John Hart kual ta e aktual presidente di operashonnan di beisbòl i gerente general John Coppolella.

Jones tabata huntu ku e ekipo di Atlanta kaba komo instruktor den Spring Training. Siman pasa e ekipo a anunsiá ku den 2016 nan lo indusi Andruw den Hall of Fame di e ekipo.

February 25, 2016

RBC ta entregá unifòrm nobo na umpire i skorer di Beisbòl Little League

WILLEMSTAD — Djárason 24 di febrüari 2016, durante un enkuentro ku Prensa na RBC Royal Bank, spònser prinsipal di Little League RBC, a entregá unifòrm nobo na umpire i skorernan di Little League.

Sr. Sharier Dorand Branch Manager di RBC Rooi Catootji a dirigí palabra i a entregá e unifòrmnan simbólikamente na Marshall Osepa ku ta hefe di e umpirenan den presensia di algun umpire i skorer. Sr. Dorand a mustra riba e importansia di umpire- i skorernan pa desaroyo di Beisbòl Little League.

RBC ta kere den futuro di Kòrsou i nos hóbennan ta nos futuro. P’esei RBC lo sigui kontribuí ku Beisbòl Little League ku ta yuda forma nos hóbennan pa nan ta lider mañan. Sr. Urny Floran District Administrator tambe a dirigí palabra durante e seremonia.

ENKUENTRO SOSHAL

Despues di e parti ofisial RBC Royal Bank, e umpire- i skorernan, representante di RBC i District Administrator a keda huntu di un forma ameno saboriando algun snack i refresko. RBC a hasi esaki komo muestra di gradisimentu pa e trabou boluntario ku nan a bin ta hasi na bienestar di Beisbòl Little League i di Kòrsou.

KAMPIONATO

Kampionato di Little League a start ofisialmente djabièrnè 19 di febrüari 2016 na Frank Curiel Ballpark, kaminda sr. Sharier Dorand a dirigí palabra na e hóben peloteronan, dirigentenan di Little League i mayornan presente. Sharier Dorand a pone énfasis atrobe riba formashon di e hóbennan ku mester bira lidernan den futuro. E funshonario bankario ku ta un èks- hungadó di Little League, a sigui splika di e bunita programa di Little League ku tei pa krea siudadanonan ehemplar, trahadónan ehemplar pa komunidat di Kòrsou. Naturalmente esnan ku bira profeshonal tambe ta hopi bon, pero e meta prinsipal ta pa futuro lidernan i siudadano ehemplar. Sharier a bisa ku RBC ta kere den futuro di Kòrsou i e banko lo keda apoyá Little League ku ta kontribuí na desaroyo di e hóbennan ku ta futuro di Kòrsou.

February 24, 2016

Andruw Jones ta drenta Salon di Fama di Atlanta Braves

MERKA — E ekipo di Atlanta Braves a anunsia ku nan lo admiti Andruw Jones den Salon di Fama di e ekipo. Esaki lo sosode dia 19 di ougustus durante di e seremonianan prome ku e partido kontra Washington Nationals. Huntu ku Andruw, presidente di Atlanta Braves John Schuerholz tambe lo keda admiti den Salon di Fama di e ekipo.

Andruw tabata un di e miho outfieldernan den historia di Atlanta Braves. E pelotero di Korsou a keda firma na aña 1993 pa e ekipo i ya na ougustus di 1996 e pelotero a debuta den Liga Grandi. Dos luna despues, Jones a bira e pelotero di mas hoben ku a konekta honron den Seri Mundial ora ku e la konekta dos honron den e Seri Mundial di 1996 kontra New York Yankees.

Durante di su 12 temporada ku Atlanta, Andruw a gana 10 Wante di Oro konsekutivo i a keda nombra pa e ekipo di Tur-Strea na sinku okashon. Adishonalmente, den 2005 e la gana e premio di Silver Slugger, Hank Aaron Award den Liga Nashonal i tambe hunga di Liga Grandi di aña. Jones a finalisa su karera di Liga Grandi ku 1933 hit, 1289 kareda empuha i 434 honron.

February 24, 2016

KORSOU TIN 7 ARBITRO MAS BON PREPARA PA FUTURO ARBITRAHE DI BEISBOL

WILLEMSTAD — Sala di ABVO tabata senario djaweps 18 di febrüari na momentu ku árbitronan a festehá graduashon di 7 árbitro mas pa beisbòl.

Curaçao Baseball Development Foundation i Refineria Isla huntu ku Febeko tabata e instanshanan kardinal ku a inisiá reklutamentu i organisamentu di árbitro i anotadonan.

Instruktor Franklin Gijsbertha huntu ku nos árbitronan lokal huntu a analisá i a presentá un plan di mas aña pa reskatá arbitrahe na Kòrsou. E plan aki a trese na bida e organisashon Umpire & Scorers Assosiation Curaçao ( USAC) ku lo bai traha pa trese un fundeshi sólido pa arbitrahe aki na Kòrsou.

E grupo di e 7 árbitronan aki ta un dje promé frutanan di e struktura ku USAC kier trese pa arbitrahe.

Minister Presidente sr. Whiteman den un spich elokuente a indiká den tur sentido di palabra kiko arbitrahe ta nifiká, i ku deporte ta un dje instrumentonan ku hopi ta keda insentivá pa Gobièrnu komo esaki ta baha gastunan den salubridat públiko.

Sr. Gijsbertha di Refineria Isla un biaha mas ku e sosten di Refineria a mustra ku Refineria tin kurashon pa komunidat kargando gastunan di kurso pa krea mas árbitro.

Presidente di Febeko, Sr. Konket, i Distric Administrator di Curaçao Little League a elogiá ku a bin un organisashon pa deal ku e problemanan di arbitrahe den nos beisbòl.

Finalmente Presidente di Curaçao Baseball Development Foundation, sr. Elhage tambe a elogiá esnan ku a traha riba e plan di mas aña i ku tambe a felisitá tur e graduádonan i e promé direktiva di USAC enkabesá pa sr. Roald Gijsbertha.

Kòrsou pabien ku e promé direktiva di USAC i e 7 umpayernan ku a gradua.

February 22, 2016

Un Dia den Bida: Didi Gregorius

WILLEMSTAD — E ekipo di produkshon di video di New York Yankees tabata na Kòrsou algu dia pasa. Durante nan bishitá nan a produsí un video riba kon Didi Gregorius ta pasa su dia na Kòrsou.

Video kortesia di: New York Yankees / MLB.com

February 15, 2016February 15, 2016

Shairon Martis tambe ta regresa ku Lincoln Saltdogs

MERKA — E Asosiashon Amerikano di Beisbòl Profeshonal Independiente a anunsiá ku Shairon Martis a yega na un akuerdo ku e ekipo di Licoln SaltDogs. Shairon temporada pasa ya a picha ku e ekipo aki. Na e momentu ey Shairon a logra un rèkert di 6-3 den 17 aparishon ku un efektividat di 3.73.

Luna pasa Curt Smith tambe a yega na un akuerdo ku e ekipo di Licoln SaltDogs. Curt temporada pasa ku e ekipo di Lincoln a logra un averahe di .294 ku 12 honron, 22 doblete, 4 tripel i 61 kareda empuha.