Category: Beisbòl

Posted on

Jair Jurrjens a firma ku Uni-President 7-Eleven Lions

TAIWAN – Jair Jurrjens a yega na un akuerdo pa hunga beisbòl na Taiwan. Segun informashonnan ku nos ta disponé di dje, Jair e yega na un akuerdo ku e ekipo di Uni-President 7-Eleven Lions na Taiwan. E ekipo di Lions no ta deskonosí pa peloteronan yu di Kòrsou, mirando ku na 2014, Shairon Martis tambe a picha ku e ekipo aki.

Temporada pasa e èks-picher All-Star di Liga Grandi a picha den Tripel A ku e ekipo di Albuquerque Isotopes. Ku e ekipo afiliá na Colorado Rockies, Jurrjens a logra un rèkert di 2-5 ku un efektividat di 6.88 den 17 aparishon.

Jair ku awor tin 30 aña di edat a firma ku e ekipo di Detroit Tigers tempu e tabata tin 17 aña. Despues na 2002 e picher yu di Kòrsou a pasa pa Atlanta Braves den un kambio. Ku Atlanta Jair a pasa mayor di su tempu den Liga Grandi. Despues di esaki e picher a forma parti di entre otro e organisashon di Baltimore Orioles, Cincinnati Reds, Detroit Tigers i por último Colorado Rockies.

Posted on

Sharnol ‘Pachito’ Adriana lo ta koach den Liga Menor ku e organisashon di Texas Rangers

MERKA — Despues di hopi aña laborando ku ekiponan di beisbòl profeshonal na Mexico tantu komo pelotero i despues komo dirigente, Sharnol ‘Pachito’ Adriana ta bai laborá awor den beisbòl profeshonal na Merka. Segun e ekipo di Texas Rangers a revelá, Sharnol lo ta koach ku e ekipo di Dobel A Frisco RoughRiders. E organisashon di Texas no a bisa ainda e rol spesifiko ku Sharnol lo tin komo koach. Pero promé ku Sharnol a uni ku e ekipo di Frisco RoughRiders e tabata sirbi komo koach di bateo di e ekipo di Yaquis de Obregon na Mexico.

Posted on

Roger Bernadina a firma ku New York Mets

MERKA — E ekipo di New York Mets a anunsiá ku nan a firma un kontrakt di Liga Menor ku invitashon pa Spring Training ku e outfielder veterano, Roger Bernadina. Temporada pasa Roger no a hunga den Liga Grandi pero tabata tin un bon temporada den Tripel A ku e ekipo di Albuquerque Isotopes. Akinan e pelotero di 31 aña a logra un promedio di .276 ku 15 honron, 66 kareda empuha i 20 base roba.

Posted on

Curt Smith ta regresa den 2016 ku Lincoln Saltdogs

MERKA — Satisfecho ku su prestashon temporada pasa, e ekipo di Lincoln Saltdogs ta bolbe firma Curt Smith pa e temporada 2016. Segun American Association of Independent Professional Baseball, Saltdogs a yega na un akuerdo ku Smith ayera. Curt temporada pasa ku e ekipo di Lincoln a logra un averahe di .294 ku 12 honron, 22 dobelete, 4 tripel i 61 kareda empuha.

Shairon Martis tambe a picha ku e ekipo di Saltdogs den Liga Independiente temporada pasa, pero ainda no ta konosi si Shairon tambe ta regresa ku e ekipo.

Posted on

CBDF ku donashon di bala na Torneo Kenley Jansen

WILLEMSTAD — Hensley Meulens komo konsehero tékniko di Curaçao Baseball Development Foundation (CBDF) promé ku apertura di Torneo Kenley Jansen organisá pa Fundashon Akademia Baseball Brievengat a hasi un donashon di 10 dozein di bala. Esakinan lo keda usa durante a e torneo aki ku tin durashon di tres fin di siman i ku ta konta ku partisipashon di 12 ekipo i 180 hóben den divishon Minor i Little League.

Ku e donashon aki CBDF ta kontribuí na desaroyo di e torneo i ku esaki beisbòl di nos hóbennan. CBDF lo bai hasi donashon di bala na Little League pa kada liga tin 10 dozein di bala pa yuda ku nan kampionato ku lo bai ranka sali próksimamente. CBDF a komprometé tambe pa yuda tur torneo di nos hóbennan ku 10 dozein di bala.

Realidat ta ku falta di material i prinsipalmente bala semper ta un problema i gastunan di esaki ta hopi haltu. CBDF ta kompromete pa wak kon por bai yuda ku e problema aki. Riba e foto momentu ku Hensley Meulens ta hasi entrega simbóliko di bala na dirigente di Torneo Kenley Jansen, Rignald Martina den kompania di algun di e hóbennan.

Posted on

Curaçao Baseball Development Foundation a sera akuerdo di koperashon ku KNBSB

WILLEMSTAD – Na mei último Curaçao Baseball Development Foundation (CBDF) a keda funda ku meta prinsipal yuda ku desaroyo di beisbòl na Kòrsou i pa asina por realisá e potensial máksimo di esaki. Partnernan fiho den e aliansa nobo aki ta KNBSB i FEBEKO. Den ocho luna di eksistensia e fundashon por mira bek sigur riba un komienso fruktífero. Tabatin algun logro hopi importante ku sin duda tantu riba término korto a yuda ku e desaroyo di beisbòl pa nos hóbennan pero riba tèrmino largu lo bai kosecha fruta pa e ramo aki. Niun mas importante ta e akuerdo di koperashon ku Koninklijke Nederlandse Baseball en Softball Bond (KNBSB). Esaki lo bai nifiká un impulso finansiero pa beisbòl di Kòrsou riba tur nivel.

Un di e logronan grandi ku riba tèrmino largu lo bai benefisiá beisbòl di Kòrsou manera a indiká kaba ta un akuerdo logra ku Koninklijke Nederlandse Baseball en Softball Bond (KNBSB). E federashon ulandes ku ta un partner fiho di CBDF a pone nan sosten 100% tras di e fundashon nobo i lo bai kontribuí ku desaroyo di beisbòl na Kòrsou i awor ku sosten finansiero. Ta bon konosí ku e ekipo di Reino ku pa gran parti ta konsistí di peloteronan di Kòrsou a logra posishoná su mes den top di mundu. Ku e koperashon aki entre KNBSB i CBDF ta spera ku por logra pa elevá e nivel di beisbòl den Reino aun mas tantu. Tantu KNBSB i Fundashon lo bai yuda ku desaroyo di beisbòl riba tur nivel. Pa logra ku esaki, KNBSB lo koperá pa rekoudá fondo pero tambe perkurá ku e selekshon di Kòrsou por partisipá Haarlemse Honkbalweek i World Port Tournament. Lo organisá tambe programa di training pa miembronan di e selekshon di Reino ku ta biba na Kòrsou òf ku den ‘off season’ ta aki. Pa loke ta desaroyo di talento, Dutch Caribbean Baseball Academy lo konta ku sosten di KNBSB i lo traha segun e plan di mas aña di entrenamentu di KNBSB. E bònt di beisbòl ulandes lo pone un suma anual disponibel pa e Fundashon te ku 2020 ku mester keda usa eksklusivamente pa base di beisbòl riba tur nivel. Na momentu ku e selekshon di Reino partisipá den torneo internashonal manera entre otro Baseball Classic i gana premio di sèn, un porsentahe fiho ku KNBSB tin derechi riba dje lo bin na benefisio di e fundashon i ku esaki pa beisbòl lokal. E suma di sèn aki mester keda usa pa desaroyo di peloteronan aki na Kòrsou. Si a kaso KNBSB risibí suma di sèn komo spònser pa e selekshon di Reino, un parti di esaki tambe ta bin pa e fundashon.

Otro logro di CBDF tabata ku a logra trese RBI bek na momentu ku MLB a otorgá e fundashon e derecho pa organisá e torneo aki. Danki na sosten di MCB i Refineria Isla pa e parti finansiero i Fundashon pa Nan pa e parti organisatorio ku 16 ekipo i 240 hóben for di edat di 13 aña te 18 aña a mira akshon for di komienso di òktober te mei mei di desèmber.

Un di e pilarnan hopi importante den e desaroyo aki ta e kuerpo di umpire. Un unidat ku hopi biaha ta keda lubidá. Komo ku e kuerpo di umpire tambe ta hopi importante den e totalidat di beisbòl, Curacao Baseball Development Foundation a tuma e inisiativa pa organisá un kurso pa tur umpire di tur nivel di nos beisbòl lokal. CBDF a traha huntu ku FEBEKO ku e meta komun pa garantisá desaroyo duradero di beisbòl di Kòrsou i organisá e kurso aki.  E kurso tabata bou di direkshon di Frank Gijsbertha i un biaha mas ku sosten di Refineria Isla a hasi esaki posibel.  Komo shete umpire lo terminá e kurso ku éksito i lo ta kla pa yuda nos liga nan. Lo bai traha un plan di tres aña pa por yega na produsí 20 umpire mas pa tur e liganan. Lo trata na manda dos umpire afó na ‘umpire school’, pa ‘upgrading’.

Meskos ku ta e kaso ku KNBSB, CBDF ta trahando riba lasonan estrecho pa un relashon mas fruktífero i ku lo tin benefisio pa beisbòl lokal ku MLB. Mester bisa si ku ya kaba por a mira fruta ku diferente reunion ku a tuma lugá kaba tambe ku representante nan di MLB. Ta un hecho ku durante e último showcase di MLB aki na Kòrsou por a nota un kantidat di kasi 50 scout presente ku tambe ta yuda kontribuí na e ekonomia nan estadia na hotèl, taxi, hür outo i tambe restorantnan.

Den 2016 tambe CBDF ta spera di por sigui traha pa desaroyo di beisbòl na Kòrsou i ku tur grupo lo saka probecho di esaki. Por bisa ku 2016 a kuminsá riba e bon pia na momentu ku nos promé big leaguer, Hensley Meulens a hasi un donashon na CBDF ku suma supstsnshal ku a keda rekoudá durante un anochi di sena ku presensia di ae astro di San Francisco Giants Hunter Pence, na desèmber último. Tabata djaweps último ku Hensley Meulens a hasi entrega di e chek na presidente di Curaçao Baseball Development Foundation, Lipo Elhage i sekretario Romulo Irausquin.

Posted on

AKUERDO PA LIGA HUBENIL DI BEISBOL 2016

WILLEMSTAD — Djasabra último, FEBEKO, representá dor di su presidente señor Armin Konket, i District Administrator di Curaçao Little League señor Urny Florán, a firma un akuerdo di kooperashon. Konsiderando ku e dos identidatnan aki tin komo meta pa promové wega di beisbòl mas tantu posibel na Kòrsou, FEBEKO i Curaçao Little League lo organisá kampeonato di Liga Hubenil Kòrsou huntu den aña 2016. Ta trata aki di beisbòl pa hóbennan di 17 i 18 aña di edat. Presidente di FEBEKO i District Administrator lo instalá un komishon di sinku persona pa organisá e kampeonato aki. E kampeonato lo wòrdu hunga bou di kombinashon di reglanan di FEBEKO i di Little League. E kampeonato ta plania pa kuminsá dia 20 di febrüari 2016 i ta terminá dia 29 di mei 2016. Un selekshon di Liga Hubenil, bou di responsabilidat di District Administrator di Curaçao Little League, ta partisipá na e torneo Latinoamerikano di Big League ku ta tuma lugá na Costa Rica di 24 di yüni pa 3 di yüli 2016.

Posted on

Semifinal di MCB RBI 2015 mayan den Tio Daou

WILLEMSTAD – Ya dos finalista pa e bataya pa e titulo di kampion di MCB RBI 2015 ta konosí, Sta. Rosa Indians den Junior i Trai Seru Dodgers den Senior. Djamars lo hunga e semifinal di Junior entre Marchena Reds i Van Engelen Giants i e ganador lo pasa pa e gran final di mihó di tres kuminsando djabièrnè awor na Tio Daou Ballpark. Pa divishon Senior e wega semifinal lo ta entre Sta. Maria Pirates i Sta. Rosa Indians.

Fin di siman tras di lomba tabatin fiesta di beisbòl ora ku e All Star Game di divishon Senior a tuma lugá komo antesala di e Ballpark Night ku un viktoria di 8-0 pa e ekipo dirigí pa Siki Thode. Stanley “Buchito” Rimon no tabatin e fórmula pa pone ni hit ni kareda riba markadó.

Djasabra tabatin e promé weganan di playoff i den divishon Senior na Vi Jansen, den Senior Orioles di Brievengat 4-1 riba Yankees di Montaña Ariba. Marchena Reds a derota Buenavista Nationals 5-2. Sta. Rosa Indians a pèrdè su promé wega na mal ora i Trai Seru Dodgers ta pasa dirèkt pa final ganando 5-4 despues di tabata pèrdí. Sta. Maria Pirates a gana Kwartier Athletics 8-3.

Den divishon Junior, Montaña Abou Rangers a gana Trai Seru Dodgers 10-2.

Sta. Rosa Indians ta bin di atras i sigurá un puesto mínimo komo sub-kampion ganando di Van Engelen Giants 6-3. Marchena Reds a sorprendé Sta. Maria Pirates 3-1. Brievengat Orioles a gana Jandoret Braves 16-1.

Ku e resultadonan aki a pone e siguiente weganan den kuart djadumingu na Tio Daou. Den Senior Sta.Rosa Indians a pasa pa semi-final djarason 6or derotando Marchena Reds 12-4. Sta. Maria Pirates a pasa pa semi-final ganando 3-1 di Brievengat Orioles.

Den Junior, Van Engelen Giants a gana di Brievengat Orioles 5-3 i pasa pa semi-final djamars 8 di desèmber 6 or na Tio Daou. Marchena Reds ta dal Montaña Abou Rangers 8-4.

Djamars 8 di desèmber 18:00 pm na Tio Daou den Junior Semifinal:

Marchena Reds vs. Van Engelen Giants

Djarason 9 di desèmber 18:00 pm na Tio Daou den Senior Semifinal:

Sta. Maria Pirates vs. Sta. Rosa Indians

Ganadornan ta pasa pa final (Best of three):

Djabièrnè 11 di desèmber Tio Daou:

17:30 pm Senior: Ganador semifinal vs. Trai Seru Dodgers

20:00 pm Junior: Ganador semifinal vs. Sta. Rosa Indians

Djasabra 12 di desèmber Tio Daou:

9:00 am Senior: Trai Seru Dodgers vs. Ganador semifinal

11:30 am Junior: Sta. Rosa Indians vs. Ganador semifinal

14:00 pm: Senior: Ganador Semifinal vs. Trai Seru Dodgers (si ta nesesario)

16:30 pm Junior: Ganador semifinal vs. Sta. Rosa Indians (si ta nesesario)

Por último klousura i entrega di premio lo ta djadumingu 13 di desèmber. Premionan lo ta pa ekiponan kampion i sub-kambion i di 3er luga di divishon Junior i Senior. Tambe lo tin premio pa kampion bate i kampion picher di ámbos divishon. E klousura di MCB RBI Curacao 2015 lo ta na Hofi Barbolina. Entrega di premio lo ta di 3or pa 5or pero portanan di hòfi lo ta habri for di 12or di mèrdia pa públiko pa un bbq pa rekoudá fondo pa Fundashon Pa Nan. Lo tin stul ku mesa, dominó, un bar bon surti i e komishon organisadó lo tei pa skucha remarkenan, sugerensia i tambe krítika konstruktivo pa mehorá e kampionato aun mas pa 2016. Pa esun ku no kier kushina nan por bestèl nan karchi BBQ na 5299362.

Posted on

Shairon Martis huntu ku Toros del Este den Beisbòl Invernal

REPÚBLIKA DOMINIKANA — E ekipo di Toros del Este den e Liga di Beisbòl profeshonal Invernal na Repúblika Dominikana a anunsiá ku nan a yega nan un akuerdo ku picher Shairon Marits. Segun e ekipo di Toros, Shairon lo ta nan Repúblika Dominikana mañan pa asina inkorporá su mes na e ekipo.

Martis, di 28 aña e picha temporada tras di lomba den Liga Independiente di Beisbòl Profeshonal. Ku e ekipo di Lincoln Saltdogs, Shairon a logra un rèkert di 6-3 ku un efektividat di 3.73 den 16 salida.

Den pasado, Shairon a hunga Beisbòl Invernal na Venezuela, ku e ekiponan di Navegantes de Magallanes i Tiburones de La Guaira respektivamente.

Posted on

MCB RBI Senior League All Star Game durante Ballpark Night djabièrnè awor

WILLEMSTAD — Kampionato di MCB RBI 2015 a drenta fase final ku preparashon awor pa inisio di playoff i tambe pa e dos weganan di All Star Game di tantu divishon Junior komo Senior. E último weganan ku mester a keda reprogramá a keda efektuá i awor tur kos ta kla i tur ekipo sa ken ta bai topa ken den playoff ku ta ranka sali 5 di desèmber 2015. Promé ku esei sinembargo dia 4 di desèmber tin e wega di Senior All Star ku ta tuma lugá komo antesala di Ball Park Night, 5or di atardi na Tio Daou Ballpark komo di kulminashon di e Curacao Baseball Week.

E ekiponan ku a keda na promé i di dos lugá, den e kaso aki Sta. Rosa i Van Engelen den divishon Junior i Sta. Rosa i Trai Seru den divishon Senior tin e bentaha di hunga kontra di otro i e ganador pasando pa final mesora di MCB RBI 2015. E pèrdèdó ainda tin un chèns den playoff. E managernan di e ekiponan aki tambe a haña derechi pa skohe e hungadónan pa e ekiponan di tur strea. Esei a tuma lugá kaba.

Pa Reggie’s Junior Leaque All Star Game e ekiponan a keda forma di e forma aki pa manager Carlos Badaracco di Van Engelen Giants, Arjun Huerta, Arguently Bonifacia, Ortwin Pieternella, Nigel Calmes, Jonathan Fereira, Jurden Darnault, Dayten Biegel, Ruendy Carolina Rileyson Bentura, Cristien Josephina, Halim Rosalina, Christopher Balentin, Nathan Lopez, Ruwensly Bonifacio, Jurventely Daal, Jeanwayne Brafhart, Derek Rosa, Steven Zimmerman.

Argenis Daal di Sta. Rosa Indians a skohe e siguinet hungadornan, Christopher Koeiman, Rishelon Juliana, Siamani Boekhoudt, Hermain Habat, Kaeber Rog, Giovanni Basilia, Cedanne Rafaela, Tilsaimi Melfor, Kevin Cecilia, Frensly Leito, Mildward Baranco, Kevin Susana, Yarden Lionaris, Sherton Apostel, Rajiv Klaber, Mychelon Jansen, Rochandel Donazal, Shane Quant.

Den Divishon Senior, manager Siki Thode a traha konstelashon di su ekipo di All Star di e siguiente forma, Geedion Jakob, Runai Coran, Riordan Windster, Nathanael Makaya, Joshmar Doran, Rowensly Klaber, Jerson Domitilia, Gerion Jakob, Arthur Levenstone, Shaquille Silberie, Shurendy Valeriano, Michelson Danchi, Jardel Martina, Ogier Martis, Alexander Henrietta K-Shawn Suarez, Mackelthy Blijden, Jonaikel Castro Arias.

Mietras ku Stanley Rimon di Indians a skohe e siguiente hungadornan, Claycandy Hariquez, K-Shawn Sambo, Francinet Martina, Draydon Evelina, Quentin Martina, Hendrich Habat, Kennymar Martina, Andre Adriana, Kayde Macaay, Lilairon Kinburn, Nahzjir Geertruida, Minguel Pena Matos, Rodolfo Mensing, Eduardo Guerra, Richendly Bicentini, Rutherson Eustatia, Gedyon Basilia, Alrich Kuster .

MCB RBI 2015 ta kontinua djasabra 5 di desember ku e prome buelta di playoff tantu den Junior na Tio Daou Ballpark komo Senior na Vi Jansen. Weganan ta programa asina aki:

Divishon Junior na Tio Daou

12/5 Sta. Maria Pirates vs. Marchena Reds 9or am

12/5 Brievengat Orioles vs. Jandoret Braves 11:15 am

12/5 Sta. Rosa Indians vs. Van Engelen Giants 1:30 pm

12/5 Trai Seru Dodgers vs. Montaña Abou Rangers 3:45 pm

Divishon Senior na Vi Jansen

12/5 Brievengat Orioles vs. Montaña Ariba Yankees 9or am

12/5 Marchena Reds vs. Buenavista Nationals 11:15 am

12/5 Sta. Rosa Indians vs. Trai Seru Dodgers 1:30 pm

12/5 Sta. Maria Pirates vs. Kwartier Athletics 3:45 pm

Facebook Twitter Instagram Youtube
© 2024 Deporte Awe. Tur derechi reservá. Diseñá pa E² Media