Category: Beisbòl

Posted on

Randall “Chulo” Simon a duna klinika na St. Michiel Baseball Academy

WILLEMSTAD — St. Michiel Baseball Academy ta hopi kontentu i orguyoso di por a finalisá ku eksito nan promé klinika di baseball. Esaki tabata posibel danki na e kolaborashon di nos pelotero internashonal Randall ¨Chulo¨ Simon i a wordu patrosiná dor di First Caribbean International Bank (FCIB).  E klinika a tuma lugá den e siman di 16 te ku 19 di November i a konta ku partisipashon di 45 mucha den edat di 6 te ku 12 aña.

Komishon organisadó ke gradesí tur e mayornan ku a depositá nan konfiansa pa ku e aktividat. Famia kompletu di St Michiel Baseball Academy ke hasi publiko nan agradesimentu speshal na Randall ¨Chulo ¨ Simon pa su pashon, pasenshi i dedikashon na e muchanan.  Ta apresiá ku ademas di siñanan strategianan di e deporte, tambe tabata di gran balor e manera kon e la papia ku nan tokante e importansia di edukashon i formashon, basá riba balor moral i spiritualidat lokual ta un pilar importante p´e organisashon.

Posted on

Curt Smith ta reforsá e ekipo di Tigres de Chinandega na Nicaragua

MANAGUA — Segun ‘Revista Beisbolera’ di Nicaragua, e ekipo di Tigres de Chinandega na Nicaragua a añadí e pelotero di Kòrsou, Curt Smith na nan ekipo. Sin embargo, e ekipo di Chinandega no a hasi un anunsio ofisial ainda.

Curt den e temporada tras di lomba a hunga ku e ekipo di Lincoln Saltdogs den Liga Independiente. Akinan e pelotero a finalisá temporada ku un promedio di .294 ku 12 honron i 61 kareda empuha den 87 partido.

Den e torneo di Premier12, kaminda Curt a partisipá ku e selekshon di Reino, e pelotero a bati pa un promedio di .400 ku 1 honron, 2 doblete i 9 kareda empuha den seis partido.

Posted on

MCB RBI 2015: Sta. Rosa Indians na kabes den tantu divishon Junior komo Senior

WILLEMSTAD — Den fin di siman tras di lomba tabatin kulminashon di temporada regular di MCB RBI 2015 ku eksepshon di algun wega ku mester a keda reprogramá pa motibu di áwaseru. Den divishon Junior, Sta. Rosa Indians a sigurá e promé puesto riba e tabla di posishon. Van Engelen Giants a kaba na di dos puesto i asina ámbos ekipo ta drenta e buèlta di playoff ?ku un bentaha hungando un wega i e ganador pasando mesora pa final. Tur otro ekipo lo hunga playoff pero ku e sistema di dal saka. Ademas e managernan lo tin enkargo tambe di forma e dos ekiponan di Reggie’s Junior All Star Game via un sistema di ‘draft’ (skohensia). Den divishon Senior, Sta. Rosa Indians tambe a sigurá e promé puesto i e di dos lugá lo bai pa sea Trai Seru Dodgers of Brievengat Orioles dependiendo di e resultado di e wega di djarason.

Sin duda e fin di siman tabata karga ku wega kuminsá for di djaweps bin kaba djadumingu atardi ku un total di 19 wega hunga. Sin duda e sorpresa tabata e viktoria di Orioles riba Indians den divishon Junior ku a pèrdè asina nan invikto.

E resultadonan tabata lo siguiente. Den Senior djaweps Sta. Rosa Indians a keda invikto despues di nan viktoria 4- 1 riba Sta. Maria Pirates. Djabièrnè den Junior, Van Engelen Giants a pasa den pèrta pero ta logra gana 8- 6 di Jandoret Braves. Marchena Braves 13-3 riba Brievengat Orioles den Junior.

Djasabra Junior a hunga den Tio Daou Ballpark i den e promé wega, Sta. Rosa Indians no a bin hasi wega i a pasa fásil riba Van Engelen Giants pa via di nòkout 12–1. Sta. Maria Pirates a gana Trai Seru Dodgers 7-5. Montaña Abou Rangers ta tene duru i logra un viktoria 5-4 riba Brievengat Orioles den Junior. Den un wega maratóniko Marchena Reds a gana Jandoret Braves 13-3. Den Senior na Heintjekool, Trai Seru Dodgers 9-6 riba Buenavista Nationals. Pirates a gana Athletics pa default 7–0. Sta. Rosa Indians a gana 7-3 di Yankees di Montaña Ariba. Orioles pèrta riba Reds 3-2.

Djadumingu den Junior na Vi Jansen, Marchena Reds a gana nan di 3 wega di wikènt 6-2 di Montaña Abou Rangers. Manera a bisa kaba, Brievengat Orioles a kibra invikto di Sta. Rosa Indians ganando 3-2. Sta. Maria Pirates 11-1 riba Jandoret Braves. Finalmente Trai Seru Dodgers a gana Van Engelen Giants 14-1.

Den Senior na Tio Daou Ballpark, Orioles a gana di Nationals 5-2. Dodgers a gana Orioles 3-0. Indians a mantené su invikto ganando di Reds 14-0 i a sigurá e promé puesto riba tabla di posishon. Den último wega di hornada, Pirates a gana Yankees 9-2.

Awor preparashonnan ta kuminsá pa playoff ku ta start 5 di desèmber i tambe e dos weganan di All-Star Game. Senior League All Star Game manera ta konosí ta 4 di desèmber durante Ball Park Night di Curacao Baseball Week i Reggie’s Junior All Star Game lo ta 17 desèmber, un dia despues di MLB Tryout.

Standing Junior

  1. Indians
  2. Giants

3/4. Dodgers of Pirates

5/6. Reds of Rangers

7.? Orioles

  1. Braves

Standing Senior

  1. Indians

2/3. Orioles of Dodgers

  1. Pirates
  2. Athletics
  3. Yankees
  4. Reds
  5. Nationals

Weganan di e siman aki:

Djarason 25/11 (Senior Tio Daou)

18:00 Orioles vs Indians

Djaweps 26/11 (Senior Tio Daou)

18:00 Nationals vs Yankees

Djabierne 27/11 (Junior Tio Daou):

17:30 Montaña Abou vs Trai Seru

19:45 Sta. Rosa vs Sta. Maria

Pa haña un relato mas amplio i tambe sifranan di e weganan por bai riba rbicuracao.com i tambe Facebook. Kòrda ku semper por sigui e weganan bibu na kas riba kòmpiuter, laptop òf telefon via di gamechanger.com. Djis buska rbi curacao junior of senior i por selektá bo ekipo faborito. Tur esaki ta posibel danki na e patrosinio di MCB i Refineria Isla.

Posted on

Jonathan Schoop i Jurickson Profar a konfirmá nan presensia na Curaçao Baseball Week

WILLEMSTAD — Nòmbernan grandi durante e Curaçao Baseball Week, entre 27 di novèmber i 4 di desèmber.

E organisashon ta kontentu di anunsiá ku Jonathan Schoop i Jurickson Profar a konfirmá nan presensia na e gran fiesta di beisbòl binidero. Tur e dos hungadó nan aki lo tei presente na e Kids Clinics i e Ball Park Night na Tio Daou Ball Park huntu ku tur sobrá hungadó i entrenadó ku ya kaba a konfirmá nan presensia. Entrada pa e Kids Clinics ta grátis i pa e Ball Park Night riba 4 di desèmber tin karchi optenibel.

Despues di un korto leshon na su rudia den komienso di e temporada 2015, Schoop a dal un walk-off homerun den su promé wega bèk den yüli pa su ekipo Baltimore Orioles, ku a buta nan gana ekipo Chicago White Sox. Despues di a hunga 86 partido i a bati 15 homeruns, Schoop por mira riba un bunita comeback, ku ainda un karera largu su dilanti.

Apesar di e leshon largu na e skouder di Profar ku a tene  pa 2 temporada afó, e tabatin algun turno eksitoso na bate pa e ekipo di Texas Rangers, ku a partisipá den e Arizona Fall League. Aktualmente Profar no ta hungando riba vèlt, pero su kaminda bèk na e tòp ta mustra probabel: “mi ta lamentá ku ainda mi no por hunga komo infielder, pero asina kos ta. Mi a traha hopi duru e último periodo na mi rekuperashon i dia pa dia e ta bai mihó. Mi ta kontentu ku mi por ta bèk den akshon!”, segun Profar.

Ku e presensia di entre otro Schoop, Profar i tur sobra hungadó, e Ball Park Night ta prometé di bira un evento espektakular. Banda di tur e entretenimiento i weganan, e Homerun Derby lo ta evento deportivo estelar di e anochi. Pa mas informashon tokante e anochi i karchi disponibel bishita: http://curacaobaseballweek.com & www.facebook.com/curacaobaseballweek.

Posted on

MCB-RBI 2015 a sigui ku weganan den divishon Junior i Senior

WILLEMSTAD – Pa promé biaha e temporada aki di MCB-RBI 2015, áwaseru a pone ku mester a kanselá weganan. Pa motibu di e pal’i awa ku a kai djasabra mainta tur wega den ámbos divishon, Junior i Senior mester a kada posponé. Miéntras tantu weganan di Senior ya a keda reprogramá pa djaweps i djabièrnè awor den Tio Daou Ballpark. Djadumingu si a logra hunga tur wega programa i e resultadonan tabata lo siguiente.

Den divishon Junior:

Den Junior Sta. Rosa Indians ketu bai invikto ganando 5-1 di Trai Seru Dodgers. Picher ganador tabata Chris Koieman i mihó bateador tabata Siamani Boekhoudt di 2-2. Picher pèrdèdó pa Dodgers tabata Rigchelon Juliana i mihó bateador tabata Nigel Calmes di 2-1.

Montaña Abou Rangers ta gana di Jandoret Braves 7-3. Picher ganador tabata Cliyano Nahr i mihó bate tabata di Jayden Yanes di 2-2. Picher pèrdèdó pa Jandoret tabata Jaleel Bito i tres bateador a bai di 2-1.

Brievengat Orioles ta pasa riba Sta. Maria Pirates 14-7. Picher ganador tabata Halim Rosalina i mihó bate tabata di Jurvensly Tokaay di 3-2. Picher pèrdèdó pa Pirates tabata Giovanne Basilia i na bate Kaeber Rog a bai di 2-2.

Despues di ta atras 6-0 Van Engelen Giants a reakshoná i laga Marchena Braves den tereno 8-7. Picher ganador tabata Arjun Huerta miéntras ku Christopher Balentin a bai di 3-2. Picher pèrdèdó pa Reds tabata Rushenten Tomsjansen i mihó bateador tabata Shandro Benita di 1-1.

Den divishon Senior:

Marchena Reds a kue su promé puntonan ganando 10-3 di Buenavista Nationals. Picher ganador tabata Giorgio Henao Martinez i Carlos Rosario Pena a bai di 3-3. Picher pèrdèdó pa Nationals tabata Jairo Samboe i mihó bateador tabata e mes di 1-1.

Trai Seru Dodgers i Montaña Ariba Yankees ta parti punto 6-6. Mihó bateador pa Dodgers tabata Ajani De Lannooi di 3-2 i Pa Yankees Lilairon Kinburn tambe di 3-2.

Kwartier Athletics a gana pèrta di Trai Seru Dodgers 5-4. Picher ganador tabata Jardel Martina i na bate dos bateador a bai di 2-1. Picher pèrdèdó pa Dodgers tabata Jerson Dometilia i vários bateador a bai d i 2-1.

Weganan reprogramá den divishon Senior den Tio Daou Ballpark:

Djaweps 12 di Novèmber 2015:

6 or pm: Nationals vs. Athletics

Djabièrnè 13 di Novèmber 2015:

5:30 pm Pirates vs. Dodgers

7:45 pm Pirates vs. Reds

Posted on

CELEBRITIES SOFTBALL GAMES I CURACAO INTERNATIONAL HOMERUN DERBY

WILLEMSTAD – For  di awor pueblo di Kòrsou ta ser notifiká di un aktividat deportivo masha grandi mes ku lo sakudí e pais. Ta asina ku e dia aki tin Celebrities Softball Games i Curacao International Homerun Derby.

Ta asina ku e aktividat deportivo aki lo tuma lugá na SDK. E aktividat aki lo konta ku partisipashon di peloteronan profeshonal i tambe di nòmbernan di peso den Liga Grandi. E peloteronan ku ya a konfirmá nan partisipashon ta Jonathan Schoop, Chulo Simon, Jurickson Profar, Juremi Profar, Yurendell de Caster, Roger Bernadina, Kalian Sams, Coco Balentien i Sharlon Schoop ku ta kampeon dje último edishon. Tin mas di nos peloteronan ku a konfirmá nan partisipashon, pero den transkurso di simannan lo anunsiá esakinan.

Na 2009 kaba tabatin e promé edishon ku a tuma lugá na un SDK den bote en bote. Entrante dje aña akí ta e intenshon pa e aktividat aki ser organisá anualmente. E interes di tantu nos peloteronan komo di algun estrea di Liga Grandi ta enorme. Ku e aktividat aki Kòrsou ta subi mas ainda riba e mapa internashonal, debí ku ta algun dje mihónan di Liga Grandi lo ta aki na Kòrsou.

Pa nos poblashon lo ta algu grandi un aktividat asina aki, paso nos por mira poko pelotero di nòmber den akshon. Pues kuminsá ku reservá e fecha di 19 di desèmber, paso Kòrsou ta bai konosé un dje aktividatnan deportivo di mas grandi di su historia.

Posted on

RANDALL SIMON KU KLINIKA NA TUR MIEMBRO DI TRAI SERU BASEBALLTEAM

WILLEMSTAD – E konosido pelotero yu di Kòrsou Randall ‘Chulo’ Simon, ku a hunga ocho temporada den Baseball Liganan Grandi, ku ta biba na Méhiko, ta di bishita na Kòrsou. Aktualmente Randall tin su akademia di baseball ku yama Randall Simon Baseball Camp. E organisashon di Randall ta spesialisá pa duna klínika na hóben i na dirigentenan di baseball i ta hasiendo esaki na vários pais na diferente kontinente di mundu. Randall a kaba di sali for di Sisilia kaminda e la duna diferente klínika pa e organisashon di World Baseball Opportunities.  Sicilia ta situá na Oropa i tin komo kapital Palermo, ta trata di e isla prinsipal di Italia i tin alrededor di sinku mion habitante. Trai Seru Baseball Team a aserka Randall pa duna klínika na tur su dirigente, coach, manager, i hóben pelotero di su organisashon durante di e siman ku ta kore di 2 te ku 6 di novèmber.  E skèdjel di klínika ta lo siguiente; djaluna pa hóbennan di 13 te ku 15 aña na Tio Daou Ballpark, djamars pa hóbennan di 9 te ku 12  aña na Cirilio Chirino Ballpark, djárason pa hóbennan di 15 te 19 aña na Tio Daou Ballpark, djaweps lo tin training pa tur dirigente, coach i managernan na Kolegio Alejandro ‘Jandi’ Paula, ántes Peter Stuyvesant College i djabièrnè pa hóbennan di 4 te ku 8 aña na Cirilio Chirino Ballpark.

 

Posted on

Kòrsou su Peloteronan Profeshonal #1-201

Partidonan di Beisbòl Liga Grandi awe: 

Seri Mundial

  • Kansas City Royals kontra New York Mets (Kansas ta ariba den e seri 2-0)

Beisbòl Profeshonal Hapones Nippon ayera:

  • Tokyo Yakult Swallows a pèrdè di Softbank Hawks ku skor di 5-0 (Softbank ta kampionisa ganando e seri 4-1. Pa Softbank Hawks esaki ta nan di 7 título (1959, 1964, 1999, 2003, 2011, 2014, 2015))
    Wladimir Balentien a konektá 1 hit den 4 turno na bate pa Swallows

Beisbòl Invernal na Mexico ayera:

  • Roger Bernadina no a konektá hit den 3 turno na bate ku 1 base por bola pa Yaquis de Obregon. Roger tin un promedio di .171

Beisbòl Arizona Fall League ayera:

  • Jurickson Profar no a hunga ayera Surprise Saguaros
Posted on

Tres pelotero lokal nominá pa wante di oro

MERKA — Andrelton Simmons, Didi Gregorius i Xander Bogaerts tur tres ta entre e finalistanan pa Wante di Oro. Simmons a keda nominá huntu ku Brandon Crawford di San Francisco Giants i Adeiny Hechevarria di Miami Marlins pa e premio na posishon di shortstop den Liga Nashonal. Di otro banda, den Liga Amerikano, Bogaerts i Gregorius a keda nominá huntu ku Alcides Escobar di Kansas City Royals pa e puesto di shortstop tambe.

E ganadónan di e premio lo keda anunsiá, djamars, 10 di novèmber 2015 pa 8’or di anochi ora di Kòrsou na kanal di televishon ESPN2.

Andrelton ta bai pa su di tres wante di oro e temporada aki despues di a gana esaki na aña 2013 i 2014. Estadistikamente lo no mester ta un problema pa Andrelton risibí su di tres wante di oro e aña aki. E temporada tras di lomba tabata un di Andrelton su miho añanan defensivamente. Simmons a finalisá temporada ku porsentahe di fildeo di .988 ku solamente 8 eror kometé den 147 partido.

Den Liga Amerikano e kompetensia pa e wante di oro den shortstop ta un tiki mas pèrtá. Sin embargo, tur kos ta mustra ku Xander Bogaerts lo mester gana e premio aki den Liga Amerikano. Xander den e temporada tras a kometé 11 eror den 156 partido i finalisando temporada ku porsentahe di fildeo di .984.

Didi Gregorius no tabata tin un mal temporada defensivamente, mas ku klaro sino lo e no a keda nominá tampoko. Sin embargo, Didi e kometé 13 eror den 155 partido lo ke ta duna un porsentahe di fildeo di .979.

E ganadónan lo keda skohe pa koachnan di e diferente ekiponan di Liga Grandi. Esakinan lo analisá diferente estadistika defensivo pa hustifiká na eskohensia.

Facebook Twitter Instagram Youtube
© 2024 Deporte Awe. Tur derechi reservá. Diseñá pa E² Media